Տէրոջը ներկայութեան վրանին հաստատումը եւ նուիրումը

1Եւ Տէրը խօսեցաւ Մովսէսի՝ ըսելով, 2Առաջին ամսուն առաջին օրը կանգնես խորանը, այսինքն ժողովքի վրանը: 3Եւ անոր մէջ դնես վկայութեան տապանակը, ու վարագուրովը ծածկես տապանակը: 4Եւ սեղանը ներս բերես, ու անոր վրայ շարուելու հացերը շարես և աշտանակը ներս բերես, ու անոր ճրագները վառես: 5Եւ վկայութեան տապանակին առջև դնես խունկին ոսկի սեղանը, ու խորանին դրանը վարագոյրը դնես: 6Եւ խորանին, այսինքն ժողովքի վրանին, դրանը առջև ողջակէզի սեղանը դնես: 7Եւ ժողովքի վրանին ու սեղանին մէջտեղ դնես աւազանը, ու անոր մէջ ջուր դնես: 8Եւ շուրջանակի սրահը կանգնես. ու սրահին դրանը վարագոյրը դնես: 9Եւ օծման իւղը առնես, ու խորանը և անոր մէջ եղած ամէն բաները օծես. և զանիկա ու անոր ամէն անօթները սրբես, որպէս զի սուրբ ըլլան: 10Եւ ողջակէզի սեղանը ու անոր բոլոր գործիքները օծես, ու սեղանը սրբես. և սեղանը ամենասուրբ պիտի ըլլայ: 11Եւ աւազանը ու անոր խարիսխը օծես, ու սրբես զանիկա: 12Եւ Ահարոնը ու անոր որդիները ժողովքի խորանին դրանը մօտեցնես, ու զանոնք ջրով լուաս: 13Եւ Ահարոնի հագցնես սուրբ զգեստները, ու օծես զանիկա, և սրբես զանիկա, որպէս զի ինծի քահանայութիւն ընէ: 14Եւ անոր որդիներն ալ մօտեցնես, ու անոնց շապիկներ հագցնես: 15Եւ անոնց հայրը օծածիդ պէս օծես զանոնք, որպէս զի ինծի քահանայութիւն ընեն. և անոնց օծումը իրենց ազգերուն մէջ յաւիտենական քահանայութեան համար պիտի ըլլայ: 16Եւ Մովսէս Տէրոջը իրեն բոլոր պատուիրածին պէս ըրաւ. այնպէս ըրաւ: 17Եւ եղաւ որ երկրորդ տարին, առաջին ամսուն առաջին օրը , խորանը կանգնուեցաւ: 18Եւ Մովսէս կանգնեց խորանը, ու անոր խարիսխները դրաւ, և անոր տախտակները կանգնեց, ու անոր նիգերը անցուց, ու սիւները կանգնեց: 19Եւ խորանին վրայ տարածեց վրանը, ու վերէն վրանին ծածկոցը անոր վրայ դրաւ, ինչպէս Տէրը Մովսէսի պատուիրեր էր: 20Եւ վկայութիւնը առաւ ու տապանակին մէջ դրաւ. և ձողերը տապանակին վրայ անցուց, ու վերէն տապանակին վրայ քաւութիւնը դրաւ: 21Եւ տապանակը խորանին մէջ բերաւ, ու ծածկող վարագոյրը դրաւ, և վկայութեան տապանակը ծածկեց, ինչպէս Տէրը Մովսէսի պատուիրեր էր: 22Եւ ժողովքի վրանին մէջ, խորանին հիւսիսային կողմը, վարագուրին դուրսիդին դրաւ սեղանը. 23Եւ անոր վրայ շարուելու հացերը շարեց Տէրոջը առջև, ինչպէս Տէրը Մովսէսի պատուիրեր էր: 24Եւ ժողովքի վրանին մէջ, սեղանին դիմաց, խորանին հարաւային կողմը դրաւ աշտանակը: 25Եւ Տէրոջը առջև ճրագները վառեց, ինչպէս Տէրը Մովսէսի պատուիրեր էր: 26Եւ ժողովքի վրանին մէջ վարագուրին առջև դրաւ ոսկի սեղանը. 27Եւ անոր վրայ անուշահոտ խունկ ծխեց, ինչպէս Տէրը Մովսէսի պատուիրեր էր: 28Եւ խորանին դրանը վարագոյրը դրաւ, 29Եւ խորանին, այսինքն ժողովքի վրանին, դրանը քով ողջակէզին սեղանը դրաւ. ու անոր վրայ ողջակէզը ու հացի ընծան մատուց, ինչպէս Տէրը Մովսէսի պատուիրեր էր: 30Եւ ժողովքի վրանին ու սեղանին մէջտեղ դրաւ աւազանը, և անոր մէջ լուացուելու համար ջուր դրաւ: 31Եւ Մովսէս ու Ահարոն և անոր որդիները իրենց ձեռքերը ու ոտքերը անկէ կը լուային. 32Ժողովքի վրանը մտած ատեննին, և սեղանին մօտենալու ատեննին կը լուացուէին, ինչպէս Տէրը Մովսէսի պատուիրեր էր: 33Եւ խորանին ու սեղանին բոլորտիքը սրահը կանգնեց, և սրահին դրանը վարագոյրը դրաւ: Այսպէս Մովսէս բոլոր գործը լմնցուց:

Ամպը Տէրոջը ներկայութեան վրանին վրայ

34Եւ ամպ մը ծածկեց ժողովքի վրանը, և Տէրոջը փառքը լեցուց խորանը: 35Եւ Մովսէս չէր կրնար մտնել ժողովքի վրանը, վասն զի ամպը անոր վրայ կը կենար, ու Տէրոջը փառքը լեցուցեր էր խորանը: 36Եւ Իսրայէլի որդիները իրենց բոլոր ճամբորդութիւններուն մէջ՝ երբ ամպը խորանին վրայէն վերնար, այն ատեն կը չուէին. 37Եւ եթէ ամպը չվերնար, մինչև անոր վերնալու օրը չէին չուէր: 38Քանզի ցորեկը Տէրոջը ամպը խորանին վրայ էր, և գիշերը անոր վրայ կրակ կար, Իսրայէլի բոլոր ժողովուրդին առջև՝ իրենց ամէն ճամբորդութիւններուն մէջ: