Փառաբանութեան երգ մը

1Եկէք ցնծութիւն ընենք Տէրոջը առջև, Աղաղակենք մեր փրկութեան Վէմին: 2Գոհութիւնով անոր երեսին առջև գանք, Սաղմոսներով աղաղակենք անոր: 3Վասն զի Տէրը մեծ Աստուած է, Ու բոլոր աստուածներուն վրայ մեծ Թագաւոր է: 4Անոր ձեռքին մէջ են երկրի խորունկ տեղերը, Ու լեռներուն բարձրութիւնները անորն են: 5Իրն է ծովը, ու ինք շինեց զանիկա. Եւ իր ձեռքերը ստեղծեցին ցամաքը: 6Եկէք երկրպագութիւն ընենք ու ծռինք. Ծունկ կրկնենք մեզ ստեղծող Տէրոջը առջև. 7Վասն զի ան է մեր Աստուածը, Ու մենք անոր արօտին ժողովուրդը և անոր ձեռքին ոչխարներն ենք. Այսօր եթէ անոր ձայնին պիտի լսէք, 8Ձեր սիրտերը մի խստացնէք ինչպէս Մերիպայի մէջ` Անապատին մէջ փորձութեան օրուանը պէս 9Ուր ձեր հայրերը զիս փորձեցին, Քննեցին զիս ու իմ գործերս տեսան: 10Քառասուն տարի զզուեցայ այն ազգէն, Ու ըսի, Անոնք սրտով մոլորած ժողովուրդ մըն են, Իմ ճամբաներս չճանչցան: 11Ուստի իմ բարկութեանս մէջ երդում ըրի, Թէ անոնք իմ հանգիստս պիտի չմտնեն: