Յիսուսին փորձութիւնը

1Եւ Յիսուս Հոգւով Սրբով լեցուած` Յորդանանէ դարձաւ, ու Հոգիէն անապատը տարուեցաւ, 2Եւ քառասուն օր սատանայէ փորձուեցաւ. ու այն օրերը բան մը չկերաւ, և այն օրերուն լմննալէն ետև անօթեցաւ: 3Ու սատանայ ըսաւ անոր, Եթէ Աստուծոյ Որդին ես, ըսէ այդ քարին որ հաց ըլլայ: 4Եւ Յիսուս պատասխան տուաւ անոր ու ըսաւ, Գրուած է թէ Ոչ միայն հացով կ’ապրի մարդ, հապա Աստուծոյ ամէն խօսքովը: 5Եւ սատանայ բարձր լեռ մը հանելով զանիկա, աշխարհի բոլոր թագաւորութիւնները ցուցուց անոր վայրկեանի մը մէջ: 6Եւ սատանայ ըսաւ անոր, Այս ամէն իշխանութիւնը ու անոնց փառքը քեզի պիտի տամ, վասն զի ինծի յանձնուած է, և որու որ ուզեմ` կու տամ զանիկա: 7Ուստի եթէ դուն իմ առջևս իյնաս երկրպագութիւն ընես, ամէնը քեզի ըլլայ: 8Եւ Յիսուս պատասխան տուաւ անոր ու ըսաւ, Գրուած է թէ Քու Տէր Աստուծոյդ երկըրպագութիւն ընես, ու միայն զանիկա պաշտես: 9Եւ զանիկա տարաւ Երուսաղէմ ու տաճարին աշտարակին վրայ կայնեցուց, ու ըսաւ անոր, Եթէ դուն Աստուծոյ Որդին ես, քեզ ասկէ վար ձգէ. 10Վասն զի գրուած է թէ Իր հրեշտակներուն պիտի ապսպրէ քեզի համար որ քեզ պահեն. 11Ու ձեռքերնուն վրայ պիտի վերցնեն քեզ, որ չըլլայ թէ ոտքդ քարի զարնես. 12Եւ Յիսուս պատասխան տուաւ ու ըսաւ անոր, Ըսուած է թէ Քու Տէր Աստուածդ չփորձես: 13Ու երբ սատանայ ամէն փորձութիւնը կատարեց, ատեն մը ետ կեցաւ անկէ:

Յիսուս Գալիլիոյ մէջ իր գործը կը սկսի

14Եւ Յիսուս Հոգիին զօրութիւնովը Գալիլեա դարձաւ, ու անոր համբաւը այն գաւառին ամէն կողմերը տարածուեցաւ: 15Եւ ինք անոնց ժողովարաններուն մէջ կը սորվեցնէր, ու ամէնէն կը փառաւորուէր:

Յիսուս Նազարէթի մէջ կը մերժուի

16Ու եկաւ Նազարէթ, ուր ինք մեծցած էր, և իր սովորութեանը պէս շաբաթ օրը մտաւ ժողովարանը, ու ելաւ որ կարդայ: 17Եւ տուին անոր Եսայի մարգարէին գիրքը. ու երբ գիրքը բացաւ, գտաւ այն տեղը` ուր գրուած էր, 18Տէրոջը Հոգին իմ վրաս է. վասն զի զիս օծեց աղքատներուն աւետարան քարոզելու, զիս ղրկեց կոտրած սիրտ ունեցողները բժշկելու, 19Գերիներուն ազատութիւն և կոյրերուն տեսութիւն քարոզելու, հարստահարութիւն կրողները ազատ թող տալու, Տէրոջը ընդունելի տարին քարոզելու: 20Եւ գիրքը գոցելով` տուաւ սպասաւորին ու նստաւ. և ժողովարանը եղողներուն ամէնը աչքերնին տնկած անոր կը նայէին: 21Եւ սկսաւ անոնց ըսել, Այսօր այս գրուածը կատարուեցաւ ու ձեր ականջները լսեցին: 22Եւ ամէնը անոր վրայ կը վկայէին, ու կը զարմանային անոր բերնէն ելած շնորհալի խօսքերուն վրայ, ու կ’ըսէին, Ասիկա Յովսէփի որդին չէ՞: 23Եւ ըսաւ անոնց, Իրաւ որ դուք ինծի պիտի ըսէք այս առակը, Բժիշկ, քու անձդ բժշկէ. որչափ բաներ լսեցինք որ Կափառնայումի մէջ եղան, հոս ալ ըրէ քու քաղաքիդ մէջ: 24Եւ ըսաւ, Ճշմարիտ կըսեմ ձեզի, թէ Մարգարէ մը իր քաղաքին մէջ ընդունելի չէ: 25Եւ արդարև կ’ըսեմ ձեզի, թէ Շատ որբևարիներ կային Եղիայի օրերը Իսրայէլի մէջ, երբ երեք տարի ու վեց ամիս երկինք գոցուեցաւ. այնպէս որ մեծ սով եղաւ բոլոր երկրին մէջ. 26Բայց Եղիա անոնցմէ մէկո°ւն չղրկուեցաւ, հապա միայն Սիդոնացւոց Սարեփթա քաղաքին մէջ որբևարի կնոջ մը: 27Եւ շատ բորոտներ կային Իսրայէլի մէջ Եղիսէ մարգարէին ատենը, ու անոնցմէ մէ°կը չմաքրուեցաւ, հապա միայն Նէեման Ասորի: 28Եւ ժողովուրդին մէջ ամէնն ալ բարկութիւնով լեցուեցան` երբ այս խօսքերը լսեցին. 29Ու ելան զանիկա քաղաքէն դուրս հանեցին, ու տարին զանիկա մինչև այն լեռանը ցցուած ծայրը, որուն վրայ իրենց քաղաքը շինուած էր, որպէս զի զանիկա բարձր տեղէն վար ձգեն: 30Բայց ինք անոնց մէջէն անցաւ գնաց:

Պիղծ ոգի ունեցող մարդ մը

31Եւ իջաւ Գալիլեայի Կափառնայում քաղաքը, ու շաբաթ օրերը կը սովորեցնէր անոնց: 32Եւ կը զարմանային անոր վարդապետութեանը վրայ, վասն զի իշխանութիւնով էր անոր խօսքը: 33Եւ ժողովարանին մէջ մարդ մը կար, որ պիղծ դևի ոգի ունէր, ու մեծ ձայնով մը աղաղակեց` 34Ըսելով, Թող տուր, դուն մեզի հետ ի՞նչ բան ունիս, Յիսուս Նազովրեցի. միթէ մեզ կորսնցնելո՞ւ եկար. գիտեմ քեզ ո°վ ես. Աստուծոյ Սուրբը: 35Եւ Յիսուս սաստեց անոր` ըսելով, Պապանձէ ու ել ատկէ. ու դևը զանիկա ներկայ գտնուողներուն մէջտեղը գետինը զարկաւ, և ելաւ անկէ, ու վնաս մը չտուաւ անոր: 36Եւ զարմանք եկաւ ամէնուն վրայ, և իրարու հետ կը խօսէին ու կ’ըսէին, Այս ինչ խօսք է, որ իշխանութիւնով և զօրութիւնով կը հրամայէ պիղծ ոգիներուն, ու կ’ելլեն: 37Եւ անոր համբաւը տարածուեցաւ շրջակայ գաւառին ամէն տեղերը:

Յիսուս շատեր կը բժշկէ

38Ու ժողովարանէն ելլելով` Սիմոնի տունը մտաւ: 39Սիմոնի զոքանչն ալ սաստիկ ջերմով կը տանջուէր, ու անոր համար աղաչեցին իրեն: 40Եւ Յիսուս անոր վրայ կայնելով` սաստեց ջերմին, որ թողուց զանիկա. և շուտ մը ելաւ ու անոնց սպասաւորութիւն կ’ընէր: 41Եւ արևին մարը մտած ատենը` ամէն անոնք որ ունէին տեսակ տեսակ ցաւերով հիւանդներ, իրեն բերին զանոնք. ինք ալ անոնցմէ ամէն մէկուն վրայ ձեռք դնելով` բժշկեց զանոնք: 42Դևեր ալ կ’ելլէին շատերէն, կ’աղաղակէին ու կ’ըսէին թէ Դուն ես Քրիստոս, Աստուծոյ Որդին. և ինք կը սաստէր ու թող չէր տար անոնց որ խօսին, վասն զի գիտէին թէ ինք Քրիստոսն է:

Յիսուս Սինակոկներու մէջ կը խօսի

43Ու երբ ցորեկ եղաւ, ելաւ ու գնաց անապատ տեղ մը, և ժողովուրդները կը փնտռէին զանիկա. եկան մինչև անոր, ու կը ստիպէին զանիկա որ իրենցմէ չ’երթայ. 44Բայց անիկա ըսաւ անոնց, Պէտք է ինծի որ ուրիշ քաղաքներու ալ Աստուծոյ թագաւորութիւնը քարոզեմ, քանզի այս բանին համար ղրկուած եմ: 45Ու Գալիլեայի ժողովարաններուն մէջ կը քարոզէր: