Քանանացիներուն վրայ յաղթանակ

1Եւ հարաւային կողմը բնակող Արադի Քանանացի թագաւորը լսելով որ Իսրայէլ Աթարիմի ճամբայէն կու գայ, Իսրայէլի հետ պատերազմեցաւ, և անոնցմէ գերիներ առաւ: 2Եւ Իսրայէլ ուխտ ըրաւ Տէրոջը ու ըսաւ, Եթէ այս ժողովուրդը իմ ձեռքս մատնես, անոնց քաղաքները բոլորովին պիտի կորսնցնեմ*: 3Եւ Տէրը Իսրայէլի ձայնը լսեց, ու Քանանացիները անոր ձեռքը մատնեց. և Իսրայէլ բոլորովին կորսնցուց զանոնք ու անոնց քաղաքները, և այն տեղին անունը Հօրմա դրաւ:

Պղնձէ օձը

4Ու Եդովմի երկրին բոլորտիքէն անցնելով Հովր լեռնէն Կարմիր ծովուն ճամբան չուեցին. ու ճամբուն մէջ ժողովուրդին սիրտը նեղացաւ: 5Եւ ժողովուրդը Աստուծոյ դէմ ու Մովսէսի դէմ խօսեցան` ըսելով, Ինչո՞ւ մեզ Եգիպտոսէ հանեցիք` որ անապատին մէջ մեռնինք. քանզի հաց չկայ, ջուր չկայ. և այս չնչին հացէն մեր սիրտը զզուեր է: 6Եւ Տէրը ժողովուրդին վրայ կիզող օձեր ղրկեց, ու խածին ժողովուրդը, այնպէս որ Իսրայէլէ շատ ժողովուրդ մեռաւ: 7Եւ ժողովուրդը Մովսէսի եկան ու ըսին, Տէրոջը դէմ ու քեզի դէմ խօսելովնիս մեղանչեցինք. աղօթք ըրէ Տէրոջը, որ մեր վրայէն օձերը վերցնէ. և Մովսէս ժողովուրդին համար աղաչեց: 8Եւ Տէրը ըսաւ Մովսէսի, Քեզի կիզող օձ մը շինէ, ու զանիկա ձողի մը վրայ դիր. և ըլլայ թէ ով որ խածնուի` անոր նայի ու ապրի: 9Եւ Մովսէս պղնձէ օձ մը շինեց, ու զանիկա ձողի մը վրայ դրաւ. և եղաւ որ օձ մը երբ մարդ մը խածնէր, անիկա պղնձէ օձին նայածին պէս կ’առողջանար:

Հօր լեռնէն դէպ ի Մովաբի հովիտը

10Եւ Իսրայէլի որդիները չուեցին, ու Ոբովթի մէջ իջեւան ըրին: 11Եւ Ոբովթէ չուեցին, ու Իյէ-աբարիմի մէջ դէպ ի արեւելեան կողմը, Մովաբի դիմացի անապատին մէջ, իջեւան ըրին: 12Անկէ ալ չուեցին և Զարեդ ձորին մէջ իջեւան ըրին: 13Անկէ չուեցին, ու իջեւան ըրին Առնոնի միւս կողմը այն անապատին մէջ որ Ամօրհացւոց սահմանէն կ’ելլէ, վասն զի Առնոն Մովաբացւոց սահմանն է, Մովաբացւոց ու Ամօրհացւոց մէջտեղ: 14Անոր համար Տէրոջը պատերազմներուն գիրքին մէջ կ’ըսուի, Սուֆայի մէջ Վահէպը, Ու Առնոնի գետերը, 15Եւ Արի կեցած տեղը վազող Ու Մովաբի սահմանը կայացող Գետերուն յորձանքը: 16Եւ անկէ Ջրհորը եկան. ասիկա այն ջրհորն է որու համար Տէրը ըսեր էր Մովսէսի, Ժողովուրդը ժողվէ, ու ես անոնց ջուր պիտի տամ. 17Այն ատեն Իսրայէլ այս երգը երգեց. Ով հոր, բղխէ. երգեցէք անոր. 18Հօրը իշխանները փորեցին, Ժողովուրդին ազնուականները օրէնսդրին հրամանովը` Իրենց գաւազաններովը փորեցին զայն: 19Եւ անապատէն դէպ ի Մաթանա, ու Մաթանայէ դէպ ի Նաալիէլ, ու Նաալիէլէ դէպ ի Բամօթ, 20Եւ Բամօթէ Մովաբի դաշտին մէջ դէպ ի Եսիմոն նայող Փասգայի գագաթը եղած հովիտը չուեցին:

Յաղթանակ Սեհոն և Ովգ թագաւորներուն վրայ

21Եւ Իսրայէլ դեսպաններ ղրկեց Ամօրհացւոց Սեհոն թագաւորին` ըսելով, 22Քու երկրէդ անցնինք. արտի կամ այգիի մէջ չենք մտներ, հորի ջուրէ չենք խմեր. մինչև քու սահմանէդ անցնելնիս արքունական ճամբայէն կ’երթանք: 23Եւ Սեհոն իր սահմանէն ճամբայ չտուաւ Իսրայէլի. հապա Սեհոն իր բոլոր ժողովուրդը ժողվեց, և դէպ ի անապատը Իսրայէլի դէմը ելաւ, ու Յասսա եկաւ, և Իսրայէլի հետ պատերազմեցաւ: 24Եւ Իսրայէլ սուրի բերնէ անցուց զանիկա, ու տիրեց անոր երկրին, Առնոնէ մինչև Յաբոկ, մինչև Ամմոնի որդիներուն երկիրը. վասն զի Ամմոնի որդիներուն սահմանը դժուարին էր: 25Եւ Իսրայէլ բոլոր այս քաղաքները առաւ ու Իսրայէլ Ամօրհացւոց բոլոր քաղաքներուն մէջ բնակեցաւ, Եսեբոնի մէջ ու անոր բոլոր գեղերուն մէջ. 26Քանզի Եսեբոն Ամօրհացւոց Սեհոն թագաւորին քաղաքն էր. վասն զի անիկա Մովաբի առաջուան թագաւորին հետ պատերազմելով, անոր ձեռքէն անոր բոլոր երկիրը մինչև Առնոն առած էր: 27Անոր համար առակ խօսողները կ’ըսեն. Եսեբոն եկէք. Թող Սեհոնի քաղաքը շինուի ու պատրաստուի. 28Վասն զի Եսեբոնէ կրակ ելաւ, Ու Սեհոնի քաղաքէն բոց. Մովաբի Արը այրեց, Ու Առնոնի բարձր տեղերուն տէրերը: 29Վա՜յ քեզ, Մովաբ, Ով Քամովսի ժողովուրդ, կորսուեցար. Իր փախած որդիները ու աղջիկները Ամօրհացւոց Սեհոն թագաւորին գերութեան տուաւ. 30Զանոնք նետերով զարկինք. Եսեբոն կորսուեցաւ մինչև Դեբոն, Եւ կորսնցուցինք զանոնք Մինչև Մեդաբայի քով եղած Նօփա: 31Այսպէս Իսրայէլ Ամօրհացւոց երկիրը բնակեցաւ: 32Եւ Մովսէս մարդ ղրկեց Յազերը լրտեսելու, ու անոր գեղերը առին, և հոն եղած Ամօրհացիները վռնտեցին: 33Եւ դարձան ու Բասանի ճամբան ելան. և Բասանի Ովգ թագաւորը` ինք ու իր բոլոր ժողովուրդը անոնց դէմ Եդրայիի մէջ` պատերազմի ելան: 34Եւ Տէրը ըսաւ Մովսէսի, Անկէ մի վախնար. քանզի քու ձեռքդ մատնեցի զանիկա ու անոր բոլոր ժողովուրդը և անոր երկիրը. և դուն Եսեբոնի մէջ բնակող Ամօրհացւոց Սեհոն թագաւորին ըրածիդ պէս պիտի ընես անոր: 35Այսպէս զարկին զանիկա և անոր որդիները ու անոր բոլոր ժողովուրդը, այնպէս որ մէկն ալ չմնաց. և անոր երկրին տիրեցին: