Մարմնական անմաքրութենէ ծորումը

1Եւ Տէրը խօսեցաւ Մովսէսի ու Ահարոնի՝ ըսելով, 2խօսեցէք Իսրայէլի որդիներուն ու ըսէք անոնց, Երբ մարդու մը մարմինէն ծորում ըլլայ, անոր ծորումը անմաքուր է: 3Եւ իր ծորումին ժամանակը իր անմաքրութիւնը այս պիտի ըլլայ. եթէ իր մարմինէն իր ծորումը վազէ, կամ իր մարմինը իր ծորումէն գոցուի, այս է իր անմաքրութիւնը: 4Ամէն անկողին՝ որուն վրայ ծորում ունեցողը կը պառկի, անմաքուր է. և ամէն բան՝ որուն վրայ անիկա նստի, անմաքուր պիտի ըլլայ։ 5Եւ անոր անկողինին դպչող մարդը իր հանդերձները պիտի լուայ, ու ինք ջրով լուացուի, ու մինչև իրիկուն անմաքուր ըլլայ։ 6Եւ ծորում ունեցողին նստած բանին վրայ նստողը իր հանդերձները պիտի լուայ, ու ինք ջրով լուացուի, և մինչև իրիկուն անմաքուր ըլլայ ։ 7Եւ ծորում ունեցողին մարմինին դպչողը իր հանդերձները պիտի լուայ, ու ինք ջրով լուացուի, և մինչև իրիկուն անմաքուր ըլլայ։ 8Եւ ծորում ունեցողը մաքուր մարդու մը վրայ թքնելու ըլլայ, անիկա իր հանդերձները պիտի լուայ, ու ինք ջրով լուացուի, և մինչև իրիկուն անմաքուր ըլլայ։ 9Եւ ամէն թամբ որուն վրայ ծորում ունեցող կը հեծնէ, անմաքուր պիտի ըլլայ։ 10Եւ ամէն անոր տակ եղած բանին դպչողը մինչև իրիկուն անմաքուր պիտի ըլլայ. ու զանոնք վերցնողը իր հանդերձները պիտի լուայ, և ինք ջրով լուացուի, ու մինչև իրիկուն անմաքուր ըլլայ։ 11Եւ ծորում ունեցողը իր ձեռքը ջուրը չխոթած՝ որու որ դպչելու ըլլայ, անիկա իր հանդերձները պիտի լուայ, ու ինք ջրով լուացուի, և մինչև իրիկուն անմաքուր ըլլայ։ 12Եւ ծորում ունեցողին դպած հողէ ամանը պիտի կոտրուի, ու ամէն փայտէ աման ջուրը պիտի խոթուի։ 13Եւ երբ ծորում ունեցողը իր ծորումէն մաքրուի, իր մաքրուելուն համար եօթը օր պիտի համրէ իրեն, և իր հանդերձները լուայ, ու իր մարմինը կենդանի ջուրի մէջ լուայ, և մաքուր պիտի ըլլայ։ 14Եւ ութերորդ օրը երկու տատրակ կամ աղաւնիի երկու ձագ պիտի առնէ իրեն, ու Տէրոջը առջև ժողովքի խորանին դուռը գայ, և զանոնք քահանային տայ։ 15Եւ քահանան անոնց մէկը մեղքի պատարագ, ու միւսը ողջակէզ պիտի ընէ, և քահանան Տէրոջը առջև քաւութիւն ընէ անոր իր ծորումին համար։ 16Եւ եթէ մարդու մը զուգաւորութեան սերմը իրմէ ելլելու ըլլայ, իր բոլոր մարմինը ջրով պիտի լուայ, ու մինչև իրիկուն անմաքուր ըլլայ։ 17Եւ ամէն հանդերձ, ու ամէն մորթ՝ որուն վրայ զուգաւորութեան սերմ կայ, ջրով պիտի լուացուի, ու մինչև իրիկուն անմաքուր ըլլայ։ 18Եւ երբ մարդ մը կնոջը հետ զուգավորելու համար պառկի, անոնք երկուքն ալ ջրով պիտի լուացուին, ու մինչև իրիկուն անմաքուր ըլլան։ 19Եւ եթէ կին մը ծորում ունենայ, ու անոր մարմինին ծորումը արիւն է, եօթը օր զատուած պիտի կենայ, և ամէն օր անոր դպչողը մինչև իրիկուն անմաքուր ըլլայ։ 20Եւ անոր զատուած ատենը ինչ բանի վրայ որ պառկի, այն բանը անմաքուր պիտի ըլլայ, և ինչ բանի վրայ որ նստի, այն բանը անմաքուր պիտի ըլլայ։ 21Եւ ամէն անոր անկողինին դպչողը իր հանդերձները պիտի լուայ, ու ինք ջրով լուացուի, և մինչև իրիկուն անմաքուր ըլլայ։ 22Եւ ով որ դպչի բանի մը՝ որուն վրայ անիկա նստաւ, իր հանդերձները պիտի լուայ, ու ինք ջրով լուացուի, և մինչև իրիկուն անմաքուր ըլլայ։ 23Եւ անոր անկողինին դպչողը, կամ բանի մը՝ որուն վրայ անիկա կը նստի, մինչև իրիկուն անմաքուր պիտի ըլլայ։ 24Եւ եթէ մարդ մը անոր հետ պառկի, այնպէս որ անոր պղծութիւնը իրեն դպչի, այն մարդը եօթը օր անմաքուր պիտի ըլլայ, և ամէն անկողին որուն վրայ անիկա պառկի՝ անմաքուր ըլլայ։ 25Եւ կին մը՝ եթէ դաշտանին ատենը չեկած, իր արեանը ծորումը շատ օրեր վազէ, կամ իր դաշտանէն աւելի վազելու ըլլայ, իր անմաքրութեանը ծորումին բոլոր օրերը իր դաշտանին օրերուն պէս պիտի ըլլայ. անիկա անմաքուր է։ 26Անոր ծորումին բոլոր օրերը ամէն անկողին, որուն վրայ անիկա կը պառկի, իր դաշտանին անկողինին պէս պիտի ըլլայ իրեն, և ինչ բանի վրայ որ կը նստի, իր դաշտանին անմաքրութեանը պէս անմաքուր պիտի ըլլայ։ 27Եւ ամէն անոնց դպչողը անմաքուր պիտի ըլլայ, ու իր հանդերձները պիտի լուայ, և ինք ջրով լուացուի, ու մինչև իրիկուն անմաքուր ըլլայ։ 28Եւ եթէ իր ծորումէն մաքրուի, այն ատեն եօթը օր պիտի համրէ իրեն, ու անկէ ետև մաքուր ըլլայ. 29Եւ ութերորդ օրը երկու տատրակ կամ աղաւնիի երկու ձագ պիտի առնէ իրեն, ու ժողովքի խորանին դուռը քահանային պիտի բերէ զանոնք։ 30Եւ քահանան մէկը մեղքի պատարագ ու միւսը ողջակէզ պիտի ընէ. և քահանան Տէրոջը առջև քաւութիվն պիտի ընէ անոր իր անմաքրութեանը ծորումին համար։ 31Այսպէս Իսրայէլի որդիները իրենց անմաքրութենէն պիտի զգուշացնէք. որպէս զի իրենց մէջ եղած իմ խորանս պղծելով՝ իրենց անմաքրութեան պատճառաւ չմեռնին։ 32Ծորում ունեցողին, և իրմէ զուգաւորութեան սերմը ելլելով անմաքուր եղողին, 33Ու իր դաշտանով հիւանդ եղող կնոջ, և ծորում ունեցող մարդու կամ կնոջ, ու անմաքուր կնոջ հետ պառկող մարդու օրէնքը այս է։