Տաճարէն հոսող հոսանքը

1Ու զիս նորէն տանը դրանը առջև բերաւ, և ահա արևելեան կողմէն տանը սեմին տակէն ջուրեր կ’ելլէին, քանզի տանը երեսը դէպ ի արևելք էր. ու ջուրերը տանը աջ կողմին տակէն՝ սեղանին հարաւային կողմէն կ’իջնէին: 2Եւ զիս հիւսիսային դրանը ճամբայէն հանեց, ու զիս դուրսի ճամբան, դուրսի դրանը արևելք նայող ճամբան, պտըտցուց. և ահա աջ կողմէն ջուրեր կը վազէին: 3Այն մարդը որ իր ձեռքը լար ունէր, դէպ ի արևելք ելաւ, ու հազար կանգուն չափեց, և զիս ջուրերէն անցուց, ու ջուրերը մինչև գարշապարներս կ’ելլէին. 4Հազար ևս չափեց, ու զիս ջուրերէն անցուց, ու ջուրերը մինչև ծունկերս կ ’ելլէին. հազար ևս չափեց, ու զիս ջուրերէն անցուց, և ջուրերը մինչև մէջքս կ ’ելլէին. 5Նորէն հազար ալ չափեց, ու այնպիսի գետ մը եղած էր, որ չէի կրնար անցնիլ. վասն զի ջուրերը յորդեր էին, ու այնպիսի գետ մը եղեր էին, ուրկէ մարդ չէր կրնար անցնիլ՝ բայց միայն լողալով*: 6Այն ատեն ինծի ըսաւ, Տեսա՞ր, որդի մարդոյ. և զիս տարաւ ու գետին եզերքը պտըտցուց: 7Եւ քանի որ հոն կը պտըտէի, տեսայ որ գետին եզերքը մէկ կողմէն ու միւս կողմէն խիստ շատ ծառեր կային: 8Եւ ինծի ըսաւ, Այս ջուրերը արևելեան կողմը կ’ելլեն ու անապատը կ’իջնեն ու ծովը կ’երթան. և ծովը ելլելով՝ անոր ջուրերը բժշկութիւն կը գտնեն: 9Եւ գետին ամէն գացած տեղը ամէն շարժուն կենդանիները պիտի ապրին, ու ձուկերը խիստ շատ պիտի ըլլան. քանզի այս ջուրերը հոն պիտի երթան, ու գետին ամէն գացած տեղը բժշկութիւն պիտի ըլլայ, ու պիտի ապրին: 10Եւ անոր վրայ Ենգադդիէ մինչև Ենեգլայիմ ձկնորսներ պիտի կայնին, հոն ուռկաններ փռելու տեղ պիտի ըլլայ. ձուկերը տեսակ տեսակ պիտի ըլլան, մեծ ծովուն ձուկերուն պէս խիստ շատ պիտի ըլլան: 11Բայց անոր տղմալից տեղերը ու ճախինները բժշկութիւն պիտի չգտնեն, անոնք աղի համար պիտի որոշուին: 12Ու գետին եզերքը՝ մէկ կողմէն, ու միւս կողմէն ամէն տեսակ պտղաբեր ծառեր պիտի բուսնին, որոնց տերևը պիտի չթառամի ու պտուղը չհատնի. ամէն ամիս նորէն պտուղ պիտի տան, վասն զի անոր ջուրերը սրբարանէն կ’ելլեն. և անոնց պտուղը կերակուրի համար, ու տերևները բժշկութեան համար պիտի ըլլլան:

Երկրին սահմանները

13Տէր Եհովա այսպէս կ’ըսէ. Այս է երկրին սահմանը զոր դուք պիտի ժառանգէք Իսրայէլի տասուերկու ցեղերուն համեմատ. (Յովսէփ երկու բաժին պիտի ունենայ.) 14Ու զանիկա ամէն մարդ իր եղբօրը պէս պիտի ժառանգէ, վասն զի իմ ձեռքս վերցուցի որ զանիկա ձեր հայրերուն տամ. և այս երկիրը ձեզի ժառանգութիւն պիտի իյնայ: 15Ու երկրին սահմանը այս է. Հիւսիսային կողմը՝ մեծ ծովէն Եթլոնի ճամբան մինչև Սեդադ, Եմաթ, 16Բերսթա, Սիբրայիմ՝ որ Դամասկոսի սահմանին ու Եմաթի սահմանին մէջտեղ է, ու մինչև Աւրանի սահմանը եղող Ասեր-աթթիքոնը: 17Ու երկրին սահմանը ծովէն մինչև Ասար-ենան՝ որ Դամասկոսի սահմանն է դէպ ի հիւսիս, նաև Եմաթի սահմանը պիտի ըլլայ. և հիւսիսային կողմը ասիկա ըլլայ: 18Ու արևելեան կողմը՝ Աւրանի մէջէն ու Դամասկոսի մէջէն և Գաղաադի մէջէն ու Յորդանանու քով եղող Իսրայէլի երկրին մէջէն՝ սահմանէն մինչև արևելեան ծովը չափէք. ու արևելեան կողմը ասիկա ըլլայ: 19Եւ դէպ ի հարաւ հարաւային կողմը՝ Թամարէ մինչև Վիճաբանութեան ջուրերը Կադէսի մէջ՝ ու մինչև մեծ ծովը իջնող հեղեղատը պիտի ըլլայ. և դէպ ի հարաւ հարաւային կողմը ասիկա ըլլայ: 20Ու արևմտեան կողմը մեծ ծովը պիտի ըլլայ՝ սահմանէն մինչև Եմաթի դիմաց. արևմտեան կողմը ասիկա ըլլայ: 21Եւ այս երկիրը ձեզի բաժնէք Իսրայէլի ցեղերուն համեմատ, 22Ու զանիկա ժառանգութեան համար վիճակով բաժնէք՝ թէ՛ ձեզի, և թէ՛ ձեր մէջ բնակող ու ձեր մէջ զաւակներ ծնանող օտարականներուն. ու անոնք ձեզի բնակներու պէս պիտի ըլլան Իսրայէլի որդիներուն մէջ, ու անոնք ձեզի հետ ժառանգութիւն պիտի առնեն Իսրայէլի ցեղերուն մէջ: 23Եւ ո՛ր ցեղին մէջ որ օտարականը պանդխտացած է, հոն անոր ժառանգութիւնը պիտի տաք, կ’ըսէ Տէր Եհովա: