Պօղոսին տեսիլքները և յայտնութիւնները

1Պարծենալ իրաւցընէ ինծի անօգուտ է. միայն թէ Տէրոջը տեսիլքներուն ու յայտնութիւններուն գամ: 2Մարդ մը գիտեմ Քրիստոսով տասնըչորս տարի առաջ, (եթէ մարմինով էր` չեմ գիտեր, և եթէ առանց մարմինի` չեմ գիտեր, Աստուած գիտէ,) որ այնպիսի մէկը յափշտակուեցաւ մինչև երրորդ երկինքը: 3Ու գիտեմ այնպիսի մարդ մը, (եթէ մարմինով և եթէ առանց մարմինի` չեմ գիտեր. Աստուած գիտէ,) 4Որ դրախտը յափշտակուեցաւ ու լսեց չպատմուելու խօսքեր, զորոնք մարդու արժան չէ խօսիլ: 5Ես այնպիսիին համար պիտի պարծենամ. բայց իմ անձիս համար պիտի չպարծենամ, հապա միայն տկարութեանս վրայ: 6Վասն զի եթէ պարծենալ ալ ուզեմ, անմիտ պիտի չըլլամ, որովհետև շիտակը պիտի զրուցեմ. բայց կը խնայեմ խօսքիս` որ չըլլայ թէ մէկը իմ վրաս աւելի համարում ունե-նայ, քան որչափ իմ վրաս կը տեսնէ կամ ինծմէ կը լսէ: 7Եւ որ չըլլայ թէ ես հպարտանամ խիստ շատ յայտնութիւններուն համար, ինծի մարմինի խայթոց մը տրուեցաւ, ëատանայի հրեշտակ մը, զիս նեղելու համար, որ չըլլայ թէ հպարտանամ: 8Ասոր համար երեք անգամ աղաչեցի Տէրոջը, որ մէկդի ընէ ինծմէ: 9Ու ըսաւ ինծի, Իմ շնորհքս հերիք է քեզի, վասն զի իմ զօրութիւնս տկարութեան մէջ կը կատարուի. ուստի մեծ յօժարութեամբ աւելի իմ տկարութիւններուս վրայ պիտի պարծենամ, որպէս զի Քրիստոսի զօրութիւնը իմ վրաս հանգչի: 10Անոր համար հաւներ եմ ես տկարութիւններու, նախատինքներու, տառապանքներու, հալածանքներու և նեղութիւններու` Քրիստոսի համար. վասն զի երբ կը տկարանամ, այն ատեն զօրաւոր եմ:

Պօղոսին հոգածութիւնը կորնթացիներուն հանդէպ

11Ես անմիտ եղայ պարծենալով. դուք ստիպեցիք զիս. վասն զի ինծի պէտք էր ձեզմէ վկայութիւն առնել, քանզի ես երևելի առաքեալներէն բանով մը պակաս չգտնուեցայ, թէև ես ոչինչ եմ: 12Յիրաւի ձեր մէջ առաքեալի նշաններ գործուեցան ամէն համբերութիւնով, նշաններով և սքանչելիքներով ու զօրութիւններով: 13Վասն զի ալ ի՞նչ կայ, որով պակաս գտնուեցաք ուրիշ եկեղեցիներէն, միայն թէ անով` որ ես ձեզի ձանձրութիւն չտուի. ներեցէք ինծի այդ յանցանքը:

Վերջին զգուշացումներն ու բարևները

14Ահա այս երրորդ անգամ է որ կը պատրաստուիմ ձեզի գալու. և ես ձեզի ձանձրութիւն պիտի չտամ, վասն զի ձեր ունեցածը չեմ փնտռեր, հապա ձեզ. որովհետև որդիները պարտաւոր չեն ծնողքներուն համար բան դիզել, հապա ծնողքները` որդիներուն համար: 15Եւ ես մեծ յօժարութեամբ ծախք պիտի ընեմ, ու ծախք պիտի ըլլամ ալ ձեր անձերուն համար, թէպէտև ձեզ աւելի սիրելովս ձեզմէ քիչ սիրուիմ ալ: 16Սակայն թող ըլլայ որ ես ձեզի ծանրութիւն մը չտուի, բայց գուցէ մէկը ըսէ թէ խորագէտ ըլլալովս նենգութեամբ ձեզ բռնեցի: 17Միթէ իմ ձեզի ղրկածներէս մէկուն ձեռքով ձեզմէ բան մը քաշեցի՞: 18Տիտոսի աղաչեցի, ու անոր հետ այն եղբայրը ղրկեցի. միթէ Տիտոս ձեզմէ բան մը քաշե՞ց. չէ՞ որ երկուքս ալ նոյն հոգիով քալեցինք, չէ՞ որ նոյն ճամբով պտըտեցանք: 19Դարձեալ, կը կարծէք որ ձեր առջև ջատագովութի՞ւն կընէնք մեր անձերուն. Աստուծոյ առջև Քրիստոսով կը խօսինք. և ամէն բան, սիրելիներ, ձեր շինութեանը համար է. 20Քանզի կը վախնամ որ չըլլայ թէ երբ գամ` ձեզ ուզածիս պէս չգտնեմ, և ես ալ ձեզի ձեր չուզածին պէս գտնուիմ. չըլլայ թէ ձեր մէջ գտնուին վէճեր, նախանձներ, սրտմտութիւններ, գրգռութիւններ, չարախօսութիւններ, բանսարկութիւններ, ամբարտաւանութիւններ, խռովութիւններ. 21Չըլլայ թէ երբ նորէն գամ, իմ Աստուածս զիս նկուն ընէ ձեր քով, ու սուգ ընեմ շատերուն համար, որոնք առաջուընէ մեղք գործեցին, ու չապաշխարեցին իրենց գործած պղծութեանը և պոռնկութեանը ու գիճութեանը վրայ: