Տաճարին համար պատրաստութիւն

1Ու պղնձէ սեղան մը շինեց, երկայնութիւնը քսան կանգուն, և լայնութիւնը քսան կանգուն ու բարձրութիւնը տասը կանգուն: 2Եւ ձուլածոյ ծովը շինեց. ու մէկ շրթունքէն մինչև միւս շրթունքը տասը կանգուն էր, ու բոլորաձև էր, և անոր բարձրութիւնը հինգ կանգուն էր, ու անոր շրջապատը երեսուն կանգուն էր. 3Եւ անոր տակ շուրջանակի ամէն կողմէն եզներու նմանութիւններ կային. ծովուն բոլորտիքը մէկ կանգունի մէջ տասնական եզներ կային. ու եզները երկու կարգ էին, որոնք ծովը ձուլած ատեննին ձուլեր էին: 4Անիկա տասուերկու եզներու վրայ կը կենար, որոնց երեքը դէպ ի հիւսիս, երեքը դէպ ի արևմուտք, երեքը դէպ ի հարաւ, ու երեքը դէպ ի արևելք կը նայէին, ու ծովը անոնց վրայ էր, և ամէնուն ետևի կողմը դէպ ի ներս դարձած էր: 5Ու անոր թանձրութիւնը չորս մատնաչափ էր, և շրթունքը գաւաթի շրթունքի պէս էր, ու վրան շուշանի ծաղիկներ շինուած էին, ու երեք հազար մար կ’առնէր: 6Եւ տասը աւազան շինեց, ու հինգը աջ կողմը ու հինգն ալ ձախ կողմը դրաւ լուացման համար. ողջակէզները անոնց մէջ կը լուային. բայց ծովը քահանաներուն համար էր, որպէս զի հոն լուացուին: 7Եւ տասը ոսկեղէն աշտանակները շինեց իրենց օրինակին համեմատ, ու զանոնք տաճարին մէջ դրաւ, հինգը աջ կողմը ու հինգը ձախ կողմը: 8Եւ տասը սեղան շինեց, ու զանոնք տաճարին մէջ դրաւ, հինգը աջ կողմը ու հինգը ձախ կողմը. ու հարիւր ոսկեղէն կոնքեր շինեց: 9Եւ քահանաներուն գաւիթը ու մեծ գաւիթը և գաւիթին դռները շինեց, ու անոնց փեղկերը պղնձով պատեց: 10Եւ ծովը աջ կողմը հարաւի դէմ դէպ ի արևելք դրաւ: 11Ու Քիրամ կաթսաները, թիակները ու կոնքերը շինեց. և Քիրամ կատարեց այն բոլոր գործերը զորոնք Աստուծոյ տանը համար Սողոմոն թագաւորին կը շինէր. 12Այսինքն երկու սիւները ու գունտերը ու երկու սիւներուն գլուխը եղող խոյակները, և սիւներուն գլուխը եղող խոյակներուն երկու գունտերը ծածկելու համար երկու ցանցակերպ զարդերը, 13Ու երկու ցանցակերպ զարդերուն չորս հարիւր նուռերը, այսինքն սիւներուն վրայի խոյակներուն երկու գունտերը ծածկելու համար՝ ամէն մէկ ցանցակերպ զարդին վրայ երկու կարգ նուռեր: 14Եւ մեքենովթները շինեց, ու մեքենովթներուն վրայի աւազանները շինեց. 15Մէկ ծովը ու անոր տակի տասուերկու եզները: 16Եւ կաթսաները ու թիակները ու մսահանները և անոնց բոլոր գործիքները՝ Տէրոջը տանը համար Սողոմոն թագաւորին՝ փայլուն պղնձէ շինեց անոր վարպետը Քիրամ: 17Թագաւորը զանոնք Յորդանանու դաշտին մէջ թանձր հողի մը վրայ ձուլել տուաւ Սոկքովթի ու Սարեդայի մէջտեղ: 18Եւ Սողոմոն այս բոլոր կարասիները խիստ շատ շինեց, քանզի պղինձը կշիռքի չէր գար: 19Ու Սողոմոն Աստուծոյ տանը բոլոր կարասիները շինեց. նաև խունկին ոսկի սեղանը, ու այն սեղանները՝ որոնց վրայ առաջաւորութեան հացը կը դրուեր, 20Եւ մաքուր ոսկիէ աշտանակները ու անոնց ճրագները, դաբիրին առջև վառելու համար ըստ սովորութեան, 21Եւ զուտ ոսկիէ ծաղիկները ու ճրագները և ունելիները, 22Ու մաքուր ոսկիէ բազմակալները, տաշտերը, խնկամանները ու բուրվառները, և տանը դռները, այսինքն սրբութեանց սրբութիւնին ներսի դրանը փեղկերը, և տանը, այսինքն տաճարին, դրանը փեղկերը ոսկիէ շինեց: