Քրիստոսին գալուստին պատրաստ եղէք

1Բայց այն ժամերուն ու ժամանակներուն համար, եղբայրներ, պէտք չէ բան մը գրել ձեզի. 2Քանզի դուք ինքնիրեննիդ աղէկ գիտէք` թէ Տէրոջը օրը գիշերուան գողի պէս այնպէս կը հասնի: 3Երբ ըսելու ըլլան թէ խաղաղութիւն ու ապահովութիւն է, այն ատեն կորուստը յանկարծակի անոնց վրայ պիտի հասնի յղիին երկունքին պէս, ու պիտի չազատին: 4Բայց դուք, եղբայրներ, խաւարի մէջ չէք, որ այն օրը գողի մը պէս ձեր վրայ հասնի. 5Վասն զի դուք ամէնդ լուսոյ որդիներ էք, ու ցորեկուան որդիներ. Գիշերուանը չենք, խաւարինը չենք: 6Ուրեմն չքնանանք ինչպէս ուրիշները, հապա արթուն ու զգաստ ըլլանք: 7Քանզի անոնք որ կը քնանան, գիշերը կը քնանան, և անոնք որ կ’արբենան, գիշերը կ’արբենան: 8Բայց մենք, որովհետև ցորեկուան ենք, զգաստ ըլլանք, և հաւատքի ու սիրոյ զրահը մեր վրայ հագնինք, ու փրկութեան յոյսին սաղաւարտը գլուխնիս դնենք: 9Վասն զի Աստուած մեզ բարկութեան համար չորոշեց, հապա փրկութիւն ստանալու համար մեր Տէր Յիսուս Քրիստոսի ձեռքով. 10Որ մեզի համար մեռաւ. որպէս զի թէ° արթուն ըլլանք և թէ° քնանանք, իրեն հետ մէկտեղ ապրինք: 11Անոր համար մէկզմէկ մխիթարեցէք և իրարու շինութիւն տուէք, ինչպէս կ’ընէք ալ:

Վերջին յորդորները և բարևները

12Եւ ձեզի կ’աղաչենք, եղբայրներ, որ ճանչնաք ձեր աշխատաւորները ու վերակացուները Տէրոջմով, ու ձեզի խրատ տուողները. 13Եւ զանոնք մեծապէս պատուեցէք սիրով իրենց գործին համար. իրարու հետ խաղաղութիւն ունեցէք: 14Եւ ձեզի կ’աղաչենք, եղբայրներ, անկարգ վարմունք ունեցողները խրատեցէք, վատասիրտները մխիթարեցէք, տկարներուն ձեռնտու եղէք, ամէնուն ալ երկայնամիտ եղէք: 15Զգուշացէք, չըլլայ որ մէկը չարութեան փոխարէն չարութիւն հատուցանէ մէկուն. հապա ամէն ատեն բարիք ընելու ետևէ եղէք թէ° իրարու և թէ° ամէնուն: 16Ամէն ատեն ուրախ եղէք: 17Անդադար աղօթք ըրէք: 18Ամէն բանի մէջ գոհութիւն տուէք. վասն զի այս է Աստուծոյ կամքը Քրիստոս Յիսուսով ձեր վրայ: 19Սուրբ Հոգին մի մարէք: 20Մարգարէութիւնները մի արհամարհէք: 21Ամէն բան փորձեցէք, բարին ամուր բռնեցէք: 22Ամէն տեսակ գէշ բաներէ ետ կեցէք: 23Եւ ինք խաղաղութեան Աստուածը ձեզ բոլորովին սուրբ ընէ, ու ձեր բոլոր հոգին և շունչը ու մարմինը անարատ պահուի մինչև մեր Տէր Յիսուս Քրիստոսի գալու ատենը: 24Հաւատարիմ է ան որ ձեզ կանչեց, որ պիտի կատարէ ալ: 25Եղբայրներ, աղօթք ըրէք մեզի համար: 26Բարև տուէք բոլոր եղբայրներուն սուրբ համբուրով: 27Կ’երդմնցնեմ ձեզ Տէրոջմով, որ այս թուղթը բոլոր սուրբ եղբայրներուն կարդացուի: 28Մեր Տէր Յիսուս Քրիստոսի շնորհքը ձեզի հետ ըլլայ: Ամէն: