Երեմիային նամակը Բաբելոնի հրեաներուն

1Ասոնք են այն նամակին խօսքերը, զորոնք Երեմիա մարգարէն Երուսաղէմէ ղրկեց գերիներէն մնացած ծերերուն, քահանաներուն և մարգարէներուն ու բոլոր ժողովուրդին, զորոնք Նաբուգոդոնոսոր Երուսաղէմէ Բաբելոն քշեր էր, 2Յեքոնիա թագաւորին և թագուհիին ու պալատականներուն, Յուդայի ու Երուսաղէմի իշխաններուն ու հիւսերուն և դարբիններուն Երուսասաղէմէ ելլելէն ետքը, 3Սափանի որդւոյն Եղեասայի ու Քեղկիայի որդւոյն Գամարիայի ձեռքով, (զորոնք Յուդայի թագաւորը Սեդեկիա Բաբելոնի Նաբուգոդոնոսոր թագաւորին Բաբելոն ղրկեր էր,) ըսելով, 4Այսպէս կ’ըսէ զօրաց Տէրը, Իսրայէլի Աստուածը, բոլոր գերիներուդ, որոնք Երուսաղէմէ Բաբելոն քշել տուեր եմ. 5Տուներ շինեցէք ու բնակեցէք, պարտէզներ տնկեցէք ու անոնց պտուղը կերէք. 6Կիներ առէք և տղաքներ ու աղջիկներ ունեցէք, ու ձեր տղոցը կիներ առէք, և ձեր աղջիկները այրերու տուէք, որպէս զի տղաքներ ու աղջիկներ ծնանին, և հոդ բազմացէք ու չքիչնաք: 7Ու այն քաղաքին խաղաղութիւնը փնտռեցէք, ուր ձեզ քշել տուեր եմ, և անոր համար Տէրոջը աղօթք ըրէք, վասն զի անոր խաղաղութիւնովը ձեզի խաղաղութիւն կ’ըլլայ: 8Քանզի զօրաց Տէրը, Իսրայէլի Աստուածը, այսպէս կ’ըսէ. Ձեր մէջ եղող ձեր մարգարէները ու ձեր բաղդ նայողները ձեզ չխաբեն, և ձեր տեսնել տուած երազներուն մտիկ մի ընէք: 9Վասն զի անոնք իմ անունովս սուտ մարգարէութիւններ կ’ընեն ձեզի. զանոնք ես չղրկեցի, կ’ըսէ Տէրը: 10Քանզի Տէրը այսպէս կ’ըսէ. Երբ Բաբելոնի եօթանասուն տարին լմննայ, ձեզի այցելութիւն պիտի ընեմ, և ձեզ այս տեղ դարձնելով` իմ բարի խոստմունքս ձեր վրայ պիտի կատարեմ: 11Քանզի ես ձեր վրայով խորհած խորհուրդներս գիտեմ, կ’ըսէ Տէրը, անոնք ձեր յուսացած վախճանը* ձեզի տալու համար խաղաղութեան խորհուրդներ են և ոչ թէ չարիքի: 12Ու դուք ինծի պիտի կանչէք, և պիտի երթաք ու ինծի աղօթք պիտի ընէք, և ձեզի պիտի լսեմ: 13Ու զիս պիտի փնտռէք և պիտի գտնէք, վասն զի ձեր բոլոր սրտովը պիտի խնդրէք զիս. 14Ու ես ձեզ պիտի գտնուիմ, կ’ըսէ Տէրը, և ձեր գերութիւնը ետ պիտի դարձնեմ. ու ձեզ պիտի ժողվեմ բոլոր ազգերէն ու այն բոլոր տեղերէն` ուր ձեզ քշեր էի, կ’ըսէ Տէրը, և ձեզ պիտի դարձնեմ այն տեղը` ուրկէ ձեզ գերութեան քշել տուի: 15(Վասն զի դուք ըսիք թէ Տէրը մեզի Բաբելոնի մէջ մարգարէներ հանեց:) 16Քանզի Դաւիթի աթոռին վրայ նըստող թագաւորին համար, ու այս քաղաքին մէջ բնակող բոլոր ժողովուրդին համար, ձեզի հետ գերութեան չգացող եղբայրներնուդ համար, Տէրը այսպէս կ’ըսէ. 17Զօրաց Տէրը այսպէս կ’ըսէ. Ահա ես անոնց մէջ պիտի ղրկեմ սուրը, սովը ու ժանտախտը, և զանոնք խիստ գէշ թուզերուն պէս պիտի ընեմ, որոնք գէշութենէն չեն ուտուիր. 18Ու զանոնք սրով, սովով ու ժանտախտով պիտի հալածեմ, և զանոնք նեղութիւն կրելու պիտի մատնեմ երկրի բոլոր թագաւորութիւններուն մէջ. ու զանոնք անէծքի, զարմանքի, սուլելու ու նախատինքի ենթակայ պիտի ընեմ այն բոլոր ազգերուն մէջ ուր զանոնք պիտի քշեմ. 19Որովհետև իմ խօսքերս մտիկ չըրին, կ’ըսէ Տէրը, երբ իմ ծառաներս մարգարէները անոնց ղրկեցի, կանուխ ելլելով ու ղրկելով. ու դուք մտիկ չըրիք, կ’ըսէ Տէրը: 20Ուրեմն Տէրոջը խօսքը մտիկ ըրէք, ով դուք բոլոր գերիներդ, զորոնք Երուսաղէմէ Բաբելոն ղրկեցի: 21Իմ անունովս ձեզի սուտ մարգարէութիւն ընող Կովղիայի որդւոյն Աքաաբի վրայով. ու Մաասիայի որդւոյն Սեդեկիայի վրայով զօրաց Տէրը, Իսրայէլի Աստուածը, այսպէս կ’ըսէ. Ահա ես զանոնք Բաբելոնի Նաբուգոդոնոսոր թագաւորին ձեռքը պիտի տամ, ու զանոնք ձեր աչքերուն առջև պիտի զարնէ. 22Եւ Բաբելոն եղող Յուդայի բոլոր գերիներուն մէջ` անոնց պատուհասեն անէծք պիտի առնուի` ըսելով, Տէրը քեզ Բաբելոնի թագաւորին կրակի մէջ խորոված Սեդեկիայի ու Աքաաբի պէս ընէ. 23Վասն զի Իսրայէլի մէջ անզգամութիւն գործեցին, և իրենց ընկերներուն կիներուն հետ շնութիւն ըրին, ու իմ անունովս սուտ խօսքեր խօսեցան, զորոնք ես անոնց չհրամայեցի. բայց ես գիտեմ ու վկայ եմ, կ’ըսէ Տէրը:

Սեմայիային նամակը

24Ու Նեհելամացի Սեմայիայի խօսիս ու ըսես, 25Զօրաց Տէրը, Իսրայէլի Աստուածը, այսպէս կը խօսի ու կ’ըսէ. Որովհետև դուն Երուսաղէմ եղող բոլոր ժողովուրդին, և Մաասիայի որդւոյն Սոփոնիա քահանային ու բոլոր քահանաներուն քու անունովդ թուղթեր ղրկեցիր` ըսելով. 26Տէրը քեզ Յովիադա քահանային տեղ քահանայ դրաւ, որպէս զի Տէրոջը տանը վերակացու ըլլաս, ու ամէն խելացնոր մարդ, որ զինք մարգարէ կը ձևացնէ, կոճղը ու երկաթը դնես: 27Եւ հիմա ինչո՞ւ համար ձեզի մարգարէութիւն ընող* Անաթովթացի Երեմիան չյանդիմանեցիր. 28Վասն զի անիկա մեզի այսպէս նամակ ղրկեց Բաբելոն ու ըսաւ, Այս գերութիւնը պիտի երկննայ. տուներ շինեցէք ու բնակեցէք, պարտէզներ տնկեցէք և անոնց պտուղը կերէք: 29Ու Սոփոնիա քահանան այս թուղթը Երեմիա մարգարէին ականջներուն կարդաց: 30Եւ Տէրոջը խօսքը Երեմիայի եղաւ` ըսելով, 31Բոլոր գերիներուն լուր ղրկէ ու ըսէ, Նեհելամացի Սեմայիայի համար Տէրը այսպէս կ’ըսէ. Որովհետև Սեմայիա ձեզի մարգարէութիւն ըրաւ, թէպէտև զանիկա ես չղրկեցի, ու ձեզ ստութեան յուսացուց, 32Անոր համար Տէրը այսպէս կ’ըսէ. Ահա ես Նեհելամացի Սեմայիայի ու անոր սերունդին այցելութիւն պիտի ընեմ. այս ժողովուրդին մէջ բնակող անոր մէկ մարդը պիտի չմնայ, և իմ ժողովուրդիս ընելու բարիքս անիկա պիտի չտեսնէ, կ’ըսէ Տէրը, վասն զի Տէրոջը դէմ ապստամբութիւն խօսեցաւ: