Գեդէօն

1Եւ Իսրայէլի որդիները Տէրոջը առջև չարութիւն ըրին, ու Տէրը զանոնք եօթը տարի Մադիանացւոց ձեռքը մատնեց: 2Եւ Մադիանացւոց ձեռքը Իսրայէլի վրայ ուժովցաւ, ու Իսրայէլի որդիները Մադիանացւոց պատճառաւ իրենց համար լեռներու մէջ խոռոչներ, քարայրներ և պատնէշներ շինեցին: 3Ու երբ Իսրայելացիք սերմ կը ցանէին, Մադիանացիք անոնց վրայ կ’ելլէին. և Ամաղեկացիք ու արեւելքի բնակիչներն ալ կ’ելլէին. 4Եւ անոնց դէմ բանակ կազմելով գետնին բերքը կ’աւրէին մինչև Գազա, ու Իսրայէլի ապրուստ մը չէին թողուր, ոչ ոչխար, ոչ արջառ և ոչ էշ. 5Քանզի անոնք իրենց հօտերովը ու վրաններովը կ’ելլէին, և մարախի պէս բազմութեամբ կու գային. թէ՛ անոնք և թէ՛ անոնց ուղտերը չէին համրուեր. ու Իսրայէլի երկիրը կու գային զանիկա աւրելու համար: 6Եւ Իսրայէլ Մադիանացւոց պատճառաւ շատ աղքատացաւ. ու Իսրայէլի որդիները Տէրոջը աղաղակեցին: 7Ու երբ Իսրայէլի որդիները Տէրոջը աղաղակեցին Մադիանացւոց պատճառաւ, 8Տէրը Իսրայէլի որդիներուն մարգարէ մը ղրկեց. ու անիկա ըսաւ անոնց, Իսրայէլի Տէր Աստուածը այսպէս կ’ըսէ. Ես ձեզ Եգիպտոսէ հանեցի, ու ձեզ ծառայութեան տունէն դուրս բերի, 9Եւ ձեզ Եգիպտացւոց ձեռքէն, ու բոլոր ձեզի նեղութիւն տուողներուն ձեռքէն ազատեցի, և զանոնք ձեր առջեւէն վռնտելով անոնց երկիրը ձեզի տուի. 10Ու ձեզի ըսի, Ես եմ ձեր Եհովա Աստուածը. մի վախնաք Ամօրհացւոց աստուածներէն, որոնց երկրին մէջ կը բնակիք. բայց դուք իմ խօսքս մտիկ չըրիք: 11Եւ Տէրոջը հրեշտակը եկաւ, ու Աբիեզերեան Յովասի բեւեկնիին տակ նստաւ, որ Եփրայի մէջ էր. ու անոր որդին Գեդէօն հնձանին մէջ ցորեն կը ծեծէր` Մադիանացւոց երեսէն փախցնելու համար: 12Եւ Տէրոջը հրեշտակը անոր երեւցաւ, ու ըսաւ, Ով զօրաւոր կտրիճ, Տէրը քեզի հետ է: 13Եւ Գեդէօն անոր ըսաւ, Ոհ, տէր իմ, Եթէ Տէրը մեզի հետ է, ինչո՞ւ համար այս բոլոր բաները մեր գլուխը եկան. և ո՞ւր են անոր ամէն հրաշքները, զորոնք մեր հայրերը մեզի կը պատմեն` ըսելով թէ Տէրը մեզ Եգիպտոսէ հանեց. բայց հիմա Տէրը մեզ երեսէ ձգեց, ու մեզ Մադիանացւոց ձեռքը մատնեց: 14Եւ Տէրը անոր նայեցաւ ու ըսաւ, Այդ քու զօրութիւնովդ գնա, որպէս զի Իսրայէլը Մադիանացւոց ձեռքէն ազատես. չէ՞ որ ես քեզ ղրկեցի: 15Ու անիկա անոր ըսաւ, Ոհ, Տէր իմ, Իսրայէլը ինչո՞վ ազատեմ. ահա իմ ազգատոհմս Մանասէի ցեղին ամէնէն աղքատն է, ու ես իմ հօրս տանը ամէնէն պզտիկն եմ: 16Եւ Տէրը անոր ըսաւ, Ես անշուշտ քեզի հետ պիտի ըլլամ, ու Մադիամը մէկ մարդու պէս պիտի զարնես: 17Եւ անիկա անոր ըսաւ, Կ’աղաչեմ, եթէ ես քու աչքիդ առջև շնորհք գտայ, ինծի նշան մը ցուցուր, որպէս զի գիտնամ թէ ինծի հետ խօսողը դուն ես: 18Կ’աղաչեմ որ ասկէ չերթաս, մինչև ես քեզի գամ, իմ ընծաս բերեմ ու քու առջեւդ դնեմ: Եւ անիկա ըսաւ, Ես կը սպասեմ մինչև դուն դառնաս: 19Ու Գեդէօն ներս մտաւ, այծերէն ուլ մը և մէկ արդու ալիւրէ բաղարջ շօթեր պատրաստեց. միսը սակառի մը մէջ դրաւ, ու արգանակն ալ պտուկի մը մէջ դրաւ, և անոր առջև հանեց բեւեկնիին տակ ու անոր մատուց: 20Եւ Աստուծոյ հրեշտակը անոր ըսաւ, Միսը ու բաղարջ շօթերը առ, այս վէմին վրայ դիր, ու արգանակը թափէ: Եւ անիկա այնպէս ըրաւ: 21Ետքը Տէրոջը հրեշտակը իր ձեռքի գաւազանին ծայրը երկնցուց, ու միսին և բաղարջ շօթերուն դպաւ. ու վէմէն կրակ ելլելով միսը և բաղարջ շօթերը այրեց. ու Տէրոջը հրեշտակը անոր աչքերուն առջեւէն գնաց: 22Եւ Գեդէօն տեսաւ որ անիկա Տէրոջը հրեշտակն է. ու Գեդէօն ըսաւ, Ոհ, Տէր Եհովա, որ Տէրոջը հրեշտակը երես առ երես տեսայ: 23Բայց Տէրը անոր ըսաւ, Խաղաղութիւն ըլլայ քեզի, մի վախնար. պիտի չմեռնիս: 24Եւ Գեդէօն հոն Տէրոջը սեղան մը շինեց, ու անոր անունը Եհովա-շալօմ կոչեց, որ մինչև այսօր Աբիեզերեանց Եփրային մէջ կեցած է: 25Եւ այն գիշերը Տէրը անոր ըսաւ, Քու հօրդ զուարակը, եօթը տարեկան երկրորդ զուարակը, առ, և քու հօրդ ունեցած Բահաղի սեղանը փլցուր, ու քովի Աստարովթը կտրէ: 26Եւ այս ապառաժ քարին գլուխը օրինաւոր կերպով քու Տէր Աստուծոյդ սեղան մը շինէ, ու երկրորդ զուարակը առ, և քու կտրած Աստարովթիդ փայտերովը ողջակէզ ըրէ: 27Եւ Գեդէօն իր ծառաներէն տասը մարդ առաւ, և Տէրոջը իրեն ըսածին պէս ըրաւ, ու իր հօրը տունէն, և քաղաքին մարդոցմէն վախնալով այս բանը ցորեկը ընելու` գիշերը ըրաւ: 28Ու երբ քաղաքին մարդիկը առաւօտուն կանուխ ելան, տեսան որ Բահաղի սեղանը փլած, և անոր քովի Աստարովթը կտրած, ու երկրորդ զուարակը շինուած սեղանին վրայ ողջակէզ եղած էր: 29Ուստի իրարու ըսին, Այս բանը ո՞վ ըրաւ. և փնտռեցին ու քննեցին. ու ըսուեցաւ թէ Այս բանը Յովասի որդին Գեդէօն ըրաւ: 30Եւ քաղաքին մարդիկը Յովասի ըսին, Որդիդ դուրս հանէ որպէս զի մեռնի, քանզի Բահաղի սեղանը փլցուցեր, ու անոր քովի Աստարովթը կտրեր է: 31Եւ Յովաս իր վրայ եկող բոլոր մարդոցն ըսաւ, Միթէ Բահաղի իրաւունքը դո՞ւք պիտի պաշտպանէք, կամ թէ զանիկա դո՞ւք պիտի ազատէք. ով որ անոր իրաւունքը պաշտպանէ, թող մեռցուի մինչև առտու. եթէ անիկա աստուած է, թող ինք իր իրաւունքը պաշտպանէ անոր դէմ, իր սեղանը փլցնելուն համար: 32Եւ նոյն օրը զանիկա Յերոբաաղ անուանեց, քանզի ըսաւ, Թող Բահաղ իր իրաւունքը պաշտպանէ անոր դէմ, իր սեղանը փլցնելուն համար: 33Եւ բոլոր Մադիանացիները, Ամաղեկացիները ու արեւելքի բնակիչները մէկտեղ ժողվուեցան, ու Յորդանանէ անցնելով` Յեզրայէլի հովտին մէջ բանակեցան: 34Եւ Տէրոջը Հոգին Գեդէօնի վրայ հանգչեցաւ, ու անիկա փող հնչեցուց, և Աբիեզերեանք անոր ետեւէն ժողվուեցան: 35Ու բոլոր Մանասէի պատգամաւորներ ղրկեց, ան ալ անոր ետեւէն ժողվուեցաւ. և Ասերի, Զաբուղոնի ու Նեփթաղիմի ալ պատգամաւորներ ղրկեց, ու անոնք գացին զանոնք դիմաւորել: 36Եւ Գեդէօն Աստուծոյ ըսաւ, Եթէ ըսածիդ պէս Իսրայէլը իմ ձեռքովս ազատելու ես, 37Ահա ես կալին մէջ բուրդի գզաթ մը կը դնեմ. եթէ միայն գզաթին վրայ ցօղ, ու բոլոր գետնին վրայ չորութիւն ըլլայ, այն ատեն պիտի գիտնամ որ ըսածիդ պէս Իսրայէլը իմ ձեռքովս պիտի ազատես: 38Եւ այնպէս եղաւ. վասն զի առաւօտուն կանուխ ելաւ, ու գզաթը քամեց, և գզաթէն ցօղը հանեց, որ կոնք մը լեցուն ջուր եղաւ: 39Այն ատեն Գեդէօն Աստուծոյ ըսաւ, Քու բարկութիւնդ իմ վրաս չբորբոքի, ու միայն այս անգամ ալ խօսիմ. միայն այս անգամ գզաթովը փորձեմ. հիմա միայն գզաթին վրայ չորութիւն` ու բոլոր գետնին վրայ ցօղ ըլլայ: 40Եւ այն գիշերը Աստուած այնպէս ըրաւ. միայն գզաթին վրայ չորութիւն` ու բոլոր գետնին վրայ ցօղ եղաւ: