Մարմնին միութիւնը

1Ուստի կ’աղաչեմ ձեզի ես որ Տէրոջը համար կապուած եմ, որ դուք այնպէս քալէք` ինչպէս կը վայլէ այն կոչումին որով կանչուեցաք, 2Բոլոր խոնարհութիւնով ու հեզութիւնով, երկայնմտութեամբ. սիրով իրարու ներողամիտ ըլլալով. 3Ջանալով Հոգւոյն Սրբոյ միաբանութիւնը խաղաղութեան կապովը պահել. 4Մէկ մարմին ու մէկ հոգի, ինչպէս կանչուեցաք ձեր կոչումին մէկ յուսովը. 5Տէրը մէկ է, հաւատքը մէկ, մկրտութիւնը մէկ. 6Մէկ է Աստուած և ամէնուն Հայրը, որ ամէնուն վրայ ու ամէնուն հետ և ձեր ամէնուն մէջ է: 7Բայց մեր ամէն մէկուն ալ շնորհք տրուած է Քրիստոսի պարգևին չափովը: 8Անոր համար կ’ըսէ թէ Բարձրը ելաւ, գերութիւնը գերի բռնեց ու մարդոց պարգևներ տուաւ: 9Այն Ելաւ ըսելը ի՞նչ է, միայն թէ` որ ինք առաջ երկրի վարի կողմերը իջաւ: 10Ան որ իջաւ` նոյն ինքն է, որ բոլոր երկինքներէն վեր ելաւ, որպէս զի ամէն բան լեցնէ: 11Եւ ինք մէկ քանին տուաւ առաքեալներ ըլլալու, մէկ քանին մարգարէներ, մէկ քանին աւետարանիչներ, մէկ քանին հովիւներ ու վարդապետներ. 12Սուրբերուն կատարելութեանը համար, պաշտօնին գործին համար, Քրիստոսի մարմնին շինութեանը համար. 13Մինչև ամէնս ալ հասնինք հաւատքին ու Աստուծոյ Որդին ճանչնալուն միաբանութեանը, կատարեալ մարդ ըլլալու, Քրիստոսի լման հասակին չափը ունենալու. 14Որպէս զի ա՛լ ասկէ ետև տղաք չըլլանք, երերած ու վարդապետութեան ամէն հովերէն ասդին անդին տարուբերուած` մարդոց խաբէութիւնովը, որոնք խորամանկութեամբ կը խաբեն մոլորեցնելու. 15Հապա սիրով ճշմարտութեան հետևելով` ամէն բան Անով աճեցնենք որ գլուխ է, այսինքն Քրիստոս. 16Որմէ բոլոր մարմինը մէկտեղ կազմուած, և ամէն յօդուածները իրարու հաղորդուելով կցուած` ամէն մէկ մասին չափով ներգործելով` մարմինին աճում կու տայ իրեն շինութեանը համար սիրով:

Քրիստոսով նոր կեանք

17Ուստի զայս կ’ըսեմ ու Տէրոջմով վկայութիւն կ’ընեմ, որ դուք մէյմըն ալ այնպէս չքալէք, ինչպէս ուրիշ հեթանոսները կը քալեն իրենց մտքին ունայնութեանը մէջ. 18Որոնց իմացողութիւնը խաւարած է, ու օտարացած են Աստուծոյ կեանքէն, իրենց մէջ եղած տգիտութեան պատճառաւ իրենց սրտին կուրութեանը համար. 19Որոնք անզգայ ըլլալով, ինքզինքնին անառակութեան տուին, ամէն կերպ պղծութիւն գործելու ագահութիւնով: 20Բայց դուք այսպէս չսորվեցաք Քրիստոսը, 21Եթէ անոր վրայով լսեցիք ու անկէ սորված էք, ինչպէս ճշմարտութիւնը Յիսուսի մէջ է. 22Որպէս զի ձեր վրայէն մէկդի հանէք այն ձեր առաջուան վարմունքին պէս եղած հին մարդը, խաբեբայ ցանկութիւններով ապականուածը. 23Եւ ձեր միտքին հոգիովը նորոգուիք, 24Եւ նոր մարդը ձեր վրայ հագնիք, որ Աստուծոյ պատկերին պէս ստեղծուած է արդարութիւնով ու ճշմարիտ սրբութիւնով: 25Ուստի ստութիւնը մէկդի ձգելով` ճշմարտութիւն խօսեցէք ամէն մէկդ իր ընկերին հետ, վասն զի մենք իրարու անդամներ ենք: 26Եթէ բարկանաք` մեղք մի գործէք. արևը ձեր բարկութեանը վրայ մարը չմտնէ: 27Ու ëատանայի տեղ մի տաք: 28Ան որ գողութիւն կ’ընէր, ալ թող չգողնայ. այլ մանաւանդ աղէկ գործի մը պարապելով` իր ձեռքերովը աշխատի, որպէս զի կարող ըլլայ տալ կարօտ եղողին: 29Բնաւ ձեր բերնէն ապականեալ խօսք մը չելլէ, հապա ինչ որ աղէկ է` պէտք եղած շինութեանը համար, որպէս զի լսողներուն շնորհք տայ: 30Եւ Աստուծոյ Սուրբ Հոգին մի տրտմեցնէք, որով դուք կնքուեցաք փրկութեան օրուանը համար: 31Ամէն դառնութիւն և բարկութիւն ու սրտմտութիւն և աղաղակ ու հայհոյութիւն վերցուի ձեզմէ ամէն չարութիւններով մէկտեղ: 32Եւ իրարու հետ քաղցր եղէք, գթած, ներելով իրարու, ինչպէս Աստուած Քրիստոսով ներեց ձեզի: