1Յայտնութիւն Յիսուսի Քրիստոսի, ի ձեռն որոյ ետ Աստուած՝՝, ցուցանել ծառայից իւրոց որ ինչ լինելոց է վաղվաղակի, եւ նշանակեաց առաքելով ի ձեռն հրեշտակի իւրոյ առ ծառայ իւր Յովհաննէս, 2որ վկայեաց զբանէն Աստուծոյ, եւ զվկայութիւն Յիսուսի Քրիստոսի՝ զոր ետես, որ էր՝ եւ որ լինելոցն էր յետ այնորիկ։՝՝ 3Երանի որ ընթեռնուն զբանս մարգարէութեանս այսորիկ, եւ որ լսէ եւ պահէ՝՝ զոր ինչ ի նմա գրեալ է. զի ժամանակս մերձեալ է։

4Ի Յովհաննէ առ եւթն եկեղեցիս որ են յԱսիա, շնորհք ընդ ձեզ եւ խաղաղութիւն յԷէն եւ որ էն՝՝ եւ որ գալոցն է, եւ յեւթն զօրութեանց Հոգւոյն՝ որ է՝՝ առաջի աթոռոյն իւրոյ. 5եւ ի Յիսուսէ Քրիստոսէ հաւատարիմ վկայէն, որ է անդրանիկ ի մեռելոց, եւ իշխան թագաւորութեանց երկրի. որ սիրեաց զմեզ, եւ ելոյծ զկապանս մեղաց մերոց՝՝ արեամբն իւրով. 6եւ արար զմեզ թագաւորս եւ քահանայս՝՝ Աստուծոյ եւ Հօր իւրոյ. նմա փառք եւ զօրութիւն յաւիտեանս յաւիտենից։ Ամէն։

7Ահաւասիկ գալոց է՝՝ ընդ ամպս. եւ տեսցեն զնա ամենայն աչք, եւ որք խոցեցինն զնա. եւ կոծեսցին ի վերայ նորա ամենայն ազգք երկրի։ Այո, Ամէն։ 8Ես եմ Այբ եւ ես եմ Քէ, ասէ Տէր Աստուած, որ էն եւ որ է՝՝ եւ որ գալոցն է, Ամենակալ։

9Ես Յովհաննէս եղբայր ձեր եւ հաւասարակից նեղութեան եւ արքայութեան եւ համբերութեան որ ի Քրիստոս Յիսուս. եղէ ես ի կղզւոջն որ անուանեալ կոչի Պատմոս՝ վասն բանին Աստուծոյ եւ վասն վկայութեան Յիսուսի Քրիստոսի։ 10Եւ եղեւ յիս Հոգի՝՝ յաւուր կիւրակէի, եւ լուայ զկնի իմ ձայն մեծ իբրեւ զփողոյ, որ ասէր ցիս. Ես եմ Ալփա եւ Ով, Առաջին եւ Վերջին.՝՝ 11զոր տեսանես գրեա ի գիրս, եւ տուր տանել յեւթն եկեղեցիս, որ յԵփեսոս եւ ի Զմիւռնիա եւ ի Պերգամոն եւ ի Թիւատիր եւ ի Սարդիկէ եւ ի Փիղադեղփիա եւ ի Լաւոդիկիա։ 12Եւ դարձայ տեսանել զձայնն որ խօսէր ցիս. եւ ի դառնալն իմում տեսի եւթն ճրագարան ոսկի։ 13Եւ ի մէջ եւթն ճրագարանացն նման Որդւոյ մարդոյ, զգեցեալ պատմուճան պճղնաւոր. եւ գօտեւորեալ առ ստեամբքն գօտի ոսկեղէն. 14եւ գլուխ նորա եւ հերքն իբրեւ զասր սպիտակ եւ որպէս զձիւն. եւ աչք նորա որպէս բոց հրոյ. 15եւ ոտք նորա նմանեալ պղնձոյ ծխելոյ ի մէջ հնոցի հրաշէկ. եւ ձայն նորա իբրեւ զձայն ջուրց բազմաց։ 16Եւ ունէր յաջոյ ձեռինն իւրում աստեղս եւթն, եւ ի բերանոյ նորա սուր երկսայրի սրեալ ելանէր, եւ երեսք նորա իբրեւ զարեգակն ճառագայթեալ երեւէին՝՝։ 17Եւ իբրեւ տեսի զնա, անկայ առ ոտս նորա իբրեւ զմեռեալ. եւ եդ ի վերայ իմ զաջ իւր եւ ասէ ցիս. Մի՛ երկնչիր, ես եմ Սկիզբն, եւ ես եմ Վախճան։ 18Եւ ես եմ կեանք եւ ես եմ որ մեռայն. եւ աւասիկ կենդանի եմ յաւիտեանս յաւիտենից։ Ամէն։ Եւ ունիմ զփականս մահու եւ դժոխոց։ 19Գրեա զոր տեսանեսդ, որ էն, եւ որ հանդերձեալ է լինել յետ այնորիկ. 20զխորհուրդ եւթն աստեղացդ զոր տեսերդ յաջ իմ, եւ զեւթն ճրագարանս ոսկիս. եւթն աստեղքն հրեշտակք եւթն եկեղեցեացն են, եւ եւթն ճրագարանքն եւթն եկեղեցիքն են։