Ասափի երգը ու Սաղմոսը

1Ով Աստուած, լուռ մի կենար. Անձայն մի ըլլար, ու հանդարտ մի կենար, ով Աստուած: 2Վասն զի ահա քու թշնամիներդ կը գոռան, Ու քեզ ատողները գլուխ կը վերցնեն. 3Խորամանկութեան հնարք կը գտնեն քու ժողովուրդիդ դէմ, Ու խորհուրդ կ’ընեն քու պահպանածներուդ դէմ: 4Կ’ըսեն թէ Եկէք, կորսնցնենք զանոնք որպէս զի ազգ չըլլան, Ու ալ չյիշուի Իսրայէլի անունը. 5Վասն զի միաբան սրտով խորհուրդ ըրին, Ու քեզի դէմ դաշնակցութիւն ըրին 6Եդովմի վրանները ու Իսրայելացիք, Մովաբ ու Հագարացիք, 7Գեբաղ ու Ամմոն և Ամաղէկ, Փղշտացիք` Տիւրոսի բնակիչներուն հետ: 8Նաև Ասուր անոնց հետ միաբանեցաւ. Ղովտի որդիներուն ձեռնտու եղան: (Սէլա:) 9Ըրէ անոնց ինչպէս Մադիամի, Ինչպէս Սիսարայի ու Յաբինի ըրիր Կիսոն հեղեղատին քով. 10Անոնք Ենդովրի մէջ սատակեցան, Աղբի պէս եղան երկրի վրայ: 11Անոնց իշխանները Օրէբի ու Զէբի պէս, Ու անոնց բոլոր երևելիները Զեբէէի ու Սաղմանայի պէս ըրէ. 12Որոնք ըսին թէ Աստուծոյ բնակարանները Մենք ժառանգենք մեզի համար: 13Ով իմ Աստուածս, անոնք մղեղի պէս, Հովի առջև եղող շիւղի պէս ըրէ: 14Ինչպէս կրակը անտառը կ’այրէ, Ու բոցը լեռները կը բռնկցնէ, 15Այնպէս հալածէ զանոնք քու մրրիկովդ, Ու խռովութեան մէջ ձգէ զանոնք քու փոթորիկովդ: 16Լեցուր անոնց երեսները անարգանքով, Որպէս զի քու անունդ խնդրեն, ով Տէր: 17Թող ամչնան ու խռովին յաւիտեան, Եւ ամօթալից ըլլան ու կորսուին. 18Որպէս զի գիտնան թէ միայն դուն, որուն անունը Եհովա է, Բարձրեալ ես բոլոր երկրի վրայ: