Պաշտամունքի ատեն գլուխը ծածկել

1Ինծի նմանող եղէք, ինչպէս ես ալ Քրիստոսի: 2Արդ ձեզ կը գովեմ, եղբայրներ, որ ամէն բանի մէջ զիս կը յիշէք, ու ապսպրածներս կը բռնէք` ինչպէս ես ձեզի աւանդեցի: 3Բայց կ’ուզեմ որ գիտնաք թէ ամէն այր մարդու գլուխը Քրիստոս է, ու կնոջ գլուխը` այր մարդը, և Քրիստոսի գլուխը` Աստուած: 4Ամէն այր մարդ որ գլուխը գոց աղօթքի կը կայնի կամ մարգարէութիւն կ’ընէ, անպատիւ կ’ընէ իր գլուխը: 5Եւ ամէն կին որ գլուխը բաց աղօթքի կը կայնի կամ մարգարէութիւն կ’ընէ, անպատիւ կ’ընէ իր գլուխը. Վասն զի միևնոյն բան կը սեպուի որպէս թէ ածիլուած էր: 6Վասն զի եթէ կինը չծածկուիր, թող իր մազերն ալ կտրէ. իսկ եթէ ամօթ է կնոջ մը իր մազերը կտրել կամ ածիլուիլ, թող ծածկուի: 7Այր մարդու պէտք չէ իր գլուխը ծածկել, վասն զի Աստուծոյ պատկերը ու փառքն է. բայց կինը իր էրկանը փառքն է: 8Քանզի ոչ թէ այր մարդը կնոջմէն է, հապա կինը` այր մարդէն: 9Վասն զի այր մարդը չստեղծուեցաւ կնոջը համար, հապա կինը` էրկանը համար: 10Այս պատճառաւ պէտք է որ կինը իր գլխուն շուք դնէ հրեշտակներուն համար: 11Բայց ոչ կինը առանց այր մարդու կ’ըլլայ, ու ոչ այր մարդը առանց կնոջ` Տէրոջմով: 12Վասն զի ինչպէս կինը այր մարդէն է, նոյնպէս այր մարդը կնոջ միջոցաւ, բայց ամէնը Աստուծմէ: 13Դուք ձեզմէ դատեցէք. կը վայլէ՞ կին մարդու գլուխը բաց աղօթքի կայնիլ Աստուծոյ առջև. 14Չէ՞ որ բնութիւնն ալ կը սորվեցնէ ձեզի որ այր մարդ մը եթէ երկար մազերով է, իրեն անարգանք է. 15Բայց կինը եթէ երկար մազերով է, իրեն փառք է. վասն զի մազերը ծածկոցի տեղ տրուած են իրեն: 16Սակայն եթէ մէկը հակառակող ըլլալ կ’ուզէ, մենք այնպիսի սովորութիւն չունինք, ոչ ալ Աստուծոյ եկեղեցիները:

Տէրոջը ընթրիքը

17Բայց զայս պատուիրելով ձեզ չեմ գովեր, վասն զի ձեր ժողվուիլը ոչ թէ աղէկ` հապա գէշ արդիւնք կ’ունենայ: 18Քանզի նախ` երբ մէկտեղ կը ժողվուիք եկեղեցիին մէջ, կը լսեմ որ բաժանմունքներ կան ձեր մէջ, և ըստ մասին կը հաւատամ: 19Վասն զի հարկաւ ձեր մէջ հերձուածողութիւններ ալ պիտի ըլլան, որպէս զի ձեր մէջ եղող ընտիրները երևան: 20Ուստի դուք որ մէկտեղ կը ժողվուիք, ատիկա Տէրունական ընթրիքը ուտել չէ. 21Վասն զի ուտելու ատեն ամէն մէկը առաջ իր ընթրիքը կ’առնէ. ու մէկը անօթի կը մնայ ու միւսը կը գինովնայ: 22Միթէ ուտելու և խմելու համար տուն չունի՞ք, կամ թէ Աստուծոյ եկեղեցի՞ն կ’անարգէք, և ամօթով կ’ընէք չքաւորները. ձեզի ի՞նչ ըսեմ, ձեզ գովե՞մ. այդ բանին մէջ չեմ գովեր: 23Վասն զի ես Տէրոջմէն ընդունեցի զայն որ ձեզի ալ աւանդեցի` թէ Տէր Յիսուս իր մատնուած գիշերը հաց առաւ. 24Եւ գոհանալով` կտրեց ու ըսաւ, Առէք ու կերէք, այս է իմ մարմինս որ ձեզի համար կը կտրուի. ասիկա ըրէք զիս յիշելու համար: 25Նոյնպէս ալ գաւաթը ընթրիքէն ետև առաւ ու ըսաւ, Այս գաւաթը նոր ուխտ է իմ արիւնովս. ասիկա ըրէք քանի անգամ որ խմելու ըլլաք` զիս յիշելու համար: 26Վասն զի քանի անգամ որ այս հացը ուտէք ու այս գաւաթը խմէք, Տէրոջը մահը կը պատմէք` մինչև ինք գայ: 27Ուստի ով որ այս հացը ուտէ կամ Տէրոջը գաւաթը խմէ անարժանաբար, պարտական պիտի ըլլայ Տէրոջը մարմնին և արիւնին: 28Ուրեմն թող մարդ իր անձը փորձէ, ու այսպէս այն հացէն ուտէ և այն գաւաթէն խմէ: 29Վասն զի ան որ անարժանաբար կ’ուտէ ու կը խմէ, իր անձին դատապարտութիւնը կ’ուտէ ու կը խմէ, վասն զի Տէրոջը մարմինը չորոշեր: 30Ասոր համար ձեր մէջ շատ հիւանդներ ու ցաւագարներ կան, և շատեր ալ կը ննջեն: 31Վասն զի եթէ ինքզինքնիս դատելու ըլլայինք, պիտի չդատուէինք: 32Իսկ երբ կը դատուինք, Տէրոջմէ կը խրատուինք, որպէս զի աշխարհի հետ չդատապարտուինք: 33Ուստի, իմ եղբայրներս, երբ մէկտեղ կը ժողվուիք ուտելու, իրարու սպասեցէք: 34Իսկ եթէ մէկը անօթի է` թող իր տանը մէջ ուտէ, որ չըլլայ թէ դատապարտութեան համար ժողվուիք: Եւ ուրիշ բաները ձեզի եկած ատենս պիտի պատուիրեմ: