Եփրեմին և արևմտեան Մանասէին յատկացուած երկիրը

1Եւ Յովսէփի որդիներուն վիճակը այսպէս ելաւ. անոնց սահմանը Երիքովի դիմաց Յորդանանէ Երիքովի ջուրին արեւելեան կողմէն այն անապատը կ’երթայ, որ Երիքովէ լեռնակողմը՝ Բեթէլ կ’ելլէ, 2Ու Բեթէլէ Լուզ կ’ելլէ, և Արքի-ատարօթի սահմանէն կ’անցնի, 3Ու արեւմտեան կողմէն Յեփալթիի սահմանը կ’իջնէ, մինչև վարի Բեթորոնին սահմանը ու մինչև Գազեր, և ծովուն մէջ կը վերջանայ։ 4Եւ Յովսէփի որդիները, Մանասէ ու Եփրեմ, ժառանգութիւն առին։

Եփրեմ

5Ու Եփրեմի որդիներուն սահմանը իրենց տոհմերուն համեմատ այս եղաւ. այսինքն անոնց ժառանգութեան սահմանը արեւելեան կողմէն Ատարօթ-ադար եղաւ մինչև վերի Բեթորոնը. 6Եւ այս սահմանը հիւսիսային կողմէն դէպ ի Մաքմեթաթ՝ ծովը կ’ելլէ, ու այս սահմանը արեւելեան կողմէն մինչև Թէանթսելով կը պտըտի, ու ետքը արեւելեան կողմէն Յանովէ կը մտնէ, 7Եւ Յանովէէ Ատարովթ ու Նաարա կ’իջնէ, ու Երիքովի քովէն անցնելով Յորդանան կ’ելլէ. 8Եւ այս սահմանը Թափուայէ Կանա հեղեղատը կ’երթայ արեւմտեան կողմէն, ու ծովուն մէջ կվերջանայ։ Եփրեմի որդիներուն ցեղին ժառանգութիւնը իրենց տոհմերուն համեմատ ասիկա է. 9Նաև Եփրեմի որդիներուն համար զատուած քաղաքները Մանասէի որդիներուն ժառանգութեանը մէջ են, բոլոր քաղաքները իրենց գեղերովը։ 10Եւ անոնք Գազերի մէջ բնակող Քանանացիները չվռնտեցին. ու Քանանացիները մինչև այսօր Եփրեմի մէջ բնակելով, հարկատու ծառաներ եղան։