Ուխտին տապանակը փղշտացիներուն մէջ

1Եւ Փղշտացիք Աստուծոյ տապանակը առին, ու զանիկա Աբենեզերէ Ազովտոս տարին: 2Եւ Փղշտացիք Աստուծոյ տապանակը առին, ու զանիկա Դագոնի տունը տարին, և Դագոնի քով դրին: 3Ու հետեւեալ օրը Ազովտացիք առաւօտուն կանուխ ելլելով, տեսան որ Դագոն Տէրոջը տապանակին առջև երեսի վրայ գետինը ինկեր էր. ու անոնք Դագոնը վերցուցին իր տեղը դրին: 4Եւ հետեւեալ օրը դարձեալ առաւօտուն կանուխ ելան, ու տեսան որ Դագոն Տէրոջը տապանակին առջև երեսի վրայ գետինը ինկեր էր, և Դագոնի գլուխը ու ձեռքերուն երկու թաթերը կոտրած՝ ու սեմին վրայ ինկած էր, և միայն Դագոնի մարմինը* մնացեր էր: 5(Այս պատճառաւ Դագոնի քուրմերը ու Դագոնի տունը բոլոր մտնողները մինչև այսօր Ազովտոս եղող Դագոնի սեմին վրայ չեն կոխեր:) 6Անկէ ետև Տէրոջը ձեռքը Ազովտացւոց վրայ ծանրացաւ, ու զանոնք կորսնցուց, և զանոնք Ազովտոսի ու անոր սահմաններուն մէջ թանչքի ուռեցքներով զարկաւ: 7Եւ Ազովտոսի բնակիչները այսպէս ըլլալը տեսնելով՝ ըսին, Իսրայէլի Աստուծոյն տապանակը մեր քով չկենայ. քանզի անոր ձեռքը մեր վրայ ու մեր աստուծոյն Դագոնի վրայ ծանրացաւ: 8Եւ մարդ ղրկեցին, ու Փղշտացւոց բոլոր նախարարները իրենց քով ժողվեցին, ու ըսին, Իսրայէլի Աստուծոյն տապանակը ի՞նչ ընենք. ու ըսին, Իսրայէլի Աստուծոյ տապանակը Գէթ փոխադրուի: Ու Իսրայէլի Աստուծոյն տապանակը Գէթ փոխադրեցին: 9Եւ զանիկա հոն փոխադրելէ ետքը, Տէրոջը ձեռքը այն քաղաքին վրայ ըլլալով՝ մեծ խռովութիւն եղաւ. ու քաղաքին մարդիկը պզտիկէն մինչև մեծը զարկաւ. և անոնց վրայ թանչքի ուռեցքներ երեւցան: 10Եւ Աստուծոյ տապանակը Ակկարոն ղրկեցին. ու երբ Աստուծոյ տապանակը Ակկարոն մտաւ, Ակկարոնացիք կանչուըռտելով ըսին, Իսրայէլի Աստուծոյն տապանակը մեզի բերին՝ որպէս զի մեզ ու մեր ժողովուրդը մեռցնեն: 11Եւ մարդ ղրկելով՝ Փղշտացւոց բոլոր նախարարները ժողվեցին, ու ըսին, Իսրայէլի Աստուծոյն տապանակը թող տուէք երթայ և իր տեղը դառնայ, որպէս զի մեզ ու մեր ժողովուրդը չմեռցնէ. քանզի բոլոր քաղաքին մէջ մահառիթ սոսկում մը կար, ու հոն Աստուծոյ ձեռքը խիստ ծանրացեր էր: 12Եւ չմեռած մարդիկը թանչքի ուռեցքներով զարնուեցան, ու քաղաքին աղաղակը երկինք ելաւ: