Թռչող տոմսին տեսիլքը

1Եւ դարձայ ու աչքերս վերցնելով տեսայ, և ահա թռչող տոմս մը: 2Ու ինծի ըսաւ, Ի՞նչ կը տեսնես. ու ըսի, Թռչող տոմս մը կը տեսնեմ. երկայնութիւնը քսան կանգուն` ու լայնութիւնը տասը կանգուն է: 3Եւ ինծի ըսաւ, Ասիկա բոլոր երկրի երեսին վրայ ելլող անէծքն է. քանզի ամէն գողութիւն ընողը այս կողմէն գրուածին համեմատ պիտի կտրուի, ու ամէն երդում ընողը միւս կողմէն գրուածին համեմատ պիտի կտրուի: 4Զանիկա ես կը հանեմ, կ’ըսէ զօրաց Տէրը, ու գողին տունը, և իմ անունովս սուտ երդում ընողին տունը պիտի մտնէ, ու անոր տանը մէջ պիտի մնայ, և զանիկա իր փայտերովը ու քարերովը պիտի սպառէ:

Կողովին մէջի կնոջ տեսիլքը

5Եւ ինծի հետ խօսող հրեշտակը ելաւ ու ինծի ըսաւ, Հիմա աչքերդ վերցուր ու նայէ թէ այս ելլողը ի՛նչ է. 6Ու ես ըսի, Ի՞նչ է. ու ըսաւ, Այս ելլողը արդու է. ու ըսաւ, Բոլոր երկրի վրայ անոնց նմանութիւնը ասիկա է: 7Եւ ահա կապարեայ տաղանդ մը վերցուեցաւ, ու կին մը արդուին մէջ կը նստէր: 8Եւ ըսաւ, Այս է Չարութիւնը. ու զանիկա արդուին մէջ ձգեց, և այն կապարեայ կշիռքը այն արդուին բերանը ձգեց: 9Եւ աչքերս վերցուցի ու տեսայ, և ահա երկու կին ելան, ու հովը անոնց թևերուն մէջ էր, և անոնք արագիլի թևերու նման թևեր ունէին, ու այն արդուն երկրի ու երկինքի մէջտեղ վերցուցին: 10Եւ ինծի հետ խօսող հրեշտակին ըսի, Ասոնք ո՞ւր կը տանին արդուն: 11Եւ անիկա ինծի ըսաւ, Կը տանին որ անոր տուն շինեն Սենաար երկրին մէջ. ու պիտի հաստատուի և հոն իր խարսխին վրայ պիտի դրուի: