Քրիստոնեական նուիրում

1Արդ, եղբայրներ, ձեզի կը ծանուցանենք Աստուծոյ շնորհքը, որ Մակեդոնացւոց եկեղեցիներուն տրուած է. 2Որ նեղութեան մեծ փորձին մէջ իրենց ուրախութեանը առաւելութիւնը երևցաւ, և իրենց ծանր աղքատութիւնը աւելի մեծ առատաձեռնութիւն եղաւ: 3Վասն զի ես կը վկայեմ որ իրենց կարողութեան չափովը` ու կարողութենէն ալ աւելի յօժարակամ ըլլալով, 4Շատ աղաչանքով կ’աղաչէին որ տուրքերը ու սուրբերուն համար եղած պաշտօնին մասնակցութիւնը ընդունինք: 5Եւ ոչ թէ որչափ մենք կը յուսայինք, հապա անձերնին ալ տուին առաջ Տէրոջը ու ետքը մեզի` Աստուծոյ կամքովը. 6Որ Տիտոսի աղաչեցինք թէ ինչպէս անիկա առաջուընէ սկսեց, նոյնպէս ալ ձեր մէջ կատարէ այդ շնորհքն ալ: 7Բայց ինչպէս ամէն բանով առատացած էք դուք, (հաւատքով ու խօսքով ու գիտութիւնով և ամէն ջանքով ու ձեզմէ մեր վրայ եղած սիրովը,) նայեցէք որ այդ շնորհքով ալ առատանաք. 8Ոչ թէ հրամայելով մը կը զրուցեմ, հապա ուրիշներուն ջանքին պատճառաւ, և որպէս զի փորձեմ ձեր սիրոյն հարազատութիւնը: 9Քանզի դուք գիտէք մեր Տէր Յիսուս Քրիստոսի շնորհքը, թէ ինք ձեզի համար աղքատ եղաւ` ան որ հարուստ էր, որպէս զի դուք անոր աղքատանալովը հարստանաք: 10Եւ այս բանին մէջ խրատ մը կու տամ. վասն զի ասիկա ձեր օգտին համար է, դուք որ ոչ թէ միայն ընելը, հապա կամենալն ալ առաջուընէ սկսեցիք անցած տարուընէ հետէ. 11Ուստի հիմա ընելն ալ կատարեցէք, որպէս զի ինչպէս կամքի յօժարութիւն կայ, նոյնպէս ալ ընելը ունեցածներնուդ չափովը ըլլայ: 12Վասն զի եթէ առաջ յօժարութիւնը ըլլայ` տալը ունեցածին չափովը ընդունելի է, ու ոչ թէ չունեցածին չափովը: 13Վասն զի ոչ թէ ես ուրիշներուն հանգստութիւն կ’ուզեմ ու ձեզի նեղութիւն. 14Հապա հաւասարութիւնով` հիմակուան ատենը ձեր աւելին անոնց պակսութիւնը լեցնէ, որպէս զի անոնց աւելին ալ օր մը օգնութիւն ըլլայ ձեր պակսութեանը, որպէս զի հաւասարութիւն ըլլայ. 15Ինչպէս գրուած է, թէ Ան որ շատ ժողվեց`չաւելցաւ, ու ան որ քիչ` չպակսեցաւ:

Տիտոս և իր ընկերները

16Բայց գոհութիւն Աստուծոյ, որ նոյն հոգը ձեր վրայ Տիտոսի սիրտը ձգեց. 17Վասն զի մեր աղաչանքը ընդունեց, և իր յօժարամտութիւնը շատ ըլլալով` իր կամքովը ելաւ ձեզի գալու: 18Ու անոր հետ ղրկեցինք այն եղբայրը, որուն գովութիւնը աւետարանին մէջ է` բոլոր եկեղեցիներուն մէջ: 19Եւ ոչ միայն այսքան, հապա նաև եկեղեցիներէն ընտրուեցաւ մեզի ճամբորդութեան ընկեր ըլլալու այս տուրքերուն մէջ, որ մենք կը ծառայենք Տէրոջը փառքին համար, ու ձեր յօժարութիւնովը: 20Բայց այս մասին զգուշութիւն կ’ընէինք, որ չըլլայ թէ մէկը արատ մը դնէ մեր վրայ այս առատութեանը մէջ, որու մենք կը ծառայենք: 21Քանզի ոչ թէ միայն Տէրոջը առջև, հապա մարդոց առջև ալ բարի բաներ ընելու հոգ կը տանինք: 22Եւ անոնց հետ մեր եղբայրը ղրկեցինք, զոր շատ բաներու մէջ փորձելով` շատ անգամ յօժարամիտ գտեր ենք, ու հիմա ա՛լ աւելի յօժարամիտ՝ այն մեծ վստահութիւնովը զոր ձեր վրայ ունի: 23Բայց եթէ Տիտոսի համար կը հարցնէք, անիկա իմ ընկերս է, և ձեր մէջ իմ գործակիցս. իսկ եթէ մեր եղբայրներուն համար` անոնք եկեղեցիներուն ղրկածներն են, ու Քրիստոսի փառքը: 24Ուստի ձեր սիրոյն և մեր ձեր վրայով պարծենալուն ապացոյցը ատոնց վրայ ցուցուցէք եկեղեցիներուն առջև: