Արևմտեան Մանասէ

1Եւ ասիկա եղաւ Մանասէի ցեղին վիճակը, քանզի անիկա Յովսէփի անդրանիկն էր. Մանասէի անդրանիկը Մաքիր, Գաղաադի հայրը, պատերազմող մարդ մը ըլլալուն համար, Գաղաադ ու Բասան անորը եղան։ 2Եւ Մանասէի միւս որդիներն ալ, Աբիեզերի որդիները, Քեղեքի որդիները, Ասրիէլի որդիները, Սիւքէմի որդիները, Ոփերի որդիները, ու Սեմիդայի որդիները իրենց տոհմերուն համեմատ ժառանգութիւն ունեցան. Յովսեփեան Մանասէի արու զաւակները իրենց տոհմերուն համեմատ ասոնք էին։ 3Եւ Մանասէի որդւոյն Մաքիրի որդւոյն Գաղաադի որդւոյն Ոփերի որդին Սալպաադ տղաքներ չունէր, բայց միայն աղջիկներ, ու անոր աղջիկներուն անունները ասոնք են, Մասլա, Նուա, Էգղա, Մեղքա ու Թերսա։ 4Ասոնք Եղիազար քահանային առջև, Նաւեյան Յեսուի առջև, ու իշխաններուն առջև ներկայանալով՝ ըսին, Տէրը Մովսէսի հրամայեց որ մեր եղբայրներուն մէջ մեզի ժառանգութիւն տրուի։ Եւ Յեսու Տէրոջը հրամանով անոնց հօրը եղբայրներուն մէջ անոնց ժառանգութիւն տուաւ։ 5Եւ Մանասէի՝ Յորդանանու անդիի կողմը եղող Գաղաադի ու Բասանի երկրէն զատ տասը բաժին ինկաւ. 6Քանզի Մանասէի աղջիկները անոր տղոցը մէջ ժառանգութիւն առին, ու Գաղաադու երկիրը Մանասէի միւս որդիներուն եղաւ։ 7Եւ Մանասէի սահմանը ասիկա եղաւ. Ասերէ մինչև Մաքմեթաթ որ Սիւքէմի դիմաց է, ու այս սահմանը աջ կողմը դառնալով՝ մինչև Թափուայի աղբիւրին քով բնակողներուն կը հասնի։ 8Թափուայի երկիրը Մանասէի եղաւ, ու Մանասէի սահմանին մէջ եղող Թափուա քաղաքը Եփրեմի որդիներուն եղաւ։ 9Եւ այս սահմանը Կանա հեղեղատը կ’իջնէ, հեղեղատին հարաւային կողմէն։ Մանասէի քաղաքներուն մէջ ասոնք Եփրեմի քաղաքներն են. և Մանասէի սահմանը հեղեղատին հիւսիսային կողմն է, ու ծովուն մէջ կը վերջանայ։ 10Հարաւային կողմը Եփրեմի, ու Հիւսիսային կողմը Մանասէի ըլլալով, անոնց սահմանը ծովը եղաւ. և հիւսիսային կողմէն Ասերի, ու արեւելեան կողմէն Իսաքարի հետ կը միանան։ 11Եւ Իսաքարի ու Ասերի սահմաններուն մէջ՝ Բեթսան ու անոր գիւղաքաղաքները, և Յեբղաամ ու անոր գիւղաքաղաքները, և Դովրի բնակիչները ու անոր գիւղաքաղաքները, և Ենդովրի բնակիչները ու անոր գիւղաքաղաքները, և Թանաքի բնակիչները ու անոր գիւղաքաղաքները, Մակեդդովի բնակիչները ու անոր գիւղաքաղաքները. այս երեք գաւառը Մանասէի եղան։ 12Եւ Մանասէի որդիները չկրցան այս քաղաքներուն բնակիչները դուրս վռնտել. ու Քանանացիները կամակորութեամբ այն երկրին մէջ բնակեցան։ 13Ու Իսրայէլի որդիները երբ ուժովցան՝ հարկատու ըրին Քանանացիները, բայց զանոնք չվռնտեցին իսպառ։

Եփրեմ և Արևմտեան Մանասէ աւելի հող կ’ուզեն

14Եւ Յովսէփի որդիները Յեսուի հետ խօսեցան ու ըսին, Ինչո՞ւ համար ինծի միայն մէկ վիճակ ու մէկ բաժին ժառանգութիւն տուիր, ու ես բազմաթիւ ժողովուրդ մըն եմ. քանզի Աստուած մինչև հիմա զիս օրհնեց։ 15Եւ Յեսու անոնց ըսաւ, Եթէ դուն բազմաթիւ ժողովուրդ ես, անտառը ելիր և զանիկա կտրէ, և Փերեզացւոց ու Ռափայիններուն երկրին մէջ քեզի տեղ ըրէ, որովհետև Եփրեմի լեռը քեզի նեղ կու գայ։ 16Եւ Յովսէփի որդիները ըսին, Լեռը մեզի համար չէ. ու հովիտի երկրին մէջ՝ Բեթսանի մէջ ու անոր գիւղաքաղաքներուն մէջ, և Յեզրայէլի հովիտին մէջ բնակող բոլոր Քանանացիները երկաթէ կառքեր ունին։ 17Ու Յեսու Յովսէփի տանը, այսինքն Եփրեմի ու Մանասէի, հետ խօսելով՝ ըսաւ, Դուն բազմաթիւ ժողովուրդ ես ու շատ ոյժ ունիս. քեզի միայն մէկ վիճակ չըլլայ. 18Լեռը քուկդ ըլլայ. և որովհետև անիկա անտառ է, զանիկա կտրէ, ու մինչև ծայրը քուկդ ըլլայ. քանզի դուն Քանանացիները անկէ պիտի վռնտես, թէև անոնք երկաթէ կառքեր ունենան ու զօրաւոր ըլլան։