Յուդայի Յովսիա թագաւորը

1Յովսիա ութ տարեկան էր երբ թագաւոր եղաւ, ու Երուսաղէմի մէջ երեսունըմէկ տարի թագաւորութիւն ըրաւ, և անոր մօրը անունը Յեդիդա էր, ու Բազկաթացի Ադայիայի աղջիկն էր: 2Եւ անիկա Տէրոջը առջև ուղղութիւն ըրաւ, ու իր հօրը Դաւիթի բոլոր ճամբուն մէջ քալեց, ու աջ կամ ձախ չխոտորեցաւ:

Օրէնքին գիրքը կը գտնուի

3Եւ Յովսիա թագաւորին տասնըութերորդ տարին թագաւորը Մեսուղամի որդւոյն Եսելիայի որդին Սափան դպիրը Տէրոջը տունը ղրկեց՝ ըսելով, 4Քեղկիա քահանայապետին գնա, ու անիկա Տէրոջը տունը բերուած ստակը թող համրէ, զոր դրան պահապանները ժողովուրդէն ժողվեցին. 5Ու զանիկա Տէրոջը տանը գործին վրայ դրուած բանուորներուն տան, ու տանը փլած տեղերը շինելու համար Տէրոջը տանը մէջի գործը բանողներուն տան զանիկա, 6Հիւսերուն, շինողներուն ու որմնադիրներուն. նաև փայտ ու տաշուած քարեր ծախու առնեն տունը նորոգելու համար: 7Բայց անոնց ձեռքը տրուած ստակին հաշիւը չէին հարցներ, քանզի անոնք հաւատարմութեամբ կը գործէին: 8Եւ Քեղկիա քահանայապետը Սափան դպիրին ըսաւ, Տէրոջը տանը մէջ օրինաց գիրք մը գտայ. ու Քեղկիա այն գիրքը Սափանի տուաւ, ու զանիկա կարդաց: 9Եւ Սափան դպիրը թագաւորին եկաւ, ու թագաւորին պատասխան բերաւ ու ըսաւ, Քու ծառաներդ տանը մէջ գտնուած ստակը հանեցին, ու Տէրոջը տանը գործին վրայ դրուած բանուորներուն ձեռքը տուին: 10Եւ Սափան դպիրը թագաւորին պատմեց ու ըսաւ, Քեղկիա քահանան ինծի գիրք մը տուաւ. և Սափան զանիկա թագաւորին առջև կարդաց: 11Ու թագաւորը օրինաց գիրքին խոսքերը լսածին պէս իր հանդերձները պատռեց: 12Եւ թագաւորը Քեղկիա քահանային ու Սափանի որդւոյն Աքիկամի ու Միքիայի որդւոյն Աքոբորի և Սափան դպիրին ու թագաւորի ծառային Ասայիայի պատուիրեց ու ըսաւ, 13Գացէք, ինծի համար ու ժողովուրդին համար ու բոլոր Յուդայի համար՝ այս գտնուած գիրքին խօսքերուն վրայով Տէրոջը հարցուցէք. քանզի մեր վրայ Տէրոջը մեծ բարկութիւնը բորբոքեր է, որովհետև մեր հայրերը այս գիրքին խօսքերուն հնազանդութիւն չըրին, ու մեզի համար ամէն գրուած բաները ի գործ չդրին: 14Ու Քեղկիա քահանան և Աքիկամ ու Աքոբոր և Սափան ու Ասայիա Արասի որդւոյն Թեկուայի որդւոյն Սեղղում հանդերձապետին կնոջ Ողդա մարգարէին գացին, ու անիկա Երուսաղէմ՝ Մասենայի մէջ կը բնակէր, ու անոր հետ խօսեցան: 15Ու անիկա ըսաւ անոնց, Իսրայէլի Տէր Աստուածը այսպէս կըսէ. Ձեզ ինծի ղրկող մարդուն այսպէս ըսէք, 16Տէրը այսպէս կ’ըսէ. Ահա ես այս տեղին ու անոր բնակիչներուն վրայ չարիք պիտի բերեմ, այսինքն Յուդայի թագաւորին կարդացած գիրքին ամէն խօսքերը. 17Որովհետև զիս թողուցին և ուրիշ աստուածներու խունկ ծխեցին, որպէս զի իրենց ձեռքերուն բոլոր գործերովը զիս բարկացնեն. ուստի այս տեղին վրայ իմ բարկութիւնս պիտի բորբոքի ու պիտի չմարի: 18Բայց Տէրոջը հարցնելու համար ձեզ ղրկող Յուդայի թագաւորին այսպէս ըսէք. Իսրայէլի Տէր Աստուածը այսպէս կ’ըսէ. 19Լսած խօսքերուդ համար, որովհետև քու սիրտդ կակղացաւ, ու Տէրոջը առջև խոնարհեցար երբ լսեցիր իմ խօսքս, թէ այս տեղին վրայ ու անոր բնակիչներուն վրայ աւերում ու անէծք պիտի ըլլայ, և քու հանդերձներդ պատռեցիր ու իմ առջեւս լացիր, ես ալ լսեցի, կ’ըսէ Տէրը: 20Անոր համար ահա ես քեզ քու հայրերուդ պիտի խառնեմ, ու խաղաղութեամբ քու գերեզմանիդ մէջ պիտի ամփոփուիս. և այս տեղին վրայ իմ բերելու բոլոր չարիքներս քու աչքերդ պիտի չտեսնեն: Ու անոնք թագաւորին պատասխան բերին: