Լոյսի մէջ ապրիլ

1Արդ Աստուծոյ նմանող եղէք սիրելի զաւակներու պէս. 2Եւ սիրով վարուեցէք, ինչպէս Քրիստոս ալ մեզ սիրեց, ու իր անձը մեզի համար մատնեց` անուշահոտ պատարագ ու զոհ ըլլալով Աստուծոյ: 3Բայց պոռնկութեան և ամէն կերպ պղծութեան կամ ագահութեան անունը անգամ չյիշուի ձեր մէջ, (ինչպէս կը վայլէ սուրբերուն,) 4Եւ գարշելի բաներ կամ յիմարական խօսքեր կամ խեղկատակութիւն, որ չվայլեր, այլ մանաւանդ գոհութիւն. 5Քանզի զայս գիտէք*, որ ամէն պոռնիկ կամ պիղծ կամ ագահ, որ կռապաշտ է, Քրիստոսի ու Աստուծոյ թագաւորութեանը մէջ ժառանգութիւն չունի: 6Չըլլայ որ մէկը ձեզ խաբէ փուճ խօսքերով. Վասն զի այս բաներուն համար Աստուծոյ բարկութիւնը կու գայ անհնազանդութեան որդիներուն վրայ: 7Ուստի անոնց հաղորդ մի ըլլաք: 8Քանզի թէև ատեն մը դուք խաւար էիք, բայց հիմա լոյս էք Տէրոջմով. լուսոյ որդիներու պէս քալեցէք. 9Վասն զի Հոգւոյն պտուղը ամէն կերպ բարութիւնով, և արդարութիւնով ու ճըշմարտութիւնով է: 10Քննեցէք ի՛նչ է Տէրոջը հաճելին. 11Ու կցորդ մի ըլլաք խաւարին անպտուղ գործերուն, այլ մանաւանդ զանոնք յանդիմանեցէք: 12Վասն զի անոնց մէջ գաղտուկ գործուած բաները խօսիլն ալ ամօթ է: 13Բայց ամէն բան յանդիմանուած` լուսով յայտնի կ’ըլլայ. վասն զի ամէն բան որ յայտնի կ’ըլլայ` լոյս է: 14Անոր համար կ’ըսէ, Արթնցիր դուն որ կը քնանաս, և կանգնէ մեռելներէն, ու Քրիստոս քեզի լոյս պիտի տայ: 15Ուստի նայեցէք թէ ի՛նչպէս զգուշութեամբ պիտի քալէք, ոչ թէ անմիտներու պէս, 16Հապա իմաստուններու պէս. ժամանակը ծախու առէք, վասն զի օրերս չար են: 17Անոր համար անմիտ մի ըլլաք, հապա իմացէք թէ ի՛նչ է Տէրոջը կամքը: 18Եւ մի գինովնաք գինիով, որուն մէջ անառակութիւն կայ, հապա Հոգիով լեցուեցէք. 19Եւ սաղմոսներով ու օրհնութիւններով և հոգևոր երգերով ձեր մէջ խօսակցելով` երգեցէք ու սաղմոս ըսէք Տէրոջը ձեր սիրտերուն մէջ: 20Ամէն ատեն ամէն բանի համար գոհութիւն տուէք Աստուծոյ ու Հօրը` մեր Տէր Յիսուս Քրիստոսի անունովը:

Կիներ և ամուսիններ

21Իրարու հնազանդ եղէք Աստուծոյ վախովը: 22Կիները իրենց այրերուն հնազանդ ըլլան` որպէս թէ Տէրոջը. 23Վասն զի այրը կնոջ գլուխն է, ինչպէս Քրիստոս ալ եկեղեցիին գլուխն է, ու ինք մարմինին Փրկիչն է: 24Ուստի ինչպէս եկեղեցին հնազանդ կ’ըլլայ Քրիստոսի, նոյնպէս ալ կիները ամէն բանի մէջ իրենց այրերուն: 25Այրեր, սիրեցէք ձեր կիները, ինչպէս Քրիստոս ալ սիրեց եկեղեցին, ու իր անձը մատնեց անոր համար. 26Որպէս զի զանիկա սրբէ ու մաքրէ աւազանին ջրովը` խօսքով. 27Որպէս զի ինք իր դիմաց փառաւոր կեցնէ եկեղեցին, որ արատ մը կամ խորշոմութիւն կամ ուրիշ ասոնց պէս բան մը չունենայ, հապա որ սուրբ ու անարատ ըլլայ: 28Նոյնպէս ալ պէտք է որ այրերը իրենց կիները սիրեն իրենց մարմիններու պէս. ան որ իր կինը կը սիրէ, իր անձը կը սիրէ. 29Վասն զի մէկը բնաւ իր անձը չատեր, հապա կը սնուցանէ ու կը խնամէ զանիկա, ինչպէս Տէրն ալ եկեղեցին. 30Վասն զի մենք անոր մարմինին անդամներն ենք, անոր մարմինէն ու անոր ոսկորներէն: 31Ասոր համար մարդը պիտի ձգէ իր հայրը ու մայրը` և իր կնոջ պիտի յարի, ու երկուքը մէկ մարմին պիտի ըլլան: 32Այս խորհուրդը մեծ է, բայց ես կը զրուցեմ Քրիստոսի ու եկեղեցիին վրայով: 33Սակայն ձեզմէ ամէն մէկն ալ իր կինը այնպէս սիրէ` որպէս թէ իր անձը, ու կինը իր այրէն ակնածութիւն ընէ: