Հագար և Իսմայէլ

1Եւ Աբրամի կինը Սարա չէր ծնաներ անոր. ու Եգիպտացի աղախին մը ունէր որուն անունը Հագար էր: 2Եւ Սարա ըսաւ Աբրամի, Ահա հիմա Տէրը արգիլեց զիս ծնանելէն. ուրեմն աղախինիս մտիր, գուցէ անկէ զաւակ ստանամ: Եւ Աբրամ Սարայի խոսքը մտիկ ըրաւ: 3Եւ Աբրամի կինը Սարա իր Եգիպտացի աղախինը Հագարը առաւ, Աբրամի Քանանու երկրին մէջ տասը տարի բնակելէն ետքը, և զանիկա իր էրկանը Աբրամի տուաւ՝ անոր կին ըլլալու: 4Ան ալ մտաւ Հագարի, որ յղացաւ. և երբ իր յղի ըլլալը իմացաւ, իր տիկինը իր աչքին առջև անարգուեցաւ: 5Եւ Սարա ըսաւ Աբրամի, Ինծի եղած անիրաւութիւնը քու վրադ ըլլայ. ես իմ աղախինս գիրկդ տուի, ու երբ անիկա իմացաւ իր յղի ըլլալը, ես անոր աչքին առջև անարգուեցայ. Տէրը իմ ու քու մէջտեղ դատաստան ընէ: 6Եւ Աբրամ ըսաւ Սարայի, Ահա աղախինդ քու ձեռքդ է, քու աչքերուդ հաճոյ երևցածին պէս ըրէ անոր. ու երբ Սարա նեղեց զանիկա, անոր երեսէն փախաւ Հագար : 7Եւ Տէրոջը հրեշտակը գտաւ զանիկա անապատին մէջ ջուրի աղբիւրի մը քով՝ Սուրի ճանապարհին մէջ եղած աղբիւրին քով. 8Եւ ըսաւ, Ով Սարայի աղախինը Հագար, ուրկէ՞ կու գաս, և ո՞ւր կ’երթաս: Եւ անիկա ըսաւ, Իմ Սարա տիկնոջս երեսէն կը փախչիմ. 9Եւ Տէրոջը հրեշտակը ըսաւ անոր, Դարձիր քու տիկնոջդ, ու անոր ձեռքին տակ հնազանդ եղիր: 10Եւ Տէրոջը հրեշտակը ըսաւ անոր, Քու սերունդդ խիստ պիտի շատցնեմ, այնպէս որ շատութենէն պիտի չհամրուի: 11Եւ Տէրոջը հրեշտակը ըսաւ անոր, Ահա դուն յղի ես, ու որդի պիտի ծնանիս, և անոր անունը Իսմայէլ դնես. քանզի Տէրը քու տառապանքդ լսեց: 12Եւ անիկա վայրենի մարդ մը պիտի ըլլայ. անոր ձեռքը ամէնուն վրայ, ու ամէնուն ձեռքն ալ անոր վրայ պիտի ըլլայ. և անիկա իր բոլոր եղբայրներուն առջև պիտի բնակի: 13Եւ անիկա իրեն հետ խօսող Տէրոջը անունը կանչեց՝ ըսէլով , Դուն իմ տեսիլքիս մէջ երեւցած Աստուածն ես. քանզի ըսաւ, Արդեօք ո՞ղջ եմ* հոս՝ իմ տեսիլքէս ետքը: 14Անոր համար այն ջրհորին անունը Լահայրոյի ջրհոր* դրաւ. ահա անիկա Կադէսի ու Բարադի մէջտեղ է: 15Եւ Հագար որդի մը ծնաւ Աբրամի. և Աբրամ Հագարի իրեն ծնած որդւոյն անունը Իսմայէլ դրաւ: 16Եւ Աբրամ ութսունըվեց տարեկան էր, երբ Հագար Իսմայէլը ծնաւ Աբրամի: