Հաւատք

1Արդ հաւատքը յուսացուած բաներուն հաստատութիւնը ու չերևցած բաներուն ապացոյցն է. 2Վասն զի անով առաջինները վկայութիւն ընդունեցին: 3Հաւատքով կ’իմանանք թէ աշխարհ Աստուծոյ խօսքովը հաստատուեցաւ, ու աներևոյթ բաներէն այս երևցածները եղան: 4Հաւատքով Աբէլ Կայէնէ աւելի աղէկ զոհ մատուց Աստուծոյ, որով վկայուեցաւ արդար ըլլալը. վասն զի իր պատարագներուն վրայ Աստուծմէ վկայութիւն եղաւ իրեն. և անով, թէպէտ մեռաւ, բայց տակաւին կը խօսի: 5Հավատքով Ենովք երկրէ փոխադրուեցաւ որպէս զի մահ չտեսնէ. ու տեղ մը չէր գտնուեր, վասն զի Աստուած փոխադրեց զանիկա. քանզի անոր փոխադրուելէն առաջ վկայուեցաւ թէ Աստուծոյ հաճելի էր: 6Բայց առանց հաւատքի անհնար է Աստուծոյ հաճոյ ըլլալ. վասն զի ան որ Աստուծոյ կը մօտենայ, պէտք է որ հաւատայ թէ Աստուած կայ, և թէ վարձահատոյց կ’ըլլայ անոնց որ զինք կը փնտռեն: 7Հաւատքով Նոյ պատգամ առնելով Աստուծմէ` դեռ չերևցած բաներուն համար, վախնալով տապանը շինեց իր տունը փրկելու համար, որով աշխարհս դատապարտեց, և ժառանգաւոր եղաւ այն արդարութեանը որ հաւատքով կ’ըլլայ: 8Հաւատքով, երբ Աբրահամ կանչուեցաւ, մտիկ ըրաւ այն տեղը ելլելու, զոր ժառանգութիւն պիտի առնէր. և ելաւ գնաց, ու չէր գիտեր թէ ո°ւր կ’երթայ: 9Հաւատքով պանդխտացաւ աւետեաց երկրին մէջ որպէս թէ օտարութեան մէջ, և վրաններու մէջ բնակեցաւ Իսահակի ու Յակոբի հետ մէկտեղ, որոնք իրեն հետ ժառանգորդ էին նոյն խոստմունքին. 10Վասն զի ինք կը սպասէր այն հիմերով հաստատուած քաղաքին, որուն ճարտարապետը ու արարիչը Աստուած է: 11Հաւատքով ինք Սառա ալ որդեծնութեան սերմը առնելու զօրութիւն ընդունեց, և ատենը անցած հասակի մէջ զաւակ ծնաւ. վասն զի հաւատարիմ սեպեց զանիկա որ խոստմունքը ըրեր էր: 12Ուստի այն մէկէն ծնան, (այն ալ մեռածի պէս,) շատութեան կողմէ երկինքի աստղերուն պէս, ու ծովեզերքը եղած աւազին պէս առանց համրանքի: 13Ասոնք ամէնն ալ հաւատքով մեռան` խոստմունքները չառած, հապա հեռուէն տեսան զանոնք ու ողջունեցին, և խոստովանեցան թէ իրենք օտարներ ու պանդուխտներ են երկրի վրայ: 14Քանզի անոնք որ այսպիսի բաներ կը խօսին, յայտնի կ’ընեն թէ գաւառ մը կը փնտռեն: 15Եւ յիրաւի եթէ զանիկա յիշէին` ուրկէ որ ելան, ժանանակ ունէին հոն դառնալու: 16Բայց հիմա լաւագոյն գաւառի մը կը փափաքին, այսինքն երկնաւորին. ուստի ամօթ չսեպեր Աստուած անոնց Աստուածը ըսուիլ, վասն զի ինք անոնց քաղաք մը պատրաստեց: 17Հաւատքով Աբրահամ իր փորձուած ատենը Իսահակը պատարագ մատուց. և ան որ խոստմունքները առած էր, իր մէկ հատիկ որդին կը մատուցանէր. 18Որու ըսուեցաւ թէ Իսահակով քեզի սերունդ պիտի կոչուի. 19Քանզի կը մտածէր թէ Աստուած մեռելներէն ալ կարող է յարուցանել. ուրկէ օրինակով մը ընդունեց զանիկա: 20Հաւատքով Իսահակ գալու բաներուն համար մարգարէանալով` օրհնեց Յակոբը ու Եսաւը: 21Հաւատքով Յակոբ իր մեռնելու ատենը` Յովսէփի որդիներէն ամէն մէկը օրհնեց, ու երկրպագութիւն ըրաւ իր գաւազանին գլխուն վրայ: 22Հաւատքով Յովսէփ իր վախճանելու ատենը յիշեցուց Իսրայէլի որդիներուն Եգիպտոսէ ելլելը, ու իր ոսկորներուն համար պատուէր տուաւ: 23Հաւատքով, երբ ծնաւ Մովսէս, իր ծնողներուն ձեռքով երեք ամիս գաղտուկ պահուեցաւ. վասն զի տղան գեղեցիկ տեսան, ու չվախցան թագաւորին հրամանէն: 24Հաւատքով Մովսէս, երբ մեծցաւ, չընդունեց Փարաւոնի աղջկան որդի ըսուիլ. 25Քանզի աւելի աղէկ սեպեց Աստուծոյ ժողովուրդին հետ չարչարուիլ, քան թէ մեղքին ժամանակաւոր զուարճութիւնը վայելել. 26Եւ աւելի մեծ հարստութիւն սեպեց Քրիստոսի նախատինքը` քան թէ Եգիպտոսի գանձերը. վասն զի դիտելով կը սպասէր վարձքի հատուցումին. 27Հաւատքով Եգիպտոսը թողուց, ու չվախցաւ թագաւորին բարկութենէն. վասն զի համբերեց` որպէս թէ Անտեսանելին կը տեսնէր: 28Հաւատքով ըրաւ զատիկը և արիւն սրսկելը, որպէս զի անդրանիկները սատկեցնողը իրենց չդպչի: 29Հաւատքով Կարմիր ծովէն անցան որպէս թէ ցամաքէ. որուն փորձը ընելով Եգիպտացիները ընկղմեցան: 30Հաւատքով Երիքովի պարիսպները ինկան` եօթը օր անոնց բոլորտիքը պտըտելով: 31Հաւատքով Ռախաբ պոռնիկը անհաւատներուն հետ չկորսուեցաւ, որ լրտեսները խաղաղութեամբ ընդուներ էր: 32Եւ ալ ի՞նչ ըսեմ. վասն զի ժամանակը բաւական չէ որ պատմեմ Գեդէօնի ու Բարակի և Սամփսոնի ու Յեփթայէի և Դաւիթի ու Սամուէլի և ուրիշ մարգարէներուն համար. 33Որոնք հաւատքով թագաւորութիւններու յաղթեցին, արդարութիւն գործեցին, խոստմունքներու հասան, առիւծներու բերաններ գոցեցին, 34Կրակի զօրութիւն մարեցին, սուրի բերնէ ազատեցան, տկարութենէ ուժովցան, պատերազմի մէջ զօրաւոր եղան, օտարներու բանակներ ցրուեցին, 35Կիներ իրենց մեռելները ընդունեցին յարութիւն առած. ոմանք չարչարուեցան և չընդունեցին ազատութիւնը, որպէս զի լաւագոյն յարութեան հասնին. 36Ուրիշներ ալ նախատինքներու ու ծեծերու, նաև կապերու ու բանտերու փորձը առին. 37Քարկոծուեցան, սղոցուեցան, փորձանքի մէջ ինկան, սրով սպաննուելով մեռան, ոչխարի մորթերով ու այծի մորթերով պտըտեցան, կարօտութիւն քաշելով, նեղը իյնալով, չարչարուելով, 38(Որոնց արժանի չէր աշխարհս,) անապատներու ու լեռներու և այրերու ու երկրի խոռոչներու մէջ մոլորելով: 39Եւ ասոնք ամէնը հաւատքով վկայուած` խոստմունքը չառին. 40Քանզի Աստուած մեզի համար աւելի աղէկ բան մը նախապատրաստեց, որպէս զի անոնք առանց մեզի չկատարուին: