Քրիստոսին յարութիւնը

1Եղբայրներ, ձեզի կ’իմացնեմ այն աւետարանը զոր ես ձեզի քարոզեցի, զոր նաև ընդունեցիք ու անոր վրայ հաստատուած էք. 2Որով կը փրկուիք ալ, եթէ ամուր բռնէք այն խօսքը զոր ես ձեզի քարոզեցի, միայն եթէ պարապ տեղ հաւատացած չէք: 3Վասն զի ամէնէն առաջ ես ձեզի աւանդեցի զանիկա, զոր ես ալ ընդունեցի, թէ Քրիստոս մեր մեղքերուն համար մեռաւ, գիրքերուն ըսածին համեմատ, 4Եւ թէ թաղուեցաւ ու յարութիւն առաւ երրորդ օրը, գիրքերուն ըսածին համեմատ, 5Եւ թէ երևցաւ Կեփասի, ու ետքը տասուերկուքին. 6Ետքը հինգ հարիւրէ աւելի եղբայրներուն մէկտեղ երևցաւ, որոնցմէ շատերը մինչև հիմա կան, և ոմանք ալ ննջեցին. 7Ու ետքը երևցաւ Յակոբոսի, ետքը բոլոր առաքեալներուն: 8Ամէնէն ետքը որպէս թէ վիժածի մը` ինծի ալ երևցաւ: 9Վասն զի ես առաքեալներուն ամէնէն յետինն եմ, որ արժանի ալ չեմ առաքեալ ըսուելու, վասն զի Աստուծոյ եկեղեցին հալածեցի: 10Միայն թէ Աստուծոյ շնորհքովն եմ՝ ինչ որ եմ. և անոր շնորհքը որ իմ վրաս է, պարապ բան մը չեղաւ, հապա ես անոնց ամէնէն աւելի աշխատեցայ. և ոչ թէ ես, հապա Աստուծոյ շնորհքը որ ինծի հետ էր: 11Ուստի թէ° ես և թէ° անոնք այսպէս կը քարոզենք, ու դուք այսպէս հաւատացիք:

Մեր յարութիւնը

12Ուրեմն եթէ Քրիստոս կը քարոզուի, որ մեռելներէն յարութիւն առած է, ի՞նչպէս ձեզմէ մէկ քանիները կ’ըսեն թէ Մեռելներու յարութիւն չկայ: 13Եթէ մեռելներու յարութիւն չկայ, ուրեմն Քրիստոս ալ յարութիւն առած չէ: 14Եւ եթէ Քրիստոս յարութիւն առած չէ, ուրեմն մեր քարոզութիւնը պարապ է, ու ձեր հաւատքն ալ պարապ է. 15Եւ մենք ալ Աստուծոյ սուտ վկաները գտնուած կ’ըլլանք. որովհետև Աստուծոյ համար վկայութիւն տուինք, թէ Ինք մեռելներէն յարուց Քրիստոսը. որ իրաւ չյարուց զանիկա, եթէ մեռելները յարութիւն չեն առներ: 16Քանզի եթէ մեռելները յարութիւն չեն առներ, Քրիստոս ալ յարութիւն առած չէ. 17Եւ եթէ Քրիստոս յարութիւն առած չէ, ձեր հաւատքը պարապ է, ու տակաւին ձեր մեղքերուն մէջ էք. 18Նոյնպէս Քրիստոսով ննջողներն ալ կորսուած են: 19Եթէ միայն այս կեանքին համար Քրիստոսի յուսացած ենք, մենք բոլոր մարդոցմէն աւելի խղճալի ենք: 20Բայց հիմա Քրիստոս մեռելներէն յարութիւն առած է, ննջեցեալներուն առաջին պտուղը: 21Քանզի որովհետև մարդով եղաւ մահը, մարդով ալ մեռելներու յարութիւնը: 22Վասն զի ինչպէս Ադամով ամէնը կը մեռնին, նոյնպէս ալ Քրիստոսով ամէնը կենդանի պիտի ըլլան. 23Բայց ամէն մէկը իր կարգովը. առաջին պտուղը Քրիստոս, ետքը Քրիստոսիները` իր գալու ատենը. 24Անկէ ետև կուգայ վախճանը, երբ թագաւորութիւնը պիտի տայ Աստուծոյ ու Հօրը ձեռքը, երբ խափանէ ամէն իշխանութիւնը և ամէն պետութիւնը ու զօրութիւնը: 25Վասն զի անոր պէտք է թագաւորութիւն ընել` մինչև բոլոր թշնամիները իր ոտքերուն տակ դնէ: 26Վերջին թշնամին որ պիտի խափանի` մահն է. վասն զի գիրքը կ’ըսէ, Ամէն բան անոր ոտքերուն տակ հնազանդեցուց. 27Բայց երբ կ’ըսէ թէ Ամէն բան անոր հնազանդած է, յայտնի է թէ բաց ի անկէ` որ ամէնը անոր հնազանդեցուց: 28Ու երբ ամէնը անոր հնազանդ ըլլայ, այն ատեն Որդին ինք ալ պիտի հնազանդի անոր` որ իրեն հնազանդեցուց ամէնը, որպէս զի Աստուած ըլլայ ամէնը ամէն բանի մէջ: 29Ապա թէ ոչ` ի՞նչ պիտի ընեն անոնք որ մեռելներուն համար կը մկրտուին, եթէ մեռելները բնաւ յարութիւն չառնեն. ինչո՞ւ ուրեմն անոնց համար կը մկրտուին. 30Ինչո՞ւ համար մենք ալ վտանգի մէջ կը մտնենք ամէն ժամ: 31Վկայ կը բերեմ այն պարծանքը` զոր ձեր վրայ ունիմ Քրիստոս Յիսուս մեր Տէրոջմով, որ ես ամէն օր կը մեռնիմ: 32Եթէ Եփեսոսի մէջ մարդոց նման գազաններու հետ մարտնչեցայ, ի՞նչ օգուտ է ինծի, եթէ մեռելները յարութիւն չառնեն. ուտենք ու խմենք, վասն զի վաղը կը մեռնինք: 33Մի խաբուիք. չար ընկերակցութիւնները աղէկ բարքը կ’ապականեն: 34Արդարութիւնով զգաստացէք ու մեղք մի գործէք, վասն զի ձէզմէ ոմանք Աստուծոյ գիտութիւնը չունին. ձեզ ամչցնելու համար կը զրուցեմ:

Յարեալ մարմինը

35Բայց պիտի ըսէ մէկը թէ Ի՞նչպէս մեռելները յարութիւն կ’առնեն, կամ թէ ի՞նչ մարմնով կու գան: 36Անմիտ, անիկա զոր դուն կը սերմանես, եթէ չմեռնի` չկենդանանար. 37Ու զայն որ կը սերմանես, ոչ թէ այն մարմինը որ պիտի բուսնի` կը սերմանես, հապա մերկ հատ մը` թէ° ցորենի ըլլայ և թէ° մէկ ուրիշ սերմի. 38Ու Աստուած անոր մարմին կու տայ ինչպէս կ’ուզէ, և ամէն մէկ սերմին իր յատուկ մարմինը: 39Ամէն մարմին մէկ մարմին չէ. հապա մարդոց մարմինը ուրիշ է, ու անասուններուն մարմինը ուրիշ, ձուկերունն ալ ուրիշ, և թռչուններունը ուրիշ: 40Երկնաւոր մարմիններ ալ կան, երկրաւոր մարմիններ ալ, բայց երկնաւորներուն փառքը ուրիշ է, ու երկրաւորներունը ուրիշ: 41Արևուն փառքը ուրիշ է, ու լուսնին փառքը ուրիշ, և աստղերուն փառքը ուրիշ. ու մէկ աստղը միւս աստղէն տարբեր է փառքով: 42Այսպէս է մեռելներուն յարութիւնն ալ. մարմինը ապականութիւնով կը սերմանուի, ու անապականութիւնով յարութիւն կ’առնէ. 43Անարգութիւնով կը սերմանուի, ու փառքով յարութիւն կ’առնէ. տկարութիւնով կը սերմանուի, ու զօրութիւնով յարութիւն կ’առնէ. 44Կը սերմանուի շնչաւոր մարմին, և յարութիւն կ’առնէ հոգևոր մարմին. շնչաւոր մարմին կայ, հոգևոր մարմին ալ կայ: 45Եւ այսպէս գրուած է, Առաջին մարդը Ադամ կենդանի շունչ եղաւ, վերջին Ադամը` կենդանարար հոգի: 46Բայց ոչ թէ առաջ հոգևորը, հապա շնչաւորը, ու ետքը հոգևորը: 47Առաջին մարդը երկրէ է` հողեղէն, բայց երկրորդ մարդը Տէր է` երկինքէ: 48Ինչպէս էր հողեղէնը` նոյնպէս ալ հողեղէնները, ու ինչպէս երկնաւորը` նոյնպէս ալ երկնաւորները. 49Եւ ինչպէս հողեղէնին կերպարանքը հագեր ենք, երկնաւորին կերպարանքն ալ պիտի հագնինք: 50Բայց զայս կ’ըսեմ, եղբայրներ, որ մարմին ու արիւն Աստուծոյ թագաւորութիւնը չեն կրնար ժառանգել. ոչ ալ ապականութիւնը կը ժառանգէ անապականութիւն: 51Ահա ձեզի խորհուրդ մը կը զրուցեմ. Ամէնս պիտի չննջենք, բայց ամէնս ալ պիտի փոխուինք, 52Յանկարծակի աչք գոցել բանալու մէջ` վերջին փողին հնչուելու ատենը. որովհետև փողը պիտի հնչուի, ու մեռելները յարութիւն պիտի առնեն առանց ապականութեան, և մենք ալ պիտի փոխուինք: 53Վասն զի պէտք է որ այս ապականացու մարմինը անապականութիւն հագնի, ու այս մահկանացուն անմահութիւն հագնի: 54Բայց երբ այս ապականացու մարմինը անապականութիւն հագնի, և այս մահկանացուն անմահութիւն հագնի, այն ատեն պիտի կատարուի այն խօսքը որ գրուեցաւ թէ Մահը յաղթութեան մէջ ընկղմեցաւ: 55Ո՞ւր է, ով մահ, քու խայթոցդ. ո՞ւր է, ով գերեզման, քու յաղթութիւնդ: 56Մահուան խայթոցը մեղքն է, ու մեղքին ոյժը` օրէնքը: 57Բայց գոհութիւն Աստուծոյ, որ մեզի յաղթութիւն կու տայ մեր Տէր Յիսուս Քրիստոսի ձեռքով: 58Ուստի, իմ սիրելի եղբայրներս, հաստատ եղէք, անշարժ կեցէք և ամէն ատեն աւելցէք Տէրոջը գործին մէջ, գիտնալով որ ձեր աշխատութիւնը պարապ չէ Տէրոջմով: