Քրիստոսին առաքեալները

1Թող մարդիկ մեզ այսպէս սեպեն, որպէս թէ Քրիստոսի սպասաւորները ու Աստուծոյ խորհուրդներուն տնտեսները: 2Ուստի տնտեսներուն մէջ կը փնտռուի որ մէկը հաւատարիմ գտնուի: 3Բայց ինծի ասիկա ոչինչ բան մըն է, որ ձեզմէ դատուիմ, կամ մարդոց դատողութենէն, մանաւանդ որ ես ալ իմ անձս չեմ դատեր. 4(Վասն զի ես իմ անձիս վրայով բան մը չեմ գիտեր. բայց ոչ թէ ասով կ’արդարանամ.) հապա զիս դատողը Տէրն է: 5Ուրեմն ժամանակէն առաջ դատողութիւն մի ընէք, մինչև գայ Տէրը` որ խաւարին գաղտնիքը ի լոյս պիտի հանէ, ու սիրտերուն խորհուրդները յայտնի պիտի ընէ. և այն ատեն ամէն մէկուն գովութիւնը Աստուծմէ պիտի ըլլայ: 6Ասոնք օրինակ բերի, եղբայրներ, իմ վրաս ու Ապողոսի վրայ ձեզի համար, որպէս զի դուք մեզմէ սորվիք մարդոց վրայով գրուածէն աւելի բան մը չխորհիլ, որ չըլլայ թէ ձեզմէ մէկը հպարտանայ մէկուն համար ուրիշի մը դէմ: 7Քանզի ո՞վ է ան որ քեզ տարբեր կ’ընէ ուրիշներէն. և ի՞նչ ունիս զոր չես առեր դուն. և եթէ առիր, ինչո՞ւ չառածի պէս կը պարծենաս: 8Արդէն կշտացած էք, արդէն հարուստցաք, առանց մեզի թագաւորեցիք. և երանի՜ թէ թագաւորէիք. որպէս զի մենք ալ ձեզի հետ թագաւորէինք: 9Քանզի կարծեմ թէ Աստուած յետիններ ըրաւ մեզ առաքեալներս մահապարտներու նման. վասն զի տեսարան եղանք աշխարհի և հրեշտակներուն ու մարդոց: 10Մենք յիմարներ ենք Քրիստոսի համար, և դուք իմաստուններ` Քրիստոսով. մենք տկար` և դուք զօրաւոր. դուք փառաւորեալ` ու մենք անարգեալ: 11Մինչև այսօրուան ատեն կ’անօթենանք ալ, կը ծարաւինք ալ, մերկ ալ կը մնանք, կը ծեծուինք ալ, աստանդական ալ կը պտըտինք, 12Եւ մեր ձեռքերով գործելով կ’աշխատինք. երբ մեզ կը նախատեն` կ’օրհնենք. երբ կը հալածեն` կը համբերենք. 13Երբ գէշ կը խօսին` կ’աղաչենք. իբրև աշխարհի աղտեղութիւնը` ամէնուն անարգը ըլլալով մինչև հիմա: 14Այս բաները կը գրեմ` ոչ թէ ձեզ ամչցնելու համար, հապա կը խրատեմ ձեզ սիրելի որդիներուս պէս: 15Վասն զի թէև դուք տասը հազար վարժապետներ ունենաք Քրիստոսով, բայց ոչ թէ շատ հայրեր ունիք, վասն զի Քրիստոս Յիսուսով ես ձեզ ծնայ աւետարանովը: 16Ուրեմն կ’աղաչեմ ձեզի, ինծի նմանող եղէք: 17Ասոր համար ձեզի ղրկեցի Տիմոթէոսը, որ իմ սիրելի որդիս է, ու Տէրոջմով հաւատարիմ. որ ձեր միտքը պիտի ձգէ Քրիստոսով իմ բռնած ճամբաներս, ինչպէս ամէն տեղ ամէն եկեղեցիներուն մէջ կը սորվեցնեմ: 18Մէկ քանիները հպարտացան, որպէս թէ ես պիտի չգամ ձեզի: 19Բայց շուտով պիտի գամ ձեզի, եթէ Տէրը կամենայ, և պիտի հասկնամ ոչ թէ հպարտացողներուն խօսքերը, հապա զօրութիւնը: 20Վասն զի Աստուծոյ թագաւորութիւնը ոչ թէ խօսքով է, հապա զօրութիւնով: 21Ի՞նչպէս կ’ուզէք. գաւազանո՞վ գամ ձեզի, թէ սիրով և հեզութեան հոգիով: