1Յուդա, Յիսուս Քրիստոսի ծառայ ու Յակոբոսի եղբայրը, ձեզի որ Հայր Աստուծմէն սրբուած էք, և Յիսուս Քրիստոսէ պահուած ու կանչուած: 2Ողորմութիւն ու խաղաղութիւն և սէր ձեր վրայ շատնայ։ 3Սիրելիներ, բոլոր ջանքը վրաս առնելով ձեզի գրելու հասարակաց փրկութեանը համար, իմ անձիս հարկ սեպեցի ձեզի գրել ու յորդորել որ մրցիք այն հաւատքին համար որ անգամ մը սուրբերուն աւանդուեցաւ։ 4Քանզի մէկ քանի մարդիկ գաղտուկ մտան, որ առաջուընէ այս դատապարտութեանը համար որոշուած էին, ամբարիշտներ, որոնք մեր Աստուծոյ շնորհքը անառակութեան դարձուցին, և միմիայն Իշխանը ու մեր Տէր Յիսուս Քրիստոսը ուրացան։

Սուտ վարդապետներ

5Արդ կ’ուզեմ միտքերնիդ բերել, թէև արդէն գիտէք ասիկա, թէ Տէրը որ ժողովուրդը Եգիպտոսի երկրէն ազատեց, ետքը չհաւատացողները կորսնցուց։ 6Եւ այն հրեշտակները, որոնք իրենց իշխանութիւնը չպահեցին, հապա իրենց բնակութիւնը ձգեցին, մշտնջենաւոր կապերով խաւարի մեջ պահեց մեծ օրուան դատաստանին։ 7Ինչպէս Սոդոմ ու Գոմոր և անոնց բոլորտիքը եղած քաղաքները, որոնք ասոնց նման պոռնկեցան ընկերներուն մարմինին ետևէն երթալով, մեր առջև օրինակ կեցեր են՝ յաւիտենական կրակին դատապարտութիւնը ընդունելով։ 8Նմանապէս այս ցնորածներն ալ մարմինը կը պղծեն, տէրութիւնը կ’անարգեն, փառաւորներուն դէմ կը հայհոյեն։ 9Բայց Միքայէլ հրեշտակապետը երբ սատանայի դէմ դնելով՝ Մովսէսի մարմինին համար կը վիճէր, չհամարձակեցաւ հայհոյութեան դատապարտութիւն բերել անոր վրայ, հապա ըսաւ, Տէրը յանդիմանէ քեզ։ 10Իսկ ասոնք այն բաներուն զորոնք չեն հասկնար, հայհոյութիւն կ’ընեն, և այն բաները զորոնք բնականաբար անբան անասուններու պէս գիտեն, անոնց մէջ կ’ապականին։ 11Վա՜յ անոնց, որոնք Կայէնի ճամբովը գացին, ու Բաղաամի մոլորութեանը պէս ցանկութեամբ վարձքի ետևէ գացին, ու Կորխի հակառակութեանը պէս կորսուեցան։ 12Ասոնք ձեր սիրոյ խնջոյքներուն մէջ արատներ են, ու երբ ձեզի հետ կերուխումի կը նստին, աներկիւղ իրենց անձը կը կերակրեն, անջուր ամպեր՝ հովերէն քշուած, պտուղնին կորսնցուցած ծառեր, բերք չունեցող, երկու անգամ մեռած, արմատէն խլուած: 13Ծովու կատղած ալիքներ, որոնք իրենց անձերուն ամօթը կը փրփրցեն. մոլորական աստղեր, որոնց համար խաւարին մէգը պահուած է յաւիտեան: 14Անոնց վրայ մարգարէացան Ենովք ալ, որ եօթներորդ էր Ադամէ, ու ըսաւ, Ահա Տէրը իր բիւրաւոր սուրբերովը եկաւ, 15Ամէնուն դատաստան ընելու, ու բոլոր ամբարիշտները յանդիմանելու իրենց ըրած ամբարշտութեանը բոլոր գործերուն համար, և բոլոր խիստ խօսքերուն համար, զորոնք ամբարիշտ մեղաւորները անոր դէմ խօսեցան։ 16Ասոնք տրտնջողներ ու քրթմնջողներ են, որոնք իրենց ցանկութիւններուն համեմատ կ’երթան, և իրենց բերանները ամբարտաւան խօսքեր կը զրուցեն, և շահի համար երեսպաշտութիւն կ’ընեն։

Զգուշացումներ և յորդորանքներ

17Բայց դուք, սիրելիներ, միտքերնիդ բերէք այն խօսքերը որոնք մեր Տէր Յիսուս Քրիստոսի առաքեալներէն առաջուընէ զրուցուեցան։ 18Որոնք ձեզի կ’ըսէին թէ Վերջին ժամանակը ծաղր ընողներ պիտի ըլլան, որոնք իրենց ամբարիշտ ցանկութիւններուն համեմատ պիտի երթան։ 19Ասոնք ինքզինքնին զատող շնչաւորներ են, որոնք Հոգին չունին։ 20Բայց դուք, սիրելիներ, անձերնիդ շինելով ձեր ամենասուրբ հաւատքին վրայ, և Սուրբ Հոգիով աղօթք ընելով, 21Անձերնիդ Աստուծոյ սիրոյն մէջ պահեցէք՝ մեր Տէր Յիսուս Քրիստոսի ողորմութեանը սպասելով յաւիտենական կեանքի համար։ 22Եւ խտրութիւն ընելով՝ ոմանց ողորմեցէք։ 23Եւ ոմանք վախով ազատեցէք՝ կրակէն յափշտակելով զանոնք, ատելով մարմինէն աղտոտուած հանդերձն ալ։

Օրհնութեան աղօթքը

24Եւ անոր՝ որ կարող է ձեզ անբիծ պահել, և իր փառքին առջև անարատ կայնեցնել ցնծութիւնով։ 25Մեր Փրկչին, միմիայն Աստուծոյ, [մեր Տէր Յիսուս Քրիստոսի ձեռքով] փառք ու մեծութիւն, զօրութիւն ու իշխանութիւն [բոլոր դարերէն առաջ,] և հիմա ու բոլոր դարերու մէջ: Ամէն: