Ազդարարութիւն հարուստներու

1Աղէ հիմա, հարուստներ, լացէք ու ողբացէք այն թշուառութիւններուն համար` որոնք ձեր վրայ պիտի գան: 2Ձեր հարստութիւնը ապականած է, ու ձեր հանդերձները` ցեցի կերակուր եղած: 3Ձեր ոսկին ու արծաթը ժանգոտած է, և անոնց ժանգը ձեզի դէմ վկայ պիտի ըլլայ, ու ձեր մարմինը պիտի ուտէ կրակի պէս. վերջին օրերուն համար գանձ դիզեցիք: 4Ահա ձեր արտերը հնձող բանուորներուն վարձքը զոր ետ պահեցիք` կ’աղաղակէ, ու հնձողներուն բողոքը զօրութեանց Տէրոջը ականջներուն հասաւ: 5Երկրի վրայ փափկութեամբ և հեշտութեամբ ապրեցաք, սիրտերնիդ սնուցիք` որպէս թէ մորթուելու օրուան համար: 6Դատապարտեցիք ու սպանեցիք արդարը, որ ձեզի հակառակ չկենար:

Համբերութիւն և աղօթք

7Ուստի համբերող եղէք, եղբայրներ, մինչև Տէրոջը գալուստը. ահա երկրագործը կը սպասէ երկրի պատուական պտուղին` անոր համար համբերելով, մինչև առաջին ու վերջին անձրևը առնէ: 8Դուք ալ համբերութիւն ըրէք, սիրտերնիդ հաստատ բռնեցէք. վասն զի Տէրոջը գալուստը մօտ է: 9Իրարու դէմ մի հառաչէք, եղբայրներ, որպէս զի չդատապարտուիք. ահա Դատաւորը դրանը քով կայներ է: 10Եղբայրներս, չարչարանքներու և համբերութեան օրինակ առէք մարգարէները, որոնք Տէրոջը անունովը խօսեցան: 11Ահա համբերողներուն երանի կու տանք. Յոբի համբերութիւնը լսեցիք դուք, և Տէրոջը անոր ըրած վախճանը տեսաք, որ Տէրը բազմագութ ու ողորմած է: 12Արդ ամէն բանէ առաջ, եղբայրներս, երդում չընէք, ոչ երկինքի վրայ, ոչ երկրի վրայ, ոչ ալ ուրիշ երդում մը. հապա ձեր այոն այո ըլլայ, և ոչը` ոչ, որ չըլլայ թէ դատապարտութեան տակ իյնաք: 13Եթէ ձեզմէ մէկը նեղութեան մէջ է, աղօթք թող ընէ. եթէ մէկը ուրախ է, սաղմոս թող երգէ: 14�թէ ձեզմէ մէկը հիւանդ է, եկեղեցիին երէցները թող կանչէ, ու անոր վրայ աղօթք թող ընեն, ու Տէրոջը անունովը իւղով օծեն զանիկա. 15Եւ հաւատքով եղած աղօթքը պիտի փրկէ հիւանդը, ու Տէրը զանիկա ոտք պիտի հանէ. և եթէ մեղք ալ գործեր է, պիտի ներուի անոր: 16Ձեր յանցանքները իրարու խոստովանեցէք, ու աղօթք ըրէք իրարու համար, որպէս զի բժշկուիք. արդարին ջերմեռանդ աղօթքը շատ ազդուութիւն ունի: 17Եղիա մեզի պէս կիրքերու ենթակայ մարդ մըն էր, ու աղօթք ըրաւ որ անձրև չգայ, և երեք տարի ու վեց ամիս երկրի վրայ անձրև չեկաւ: 18Եւ նորէն աղօթք ըրաւ, ու երկինք անձրև տուաւ և երկիր իր պտուղը բուսցուց: 19Եղբայրներ, եթէ ձեզմէ մէկը ճշմարտութենէն մոլորի, ու մէկը զանիկա դարձի բերէ, 20Գիտցած ըլլայ թէ ան որ մեղաւորը իր մոլորութեան ճամբայէն կը դարձնէ, հոգի մը մահուանէ կ’ազատէ, ու մեղքերու բազմութիւնը կը ծածկէ: