Պօղոսին գործը հեթանոսներուն համար

1Ուստի ես Պօղոս, Յիսուս Քրիստոսի կապուածը ձեզի հեթանոսներուդ համար. 2Դուք անշուշտ լսած էք Աստուծոյ շնորհքին տնտեսութիւնը, որ ինծի տրուած է ձեզի համար, 3Թէ ինծի այն խորհուրդը յայտնութիւնով ցուցուեցաւ. (ինչպէս առաջուընէ ալ ձեզի համառօտաբար գրեցի, 4Որով կրնաք կարդալ ու միտք առնել իմ տեղեակ ըլլալս Քրիստոսի խորհուրդին վրայով.) 5Որ ուրիշ դարերուն մէջ մարդոց որդիներուն չերևցաւ, ինչպէս հիմա Հոգւով Սրբով յայտնուեցաւ իր սուրբ առաքեալներուն ու մարգարէներուն. 6Որպէս զի հեթանոսները Քրիստոսով ժառանգակից ու մարմնակից և անոր խոստմունքին հաղորդ ըլլան աւետարանով. 7Որու ես սպասաւոր եղայ` Աստուծոյ շնորհաց պարգևին համեմատ` որ ինծի տրուեցաւ իր զօրութեան ներգործութիւնովը, 8(Ինծի` որ ամէն սուրբերուն փոքրագոյնն եմ, այս շնորհքը տրուեցաւ,) հեթանոսներուն մէջ Քրիստոսի անքննելի ճոխութիւնը քարոզելու, 9Եւ ամէնը լուսաւորելու, որպէս զի գիտնան թէ ի՛նչ է այն խորհուրդին տնօրէնութիւնը` որ ի յաւիտենից ծածկուած էր Աստուծոյ քով, որ ամէն բանը ստեղծեց. 10Որպէս զի հիմա Աստուծոյ բազմատեսակ իմաստութիւնը եկեղեցիին ձեռքով յայտնի ըլլայ երկինքը եղող իշխանութիւններուն ու պետութիւններուն, 11Իր յաւիտենական նախասահմանութեանը համեմատ, զոր ըրաւ մեր Տէրոջը Քրիստոս Յիսուսի ձեռքով. 12Որով մենք ալ համարձակութիւն ու մօտենալու արտօնութիւն ունինք վստահութեամբ` իրեն հաւատալով:

Քրիստոսին սէրը

13Ուստի կ’աղաչեմ որ չձանձրանաք իմ նեղութիւններուս պատճառաւ, որոնք ձեզի համար են, և որոնք ձեր փառքն են: 14Ասոր համար ծունկի վրայ գալով մեր Տէր Յիսուս Քրիստոսի Հօրը առջև, 15Ուրկէ ամէն ազգատոհմ երկինքի մէջ ու երկրի վրայ անուն կ’առնէ, 16Կ’աղաչեմ որ տայ ձեզի իր փառքին ճոխութեանը չափովը` զօրութիւնով հաստատուիլ իր Հոգիովը ներսի մարդուն մէջ. 17Որպէս զի Քրիստոս հաւատքով ձեր սիրտերուն մէջ բնակի, և դուք սիրով արմատացած ու հաստատուած ըլլաք, 18Որպէս զի կարենաք հասկնալ բոլոր սուրբերուն հետ մէկտեղ, թէ ի՛նչ է լայնութիւնը ու երկայնութիւնը և խորութիւնը ու բարձրութիւնը. 19Այսինքն ճանչնալ Քրիստոսի սէրը, որ գիտութենէ գերազանց է, որպէս զի լցուիք Աստուծոյ ամէն լրութիւնովը: 20Արդ անոր որ կարող է առատութեամբ ընել ամէն բաներէն աւելի՝ զոր մենք կը խնդրենք կամ կը խորհինք, այն զօրութիւնովը որ մեր մէջ կը ներգործուի, 21Իրեն փառք եկեղեցիին մէջ Քրիստոս Յիսուսով բոլոր դարերուն մէջ յաւիտեանս յաւիտենից: Ամէն: