1Ուստի Քրիստոսի վրայով առաջին սորվելիքները ձգելով` կատարեալին գանք, առանց նորէն հիմ ձգելու մեռած գործերէն ապաշխարելու, ու առ Աստուած հաւատք ունենալու, 2Եւ մկրտութիւններուն վարդապետութեանը, ու ձեռք դնելուն, և մեռելներուն յարութեանը, ու յաւիտենական դատաստանին: 3Եւ զայս պիտի ընենք` եթէ Աստուած հրաման տայ: 4Վասն զի անհնար է մէկ անգամ լուսաւորուածներուն, որոնք երկնաւոր պարգևին համը առին, ու Հոգւոյն Սրբոյ հաղորդ եղան, 5Եւ Աստուծոյ բարի խօսքին ու գալու աշխարհին զօրութիւններուն համը առին, 6Եթէ իյնան` նորէն ապաշխարութիւնով նորոգուիլ. որովհետև կրկին Աստուծոյ Որդին խաչը կը հանեն իրենց անձին, ու կը խայտառակեն: 7Վասն զի այն երկիրը որ իր վրայ շատ անգամ եկած անձրևը կը խմէ, և արդիւնք կը բերէ պիտանի անոնց` որոնց համար կը մշակուի, Աստուծմէ օրհնութիւն կ’ընդունի. 8Բայց այն որ փուշեր ու տատասկներ կը բերէ` անպիտան է ու անէծքի մօտ, և անոր վերջը այրուիլ է: 9Իսկ մենք, սիրելիներ, ձեր վրայով լաւագոյն և փրկութեան վերաբերեալ յոյսեր ունինք, թէև այսպէս կը խօսին: 10Քանզի Աստուած անիրաւ չէ, որ ձեր գործը մոռնայ, ու այն սէրը զոր իր անուանը համար ցուցուցիք, որ սուրբերուն ծառայեցիք ու կը ծառայէք: 11Բայց մենք կը բաղձանք որ ձեզմէ ամէն մէկը նոյն ջանքը ցուցնէ յոյսին հաստատուելուն մինչև վերջը. 12Որպէս զի դուք չհեղգենաք, հապա նմանող ըլլաք անոնց որ հաւատքով ու համբերութիւնով խոստմունքները ժառանգեցին:

Աստուծոյ հաստատ խոստումը

13Վասն զի երբ Աստուած Աբրահամի խոստմունք ըրաւ, որովհետև իրմէ մեծը չկար` որ անոր վրայ երդում ընէր, 14Իր անձին վրայ երդում ըրաւ ու ըսաւ, Այո, օրհնելով պիտի օրհնեմ քեզ, ու շատցընելով պիտի շատցնեմ քեզ: 15Եւ այսպէս համբերելով խոստմունքին հասաւ: 16Քանզի մարդիկ իրենցմէ մեծին վրայ երդում կ’ընեն, ու անոնց բոլոր հակառակութեանը հաստատ վճիռ տուողը երդումն է: 17Որով Աստուած իր խորհուրդին անփոփոխ ըլլալը ա°լ աւելի ցուցնել ուզելով խոստմունքին ժառանգաւորներուն, երդումը մէջ ձգեց. 18Որպէս զի երկու անփոփոխելի բաներով, որոնցմով անկարելի է Աստուծոյ սուտ զրուցել, հաստատուն մխիթարութիւն ունենանք մենք, որ ապաստանեցանք մեր առջև դրուած յոյսը ամուր բռնելու. 19Զոր ունինք իբրև հաստատ ու անշարժ խարիսխ մը մեր անձին, որ վարագուրին ներսի կողմն ալ կը մտնէ. 20Ուր Յիսուս իբրև Առաջնորդ մտաւ մեզի համար` յաւիտենական Քահանայապետ ըլլալով Մելքիսեդեկի կարգին պէս: