Ուխտը կնքուած

1Եւ ըսաւ Մովսէսի, Տէրոջը ելիր դուն ու Ահարոն, Նադաբ ու Աբիուդ, և Իսրայէլի ծերերէն եօթանասուն հոգի, ու հեռուէն երկրպագութիւն ըրէք: 2Եւ միայն Մովսէս մօտենայ Տէրոջը, ու անոնք չմօտենան, ոչ ալ ժողովուրդը անոր հետ ելլէ: 3Եւ Մովսէս եկաւ, ու Տէրոջը բոլոր խօսքերը և բոլոր դատաստանները պատմեց ժողովուրդին. և բոլոր ժողովուրդը միաձայն պատասխան տուին ու ըսին, Տէրոջը զրուցած բոլոր խօսքերը պիտի ընենք: 4Եւ Մովսէս Տէրոջը բոլոր խօսքերը գրեց, ու առտուանց կանուխ ելաւ, ու լեռանը տակ սեղան մը շինեց. ու Իսրայէլի տասուերկու ցեղերուն համեմատ տասուերկու արձան կանգնեց : 5Եւ Իսրայէլի որդիներէն պատանիներ ղրկեց, ու ողջակէզներ մատուցին և խաղաղութեան զոհերու համար զուարակներ զոհեցին Տէրոջը: 6Եւ Մովսէս արիւնին կէսը առաւ ու կոնքերու մէջ դրաւ. և արիւնին կէսը սեղանին վրայ սրսկեց: 7Եւ առաւ ուխտին գիրքը ու ժողովուրդին ականջներուն կարդաց. և անոնք ըսին, Տէրոջը բոլոր ըսածը պիտի ընենք, ու անոր պիտի հնազանդինք: 8Եւ Մովսէս առաւ արիւնը, ու ժողովուրդին վրայ սրսկեց, ու ըսաւ, Ահա բոլոր այս խօսքերուն համեմատ՝ Տէրոջը ձեզի հետ ըրած ուխտին արիւնը: 9Այն ատեն Մովսէս ու Ահարոն, Նադաբ ու Աբիուդ, և Իսրայէլի ծերերէն եօթանասուն հոգի ելան. 10Եւ Իսրայէլի Աստուածը տեսան. ու անոր ոտքերուն տակ աղիւսով յատակածի պէս շափիւղայ, և պայծառութեամբ բուն երկինքին պէս էր: 11Եւ Իսրայէլի որդիներուն ընտրեալներուն վրայ իր ձեռքը չերկնցուց. և զԱստուած տեսան, ու կերան և խմեցին:

Մովսէս Սինա լեռան վրայ

12Եւ Տէրը ըսաւ Մովսէսի, Լեռը ելիր ինծի, ու հոն կայնէ, և պիտի տամ քեզի քարեղէն տախտակները ու իմ դրած օրէնքս և պատուիրնքներս՝ որպէս զի անոնց սորվեցնես: 13Եւ Մովսէս ու անոր պաշտօնեան Յեսու ելան, և Մովսէս Աստուծոյ լեռը ելաւ. 14Եւ ըսաւ ծերերուն, դուք հոս մեզի սպասեցէք, մինչև որ ձեզի դառնանք. և ահա Ահարոն ու Ովր ձեզի հետ են. եթէ մէկը դատ մը ունենայ, թող անոնց երթայ: 15Եւ Մովսէս լեռը ելաւ, ու ամպը պատեց լեռը: 16Եւ Տէրոջը փառքը Սինա լեռանը վրայ հանգչեցաւ, ու ամպը պատեց զանիկա վեց օր. և եօթներորդ օրը Տէրը ամպին մէջէն կանչեց Մովսէսը: 17Եւ Տէրոջը փառաց տեսիլքը լեռանը գագաթին վրայ մաշող կրակի պէս էր Իսրայէլի որդիներուն առջև: 18Եւ Մովսէս ամպին մէջ մտաւ ու լեռը ելաւ, և Մովսէս քառասուն օր ու քառասուն գիշեր լեռը կեցաւ: