Տաճարին շինութեան պատրաստութիւնը

1Եւ Սողոմոն միտքը դրաւ* որ Տէրոջը անուանը տուն՝ ու իր թագաւորութեանը տուն շինէ: 2Ու Սողոմոն եօթանասուն հազար բեռնակիր, ու լեռը փայտ կտրող ութսուն հազար մարդ ընտրեց, և անոնց վրայ երեք հազար վեց հարիւր վերակացու դրաւ: 3Ու Սողոմոն Տիւրոսի թագաւորին Քիրամի մարդ ղրկեց, ու ըսաւ, Ինչպէս իմ հօրս Դաւիթի ըրիր, ու անոր եղևնափայտեր ղրկեցիր որպէս զի իրեն բնակելու համար տուն շինէ, 4Ահա ես իմ Տէր Աստուծոյս անուան տուն կը շինեմ, որպէս զի անոր նուիրուի, անոր առջև անուշահոտ խունկ ծխուի, ու միշտ առաջաւորութեան հացը դրուի, և առտու ու իրիկուն, շաբաթները և ամսագլուխները ու մեր Տէր Աստուծոյն տօներուն օրերը ողջակէզներ մատուցուին. ասիկա Իսրայէլի յաւիտենական պարտաւորութիւնն է: 5Եւ այս տունը զոր ես կը շինեմ, մեծ ըլլալու է. քանզի մեր Աստուածը ամէն աստուածներէն մեծ է. 6Ու անոր տուն շինելու ո՞վ կարող է. քանզի երկինք ու երկնից երկինք չեն կրնար պարունակել զանիկա. ուրեմն ես ո՞վ եմ, որ անոր տուն շինեմ. միայն թէ անոր առջև խունկ ծխելու համար տեղ պիտի պատրաստեմ: 7Եւ հիմա ինծի իմաստուն մարդ մը ղրկէ, որ ոսկին, արծաթը, պղինձը, երկաթը, ծիրանեգոյնը, կարմիրը և կապուտակը բանիլ գիտնայ, ու քանդակագործութիւն ալ գիտնայ, որպէս զի իմ քովս Յուդայի ու Երուսաղէմի մէջ եղող իմ հօրս Դաւիթի պատրաստած իմաստուններուն հետ ըլլայ: 8Եւ ինծի Լիբանանէ եղևնափայտեր, մայր փայտեր ու ալմուկ փայտեր ղրկէ. քանզի ես գիտեմ որ քու ծառաներդ Լիբանանէ փայտ կտրելը գիտեն. և ահա իմ ծառաներս քու ծառաներուդ հետ ըլլան, 9Ու ինծի խիստ շատ փայտեր պատրաստեն. քանզի իմ շինելու տունս մեծ ու փառաւոր ըլլալու է: 10Եւ ահա ես քու ծառաներուդ, փայտ կտրող բանուորներուն, քսան հազար քոռ ծեծուած ցորեն, ու քսան հազար քոռ գարի, ու քսան հազար մար գինի ու քսան հազար մար իւղ կու տամ: 11Եւ Տիւրոսի Քիրամ թագաւորը Սողոմոնի նամակ ղրկեց ու ըսաւ, Տէրը իր ժողովուրդը սիրելուն համար քեզ անոնց վրայ թագաւոր դրաւ: 12Եւ Քիրամ ըսաւ, Երկինքը ու երկիրը ստեղծող Իսրայէլի Տէր Աստուածը օրհնեալ ըլլայ, որ Դաւիթ թագաւորին խոհեմութիւն ու գիտութիւն ունեցող իմաստուն որդի մը տուաւ, որ Տէրոջը տուն, ու իր թագաւորութեանը տուն պիտի շինէ: 13Եւ հիմա իմ վարպետս Քիրամը կը ղրկեմ, որ հանճարեղ ու իմաստուն մարդ մըն է: 14Անիկա Դանի աղջիկներէն եղող կնոջ մը որդի է, ու անոր հայրը Տիւրացի է. անիկա ոսկի, արծաթ, պղինձ, երկաթ, քարեր ու փայտեր, նաև ծիրանեգոյնի, կապուտակի, բեհեզի և կարմիրի վրայ բանելու կողմանէ, ու ամէն տեսակ քանդակը քանդակելու կողմանէ յաջողակ է. և քու իմաստուններուդ հետ, ու քու հօրդ Դաւիթի, իմ տէրոջս, իմաստուններուն հետ իրեն ամէն առաջարկուած բանին հնարքը կը գտնէ: 15Եւ հիմա իմ տէրս իր ըսած ցորենը ու գարին, իւղը ու գինին իր ծառաներուն թող ղրկէ. 16Ու մենք Լիբանանէ քեզի հարակաւոր եղածին չափ փայտեր կը կտրենք, և զանոնք ծովէն լաստեր շինելով՝ Յոպպէ կը բերենք քեզի, ու դուն զանոնք Երուսաղէմ հանէ:

Տաճարին շինութիւնը կը սկսի

17Ու Սողոմոն Իսրայէլի երկրին մէջ եղող բոլոր օտարազգի մարդիկը իր հօրը Դաւիթի համրելէն ետքը համրեց. և անոնք հարիւր յիսունուիրեք հազար վեց հարիւր մարդ գտնուեցան. 18Ու անոնցմէ եօթանասուն հազար բեռնակիր, ու լեռը փայտ կտրող ութսուն հազար, ու զանոնք բանեցնելու համար երեք հազար վեց հարիւր վերակացու ըրաւ: