1Պօղոս և Տիմոթէոս, Յիսուս Քրիստոսի ծառաները, Քրիստոս Յիսուսով բոլոր սուրբերուն որոնք Փիլիպպեցւոց կողմերն են` եպիսկոպոսներով ու սարկաւագներով. 2Շնորհք ու խաղաղութիւն ձեզի Աստուծմէ մեր Հօրմէն ու Տէր Յիսուս Քրիստոսէ: Պօղոս կ’աղօթէ իր ընթերցողներուն համար 3Կը գոհանամ իմ Աստուծմէս ամէն անգամ որ ձեզ կը յիշեմ, 4(Միշտ իմ ամէն խնդրուածքիս մէջ, ձեր ամէնուն համար ուրախութեամբ աղօթք կ’ընեմ,) 5Աւետարանին հաղորդ ըլլալնուդ համար առաջին օրուընէ մինչև հիմա. 6Այս մասին վստահ ըլլալով` թէ ան որ ձեր մէջ բարի գործ մը սկսեց, մինչև Յիսուս Քրիստոսի օրը պիտի կատարէ. 7Ինչպէս ինծի արժան ալ է ձեր ամէնուն վրայ այս բանը խորհիլ` ձեզ իմ սրտիս մէջ ունենալուս`` համար իմ կապերուս մէջ, և աւետարանին ջատագովութեանը ու հաստատութեանը մէջ, և ամէնդ ինծի եղած շնորհքին հաղորդ ըլլալնուդ համար: 8Քանզի վկայ է ինծի Աստուած, որ ի°նչպէս փափաք ունիմ ձեր ամէնուն վրայ Քրիստոս Յիսուսի գութովը: 9Եւ այս աղօթքը կ’ընեմ, որ ձեր սէրը հետզհետէ աւելի շատնայ գիտութիւնով ու բոլոր ընտրողութիւնով, 10Որպէս զի դուք տարբեր բաները զանազանէք, որպէս զի մինչև Քրիստոսի օրը անկեղծ և առանց գայթակղութեան ըլլաք. 11Արդարութեան պտուղներով լցուած Յիսուս Քրիստոսի ձեռքով` Աստուծոյ փառքին ու գովեստին համար:

Ապրիլը Քրիստոս է

12Կ’ուզեմ որ գիտնաք, եղբայրներ, թէ ինչ որ ինծի պատահեցաւ` ա°լ աւելի աւետարանին յառաջդիմութեանը պատճառ եղաւ. 13Մինչև իմ կապերս, որոնք Քրիստոսի համար են, բոլոր պալատին մէջ և ուրիշ ամէնուն ալ յայտնի եղան. 14Եւ Տէրոջմով եղբայրներուն շատերը սիրտ առին իմ կապերէս` ա°լ աւելի համարձակիլ Աստուծոյ խօսքը խօսելու առանց վախի: 15Ոմանք նախանձէ ու հակառակութենէ և ոմանք բարեսիրութենէ շարժեալ` Քրիստոսը կը քարոզեն. 16Անոնք հակառակութեան համար Քրիստոսը կը պատմեն, ոչ թէ անկեղծութեամբ, կարծելով վիշտ աւելցնել իմ կապերուս վրայ. 17Իսկ ասոնք սիրոյ համար, վասն զի գիտեն թէ ես աւետարանին համար պատասխան տալու կեցեր եմ: 18Բայց ի՞նչ է. ո°ր կերպով որ ըլլայ, թէ° պատճառանքով և թէ° ճշմարտութիւնով, Քրիստոս կը պատմուի, ու ասոր վրայ ուրախ եմ և ուրախ ալ պիտի ըլլամ: 19Քանզի գիտեմ որ ասոր վախճանը իմ փրկութեանս համար պիտի ըլլայ ձեր խնդրուածքովը, ու Յիսուս Քրիստոսի Հոգւոյն օգնականութիւնովը, 20Իմ եռանդուն ակնկալութեանս ու իմ յոյսիս համեմատ, որ բանո°վ մը ամօթով պիտի չըլլամ. հապա կատարեալ համարձակութիւնով ինչպէս ամէն ատեն` նոյնպէս ալ հիմա Քրիստոս իմ մարմինիս մէջ պիտի փառաւորի` թէ° ապրելովս և թէ° մեռնելովս: 21Վասն զի ինծի համար` ապրիլը Քրիստոս է, ու մեռնիլը` օգուտ. 22Ապա եթէ մարմինի մէջ ապրիլս իմ գործիս պտուղ կը բերէ, ալ չեմ գիտեր ո°րը ընտրեմ: 23Երկու կողմանէ ալ նեղը մնացած եմ, մեկնելու ու Քրիստոսի հետ ըլլալու փափաք ունենալով. քանզի այն շատ աւելի աղէկ է, 24Բայց մարմինի մէջ կենալը ձեզի համար աւելի հարկաւոր: 25Եւ այս բանին համոզուած ըլլալով` գիտեմ որ ձեր ամէնուն հետ պիտի կենամ ու մնամ, որպէս զի դուք զարգանաք և ուրախ ըլլաք հաւատքով. 26Որպէս զի ձեր պարծանքը իմ վրայովս աւելի ըլլայ Քրիստոս Յիսուսով` իմ նորէն ձեզի գալուս պատճառաւ: 27Միայն թէ Քրիստոսի աւետարանին ինչպէս կը վայլէ` այնպէս վարուեցէք․ որպէս զի եթէ գամ ու ձեզ տեսնեմ, և կամ հեռու ըլլամ, ձեր վրայովը լսեմ որ դուք հաստատուն կը կենաք մէկ հոգիով, ու մէկ շունչով պատերազմակից կ’ըլլաք աւետարանին հաւատքին համար. 28Եւ բանով մըն ալ մի զարհուրիք հակառակորդներէն, որ անոնց կորուստին ապացոյց մըն է, ու ձեզի` փրկութեան. 29Այն ալ Աստուծմէ է. վասն զի ձեզի տրուեցաւ Քրիստոսի համար` ոչ թէ միայն անոր հաւատալ, հապա անոր համար չարչարուիլ ալ, 30Նոյն պատերազմը ունենալով` զոր իմ վրաս տեսաք ու հիմա իմ վրայովս կը լսէք: