ՍԱՂՄՈՍ ՂԶ (ՂԷ)

Սաղմոս Դաւթի. ի ժամանակի զի երկիրն հաստատեցաւ։՝՝

1Տէր թագաւորեաց, ցնծասցէ երկիր, ուրախ եղիցին կղզիք բազումք։ 2Ամպ եւ մէգ շուրջ են զնովաւ, յիրաւունս եւ յարդարութիւն ուղղեալ է աթոռ նորա։ 3Հուր առաջի նորա գնասցէ, եւ այրեսցէ շուրջ զթշնամիս նորա։ 4Երեւեցան փայլատակունք նորա տիեզերաց, ետես եւ սասանեցաւ երկիր։ 5Լերինք որպէս մոմ հալեսցին յերեսաց Տեառն, յերեսաց Տեառն ամենայն երկիր։ 6Պատմեսցեն երկինք զարդարութիւն նորա, եւ տեսցեն ամենայն ժողովուրդք զփառս նորա։ 7Ամաչեսցեն ամենեքեան ոյք երկիր պագանեն կռոց, եւ ոյք պարծին ի դրօշեալս իւրեանց. երկիր պագցեն նմա ամենայն հրեշտակք նորա՝՝։

8Լուաւ եւ ուրախ եղեւ Սիոն, եւ ցնծասցեն դստերք Յուդայ վասն իրաւանց քոց, Տէր։ 9Զի դու բարձրեալ ես ի վերայ ամենայն երկրի, յոյժ բարձրացար ի վերայ ամենայն կռոց։

10Ոյք սիրէք զՏէր՝ ատեցէք զչարութիւն. պահէ Տէր զանձինս սրբոց իւրոց, ի ձեռաց մեղաւորի փրկեսցէ զնոսա։ 11Լոյս ծագեաց արդարոց, ուղղոց սրտիւք եղեւ ուրախութիւն։ 12Ուրախ եղերուք, արդարք, ի Տէր, եւ խոստովան եղերուք յիշատակի սրբութեան նորա։