Աստուծոյ որդիները

1Տէսեք, Հայրը ի՛նչպիսի սէր շնորհեց մեզի, որպէս զի մենք Աստուծոյ որդիներ ըսուինք. ասոր համար աշխարհ մեզ չճանչնար, վասն զի զանիկա ալ չճանչցաւ։ 2Սիրելիներ, հիմա մենք Աստուծոյ որդիներն ենք, և տակաւին յայտնի չէ թէ ի՛նչ պիտի ըլլանք. բայց գիտենք որ երբ անիկա յայտնուի, անոր պէս պիտի ըլլանք, վասն զի զանիկա պիտի տեսնենք՝ ինչպէս է։ 3Եւ ամէն ով որ այս յոյսը անոր վրայ ունի, ինքզինք կը մաքրէ, ինչպէս անիկա մաքուր է։ 4Ամէն ով որ մեղք կը գործէ, անիկա անօրէնթիւն ալ կը գործէ, և բուն մեղքը անօրէնութիւն է։ 5Եւ գիտէք որ անիկա անոր համար յայտնուեցաւ, որ մեր մեղքերը վերցնէ. ու իր մէջ մեղք չկայ։ 6Ամէն ով որ անոր մէջ կը կենայ, մեղք չգործեր, ամէն ով որ մեղք կը գործէ, զանիկա տեսած չէ ու զանիկա ճանչցած չէ։ 7Որդեակներ, մէկը ձեզ չխաբէ. ան որ արդարութիւն կը գործէ, արդար է, ինչպէս Անիկա արդար է։ 8Եւ ան որ մեղք կը գործէ, սատանայ է, վասն զի սատանայ սկիզբէն ի վեր կը մեղանչէ. ասոր համար Աստուծոյ Որդին յայտնուեցաւ, որ սատանայի գործերը քակէ։ 9Ամէն ով որ Աստուծմէ ծնած է, մեղք չգործեր, վասն զի անոր սերմը իր մէջ կը մնայ, ու չկրնար մեղք գործել, քանզի Աստուծմէ ծնած է։ 10Ասով յայտնի են Աստուծոյ որդիները ու սատանայի որդիները։ Ամէն ով որ արդարութիւն չգործեր, անիկա Աստուծմէ չէ, և ան ալ՝ որ իր եղբայրը չսիրեր։

Մէկզմէկ սիրել

11Վասն զի ասիկա այն պատուիրանքն է զոր դուք սկիզբէն լսեցիք, որ մէկզմէկ սիրենք։ 12Ոչ թէ Կայէնի պէս որ չարէն էր, ու իր եղբայրը սպաննեց. և ինչո՞ւ համար զանիկա սպաննեց. անոր համար որ իր գործերը չար էին, ու իր եղբօրը գործերը՝ արդար։ 13Մի զարմանաք, եղբայրներս, եթէ աշխարհ ձեզ ատէ։ 14Մենք գիտենք որ մահէն կեանքի փոխուեցանք, վասն զի եղբայրները կը սիրենք. ան որ եղբայրը չսիրեր՝ մահուան մէջ կը մնայ: 15Ամէն ով որ իր եղբայրը կ’ատէ մարդասպան է, ու գիտէք որ ամէն մարդասպան իր մէջ բնակած յաւիտենական կեանք չունի։ 16Ասով գիտցանք Քրիստոսի սէրը, որ անիկա իր կեանքը մեզի համար դրաւ. մենք ալ պարտաւոր ենք մեր եղբայրներուն համար դնել մեր կեանքը։ 17Բայց ան որ աշխարհի բարիքը ունի, և իր եղբայրը բանի մը կարօտ կը տեսնէ ու իր գութը անկէ կը գոցէ, ի՞նչպէս Աստուծոյ սէրը անոր մէջ բնակած կ’ըլլայ։ 18Որդեակներս, ոչ թէ խօսքով ու լեզուով սիրենք, հապա գործով ու ճշմարտութիւնով։

Համարձակութիւն Աստուծոյ առջև

19Եւ ասով կը ճանչնանք թէ ճշմարտութենէն ենք, ու մեր սիրտերուն համարձակութիւնովը անոր առջև պիտի երևնանք։ 20Քանզի եթէ մեր սիրտերը մեզ կը մեղադրեն, հապա Աստուած մեր սիրտերէն մեծ է՝ և ամէն բան գիտէ։ 21Սիրելիներ, եթէ մեր սիրտերը մեզ չմեղադրեն, համարձակութիւն կ’ունենանք Աստուծոյ առջև: 22Եւ ինչ որ խնդրենք՝ կառնենք անկէ, վասն զի իր պատուիրանքները կը պահենք, ու իր առջև հաճոյ եղած բաները կ’ընենք։ 23Եւ ասիկա է անոր պատուիրանքը, որ իր Որդւոյն Յիսուս Քրիստոսի անուանը հաւատանք ու մէկզմէկ սիրենք, ինչպէս մեզի պատուեր տուաւ։ 24Եւ ան որ անոր պատուիրանքները կը պահէ՝ անոր մէջ կը կենայ, ու անիկա ալ ասոր մէջ. և ասկէ գիտենք որ անիկա մեր մէջ կը կենայ, այսինքն այն Հոգիէն զոր մեզի տուաւ։