Զգուշացում սուգի ցոյցէ

1Որովհետև դուք ձեր Տէր Աստուծոյն որդիներն էք, մեռելի համար ձեր մարմինին վրայ կտրածներ չընէք, ու ձեր աչքերուն մէջտեղի մազերը չփետէք. 2Քանզի դուն քու Տէր Աստուծոյդ սուրբ ժողովուրդն ես. և Տէրը երկրի վրայ եղած բոլոր ժողովուրդներուն մէջէն քեզ ընտրեց, որպէս զի իրեն սեպհական ժողովուրդ ըլլաս։

Մաքուր և անմաքուր կենդանիներ (Ղեւտ.11:1-47)

3Բնաւ պիղծ բան մը չուտես։ 4Ասոնք են ձեր ուտելու անասունները. արջառը, ոչխարը ու այծը, 5Եղջերուն, այծեամը, վիթը, խարբուղը, այծքաղը, յամոյրը ու անալութը։ 6Եւ չորքոտանիներուն մէջ ամէն կճղակաբաշխ (այսինքն կճղակը երկուքի բաժնուած) ու որոճացող անասունները ուտէք. 7Բայց որոճացողներէն կամ կճղակաբաշխ եղողներէն ասոնք չուտէք. ուղտը, նապաստակը ու ճագարը. քանզի ասոնք թէպէտև կ’որոճան, բայց կճղակաբաշխ չեն, անոնք ձեզի անմաքուր ըլլան։ 8Եւ խոզը, որ թէև կճղակաբաշխ է, բայց չորոճար, անիկա ձեզի անմաքուր ըլլայ։ Ասոնց միսը չուտէք, ու ասոնց դիերուն չդպչիք։ 9Ջուրերուն մէջ բոլոր եղածներէն ասոնք ուտէք. ամէն թև ու թեփ ունեցողը ուտէք, 10Բայց ամէն թև ու թեփ չունեցողը չուտէք. անիկա ձեզի անմաքուր ըլլայ։ 11Ամէն մաքուր թռչունը ուտէք։ 12Եւ ձեր չուտելու թռչունները ասոնք են. արծիւը և պասկուճը ու գետարծիւը, 13Եւ ցինը ու անգղը և ուրուրը իր տեսակին պէս, 14Ու ամէն ագռաւը իր տեսակին պէս, 15Եւ ջայլամը ու բուն և կկուն ու բազեն իր տեսակին պէս, 16Եւ հաւպատիրը ու քաջահաւը և կարապը, 17Եւ հաւալուսը ու սև անգղը և հողամաղը, 18Եւ արագիլը ու քարադրը իր տեսակին պէս, և յոպոպը ու չիղջը։ 19Եւ ամէն թռչող զեռունները ձեզի անմաքուր ըլլան. անոնք պիտի չուտուին։ 20Ամէն մաքուր թռչունները ուտէք։ 21Ինքիրմէ մեռածը բնաւ չուտէք. զանիկա քու դռներդ եղող պանդուխտին տաս որպէս զի ուտէ, կամ օտարազգիի մը ծախես. քանզի դուն քու Տէր Աստուծոյդ սուրբ ժողովուրդն ես։ Ուլը իր մօրը կաթին մէջ չեփես։

Տասանորդին օրէնքը

22Տարիէ տարի քու ցանած սերմիդ արդիւնքէն, արտէն ելած ամէն արմտիքներէն, անպատճառ տասանորդ տաս։ 23Եւ քու ցորենիդ, գինիիդ ու իւղիդ տասանորդը, ու արջառներուդ և ոչխարներուդ առջինեկները քու Տէր Աստուծոյդ առջև ուտես, այն տեղը զոր ինք իր անուանը բնակութեանը համար պիտի ընտրէ. որպէս զի միշտ քու Տէր Աստուծմէդ վախնալ սորվիս։ 24Ու եթէ քու Տէր Աստուծոյդ քեզ օրհնելուն համար ճամբան քեզի հեռու իյնայ, և այն տեղը, զոր քու Տէր Աստուածդ պիտի ընտրէ իր անունը հոն դնելու համար, քեզմէ հեռու ըլլալով կարող չըլլաս զանոնք հոն տանիլ, 25Այն ատեն զանոնք ստակ ընես, ու ստակը ծրարելով ձեռքդ առնես, և քու Տէր Աստուծոյդ ընտրելու տեղը երթաս. 26Ու այն ստակը սրտիդ բոլոր ցանկացած բաներուն, արջառներու կամ ոչխարներու, գինիի կամ օղիի, ու սրտիդ ամէն ուզած բանին տաս. և հոն քու Տէր Աստուծոյդ առջև ուտես և ուրախանաս դուն և քու ընտանիքդ։ 27Ու քու դռներդ եղող Ղեւտացին ալ զանց չընես, քանզի անիկա քեզի հետ բաժին ու ժառանգութիւն չունի։ 28Ամէն երեք տարիին վերջը այն նոյն տարիին արմտիքներուն բոլոր տասանորդը հանես, և զանիկա քու քաղաքներուդ մէջ պահես. 29Ու Ղեւտացին, որ քեզի հետ բաժին ու ժառանգութիւն չունի, և դռներդ եղող օտարականը, որբը ու որբեւարին գան և ուտեն կշտանան. որպէս զի քու Տէր Աստուածդ քեզ օրհնէ քու ձեռքիդ ըրած ամէն գործերուն մէջ։