1Պօղոս և Սիղուանոս ու Տիմոթէոս, Թեսաղոնիկեցւոց եկեղեցւոյդ մեր Հայր Աստուծով ու Տէր Յիսուս Քրիստոսով: 2Շնորհք և խաղաղութիւն ձեզի Աստուծմէ մեր Հօրմէն ու Տէր Յիսուս Քրիստոսէ:

Դատաստան՝ Քրիստոսին գալուստին ժամանակ

3Պարտիմք ամէն ատեն Աստուծմէ գոհանալ ձեզի համար, եղբայրներ, ինչպէս կը վայլէ. քանզի ձեր հաւատքը շատ աճելու վրայ է, և ձեր ամէն մէկուն սէրը իրարու վրայ կը շատնայ. 4Այնպէս որ մենք ալ ձեզմով կը պարծենանք Աստուծոյ եկեղեցիներուն մէջ` ձեր համբերութեանը ու հաւատքին համար ձեր բոլոր հալածանքներուն ու նեղութիւններուն մէջ` որոնց դուք կը համբերէք. 5Որ է Աստուծոյ արդար դատաստանին ապացոյցը` որպէս զի դուք արժանանաք Աստուծոյ թագաւորութեանը, որու համար ալ նեղութիւն կը կրէք: 6Քանզի Աստուծոյ առջև իրաւունք է` ձեզի նեղութիւն տուողներուն նեղութիւն հատուցանել, 7Եւ ձեզի նեղութիւն կրողներուդ` մեզի հետ հանգիստ, Տէր Յիսուսի երկինքէն յայտնուելու ատենը իր զօրաւոր հրեշտակներովը. 8Բորբոքած կրակով վրէժ առնելու անոնցմէ` որ զԱստուած չեն ճանչնար, և որ մեր Տէր Յիսուս Քրիստոսի աւետարանին չեն հնազանդիր. 9Որոնք պիտի պատժուին յաւիտենական սատակումով` Տէրոջը երեսէն ու անոր զօրութեանը փառքէն: 10Երբ ինք գայ փառաւորուիլ իր սուրբերուն մէջ, և հիանալի ըլլալ բոլոր հաւատացեալներուն մէջ, (վասն զի մեր վկայութիւնը ձեր մէջ հաւատացուեցաւ,) այն օրը: 11Այս պատճառաւ ալ ամէն ատեն ձեզի համար աղօթք կ’ընենք, որ մեր Աստուածը ձեզ արժանի ընէ ձեր կոչումին, և իր բարութեան բոլոր հաճութիւնը կատարէ, ու հաւատքին գործը` զօրութիւնով. 12Որպէս զի մեր Տէր Յիսուս Քրիստոսի անունը փառաւորուի ձեր մէջ, և դուք ալ անոր մէջ` մեր Աստուծոյն ու Տէր Յիսուս Քրիստոսի շնորհքին համեմատ: