Զգուշացում նախապաշարումէ

1Իմ եղբայրներս, չըլլայ որ աչառութեամբ բռնէք հաւատքը մեր Տէր Յիսուս Քրիստոսի, փառաց Տէրոջ: 2Քանզի եթէ ձեր ժողովքին մէջ մարդ մը մտնելու ըլլայ, որ ունենայ ոսկի մատանի և փառաւոր հանդերձներ, հոն աղքատ մըն ալ մտնելու ըլլայ աղտոտ հանդերձներով, 3Եւ նայիք անոր վրայ որ փառաւոր հանդերձներ ունի, ու ըսէք թէ Դուն հոս նստէ պատուով, և այն աղքատին ըսէք թէ Դուն հոդ ոտքի վրայ կայնէ, կամ Եկուր նստէ պատուանդանիս քով, 4Ձեր մէջ խտրութիւններ ընող ու չար խորհուրդներու դատաւոր չէ՞ք ըլլար: 5Մտիկ ըրէք, սիրելի եղբայրներս, չէ՞ որ Աստուած աշխարհի աղքատները ընտրեց, որոնք հաւատքով հարուստ են, ու ժառանգաւոր արքայութեանը զոր զինք սիրողներուն խոստացաւ: 6Բայց դուք աղքատները անարգեցիք. Հարուստները չե՞ն որ ձեզ կը հարստահարեն, որ ձեզ դատաստանարանները կը քաշեն: 7Անոնք չե՞ն որ կը հայհոյեն այն բարի անունը որ ձեր վրայ կանչուած է: 8Արդ եթէ դուք արքունական օրէնքը կը կատարէք գիրքին ըսածին համեմատ, թէ Քու ընկերդ սիրես քու անձիդ պէս, աղէկ կ’ընէք. 9Բայց եթէ աչառութիւն կ’ընէք, մեղք կը գործէք, և օրէնքէն կը յանդիմանուիք օրինազանցներու պէս: 10Քանզի ով որ բոլոր օրէնքը պահէ, ու մէկ բանի մէջ յանցաւոր ըլլայ, անիկա ամէնուն պարտական կ’ըլլայ: 11Վասն զի ան որ ըսաւ թէ Շնութիւն մի ընէր, ըսաւ ալ թէ Մի սպանաներ. ուստի եթէ շնութիւն չընես բայց սպանութիւն ընես, օրինազանց կ’ըլլաս: 12Այնպէս խօսեցէք և այնպէս ըրէք` որպէս թէ ազատութեան օրէնքովը պիտի դատուիք: 13Վասն զի դատաս-տանը անողորմ պիտի ըլլայ անոր որ ողորմութիւն չըներ. և ողորմութիւնը կը պարծենայ դատաստանին դիմաց:

Հաւատք և գործեր

14Ի՞նչ օգուտ է, եղբայրներս, եթէ մէկը ըսէ թէ հաւատք ունի, ու գործ չունենայ. միթէ հաւատքը կրնա՞յ փրկել զանիկա: 15Եթէ եղբայր մը կամ քոյր մը մերկ ըլլայ, կամ օրուան կերակուրին կարօտ, 16Ու ձեզմէ մէկը անոնց ըսէ, Գացէք խաղաղութեամբ, տաքցէք ու կշտացէք. և մարմինին պէտք եղած բաները անոնց չտաք, ի՞նչ օգուտ է, 17Այսպէս ալ հաւատքը եթէ իրեն հետ գործ չունենայ, ըստ ինքեան մեռած է, 18Նաև կրնայ մէկը ըսել թէ Դուն հաւատք ունիս, ես ալ գործեր ունիմ. դուն քու հաւատքդ ցուցուր ինծի առանց գործերու, ու ես քեզի ցուցնեմ իմ հաւատքս իմ գործերէս: 19Դուն կը հաւատաս որ Աստուած մէկ է. աղէկ կ’ընէս. դևերն ալ կը հաւատան և կը սարսափին: 20Բայց կ’ուզե՞ս գիտնալ դուն, ով սնոտի մարդ, որ հաւատքը առանց գործերու մեռած է: 21Աբրահամ մեր հայրը գործերով չարդարացա՞ւ, երբ իր որդին Իսահակը սեղանին վրայ հանեց զոհ ընելու: 22Կը տեսնե՞ս որ հաւատքը անոր գործերուն հետ մէկտեղ գործեց, ու այն գործերով հաւատքը կատարեալ եղաւ: 23Եւ գիրքին խօսքը կատարուեցաւ, որ կ’ըսէ, Աբրահամ Աստուծոյ հաւատաց, ու այն իրեն արդարութիւն սեպուեցաւ. և ինք Աստուծոյ բարեկամ ըսուեցաւ: 24Կը տեսնէ՞ք որ մարդ գործերով կ’արդարանայ, ու ոչ թէ միայն հաւատքով: 25Նոյնպէս ալ Ռախաբ պոռնիկը չէ՞ որ գործերով արդարացաւ, երբ լրտեսները ներս առաւ, և ուրիշ ճամբայով արձակեց զանոնք: 26Քանզի ինչպէս մարմինը առանց հոգիի մեռած է, նոյնպէս ալ հաւատքը առանց գործերու մեռած է: