Կենդանիներ, որոնք կարելի է ուտել

1Եւ Տէրը խօսեցաւ Մովսէսի ու Ահարոնի՝ ըսելով անոնց, 2Խօսեցէք Իսրայէլի որդիներուն ու ըսէք, Երկրի վրայ եղած բոլոր անասուններէն ձեր ուտելու անասունները ասոնք են. 3Ամէն ճեղքուած կճղակ ունեցող կճղակաբաշխ ու որոճացող անասունը պիտի ուտէք: 4Բայց որոճացողէն կամ կճղակաբաշխ եղածէն ասոնք պիտի չուտէք. ուղտը, վասն զի անիկա թէև կ’որոճայ, բայց կճղակաբաշխ չէ, անիկա ձեզի անմաքուր ըլլայ: 5Եւ ճագարը, վասն զի անիկա կ’որոճայ բայց կճղակաբաշխ չէ, անիկա ձեզի անմաքուր ըլլայ: 6Եւ նապաստակը, որ թէև կ’որոճայ, բայց կճղակաբաշխ չէ, անիկա ձեզի անմաքուր ըլլայ: 7Եւ խոզը, որ թէև կճղակաբաշխ է և ճեղքուած կճղակ ունի, բայց չորոճար, անիկա ձեզի անմաքուր ըլլայ: 8Ասոնց միսէն պիտի չուտէք, ու դիերուն չդպչիք. ձեզի անմաքուր են: 9Ջուրերուն մէջ բոլոր եղածներէն ասոնք պիտի ուտեք. ջուրերու մէջ, այսինքն ծովերու մէջ և գետերու մէջ, ամէն թև ու թեփ ունեցողը պիտի ուտէք: 10Եւ ծովերու մեջ ու գետերու մէջ եղած բոլոր անթև ու անթեփ եղածները՝ ջուրերուն բոլոր զեռուններէն և ջուրերուն մէջ եղած շունչ ունեցող բոլոր կենդանիներէն՝ պիղծ ըլլան ձեզի: 11Անոնք ձեզի պիղծ պիտի ըլլան, անոնց միսէն պիտի չուտէք, և անոնց դիերէն պիտի զզուիք: 12Ջուրերուն մէջ եղած բոլոր անթև ու անթեփ եղածները ձեզի պիղծ ըլլան: 13Եւ թռչուններուն մէջ ասոնք պիղծ պիտի սեպէք, պիտի չուտուին. պիղծ են արծիւը և պասկուճը ու գետարծիւը, 14Եւ ցինը ու անգղը իր տեսակին պէս, 15Եւ ամէն ագռաւը իր տեսակին պէս, 16Եւ ջայլամը ու բուն, և կկուն ու բազէն իր տեսակին պէս, 17Եւ հաւպատիրը ու հողամաղը և քաջահաւը, 18Եւ կարապը, և հաւալուսը, ու սև անգղը, 19Եւ արագիլը ու քարադրը իր տեսակին պէս, և յապոպը, ու չիղջը: 20Ամէն չորս ոտքի վրայ քալող թռչող զեռուն ձեզի պիղծ ըլլայ: 21Սակայն ասոնք պիտի ուտէք. բոլոր չորս ոտքի վրայ քալող թռչող զեռուններէն՝ երկրի վրայ ցաթկելու համար ոտքերնուն վրայ ազդր ունեցողները: 22Անոնցմէ ասոնք պիտի ուտեք. մարախը իր տեսակին պէս, ու գրուիճը իր տեսակին պէս, և խարագուլը իր տեսակին պէս, ու ջորեակը իր տեսակին պէս: 23Բայց մնացած բոլոր չորս ոտքով թռչող զեռունները ձեզի պիղծ ըլլան: 24Եւ ասոնցմով դուք անմաքուր պիտի ըլլաք. ամէն անոնց դիերուն դպչողը մինչև իրիկուն անմաքուր պիտ ըլլայ: 25Եւ ամէն անոնց դիերը վերցնողը իր հանդերձները պիտի լուայ, ու մինչև իրիկուն անմաքուր պիտի ըլլայ: 26Բոլոր անասունները որոնք կճղակաբաշխ են, բայց կճղակնին ճեղքուած չէ, և չեն որոճար, անմաքուր են ձեզի. ով որ անոնց դիերուն դպչի, անմաքուր պիտի ըլլայ: 27Եւ բոլոր չորս ոտքի վրայ քալող անասուններէն թաթերնուն վրայ քալողներուն ամէնը անմաքուր ըլլայ ձեզի. ամէն անոնց դիերուն դպչողը մինչև իրիկուն անմաքուր պիտի ըլլայ: 28Եւ անոնց դիերը վերցնողը իր լաթերը պիտի լուայ, ու մինչև իրիկուն անմաքուր պիտի ըլլայ . անոնք անմաքուր են ձեզի: 29Եւ երկրի վրայ սողացող սողուններուն մէջ ասոնք անմաքուր ըլլան ձեզի, աքիսը ու մուկը և տիտեռը իր տեսակին պէս , 30Եւ կովադիան ու մողէսը և քարաթօշը ու խոմէթը և գետնառիւծը: 31Բոլոր սողացողներուն մէջ ձեզի անմաքուր եղածները ասոնք են. ամէն անոնց մեռածին դպչողը մինչև իրիկուն անմաքուր պիտի ըլլայ: 32Եւ անոնց մէկ մեռածը ինչ բանի վրայ որ իյնայ, թէ՛ փայտէ աման ըլլայ կամ հանդերձ կամ մորթ կամ քուրձ, ի՛նչ տեսակ գործածական աման որ ըլլայ, անմաքուր պիտի ըլլայ. ջուրը պիտի ձգուի այն, ու մինչև իրիկուն անմաքուր ըլլայ, և ետքը մաքուր սեպուի: 33Եւ ասոնց մէկը ո՛ր հողէ ամանին մէջ իյնալու ըլլայ, ամէն անոր մէջ եղածը անմաքուր պիտի ըլլայ, ու այն ամանը պիտի կոտրէք: 34Ամէն ուտուելու կերակուրը որուն վրայ ջուր կայ, ու ասոնց մէկը մէջը իջնայ*, անմաքուր պիտի ըլլայ. նոյնպէս ամէն ամանի մէջ եղած բոլոր խմուելու խմելիքը անմաքուր պիտի ըլլայ: 35Եւ ամէն բան՝ որուն վրայ ասոնց դին կ’իյնայ, անմաքուր պիտի ըլլայ. թէ՛ թոնիր ըլլայ և թէ՛ վառարան, պիտի աւրուի. ասոնք անմաքուր են ու անմաքուր պիտի սեպուին ձեզի: 36Բայց աղբիւրը կամ հորը, ուր ժողվուած ջուր կայ*, մաքուր պիտի ըլլայ. սակայն անոնց դիերուն դպչողը անմաքուր ըլլայ: 37Եւ եթէ անոնց դին ցանուելու սերմի մը վրայ իյնայ, մաքուր պիտի ըլլայ այն: 38Բայց եթէ սերմին վրայ ջուր դրուած ըլլայ, ու անոր վրայ անոնց դին իյնայ, այն ձեզի անմաքուր պիտի ըլլայ: 39Եւ եթէ ձեր ուտելու կենդանիներէն մէկը մեռնի, անոր դիին դպչողը մինչև իրիկուն անմաքուր պիտի ըլլայ: 40Եւ անոր դիէն ուտողը իր հանդերձները պիտի լուայ, ու մինչև իրիկուն անմաքուր պիտի ըլլայ. և անոր դին վերցնողը իր հանդերձները պիտի լուայ, ու մինչև իրիկուն անմաքուր ըլլայ: 41Եւ երկրի վրայ սողացող ամէն սողուն պիղծ է. պիտի չուտուի այն: 42Երկրի վրայ բոլոր սողացող սողուններէն ամէն իր փորին վրայ քալողը, կամ ամէն չորս ոտքի վրայ պտըտողը, և կամ ամէն բազմոտանի եղածները պիտի չուտէք, վասն զի պիղծ են: 43Բնաւ սողացող սողունով մը անձերնիդ մի պղծէք. ոչ ալ անոնցմով պղծուելով անձերնիդ անմաքուր ընէք: 44Որովհետև ես եմ ձեր Տէր Աստուածը, ուստի սրբեցէք անձերնիդ ու սուրբ եղէք, վասն զի ես սուրբ եմ. ու բնաւ երկրի վրայ սողացող սողունով մը անձերնիդ մի պղծէք: 45Քանզի ես եմ Եհովան, որ ձեզ Եգիպտոսի երկրէն հանեցի, որպէս զի ձեզ Աստուած ըլլամ. ուստի սուրբ եղէք, վասն զի ես սուրբ եմ։ 46Չորքոտանիներուն և թռչուններուն ու ջուրերուն մէջ շարժող բոլոր շնչաւոր կենդանիներուն և երկրի վրայ սողացող ամէն կենդանիներուն օրէնքը այս է. 47Որպէս զի անմաքուրին ու մաքուրին մէջտեղ և ուտուելու անասունին ու չուտուելու անասունին մէջտեղ տարբերութիւն դնէք։