2Բարի է խոստովան լինել Տեառն, սաղմոս ասել անուան քում, Բարձրեալ։ 3Պատմել առաւօտու զողորմութիւնս քո, եւ զճշմարտութիւնս քո ի գիշերի։ 4Տասնաղեաւ սաղմոսարանաւ, ի ձայն օրհնութեան գովել։ 5Ուրախ արարեր զիս Տէր, յարարածս քո, եւ ի գործս ձեռաց քոց ցնծացայց։ 6Որպէս զի՜ մեծ են գործք քո, Տէր, եւ յոյժ խոր են խորհուրդք քո։ 7Այր անզգամ զայս ոչ ծանիցէ, եւ անմիտն զայս ոչ առնու ի միտ։ 8Ի բուսանել մեղաւորաց որպէս խոտ, ի ծաղկել այնոցիկ ոյք գործեն զանօրէնութիւն, սատակեսցին յաւիտեանս յաւիտենից. 9եւ դու բարձրեալ ես յաւիտեանս, Տէր։ Զի ահա թշնամիք քո, Տէր, զի ահա թշնամիք քո կորիցեն. 10ցրուեսցին ամենեքեան ոյք գործեն զանօրէնութիւն։ 11Բարձր եղիցի որպէս միեղջերուի եղջեւր իմ, եւ ծերութիւն իմ՝՝ ի ձէթ պարարտութեան։ 12Ետես ակն իմ ի թշնամիս իմ ոյք յարուցեալ են ի վերայ իմ չարութեամբ, ի նոսա լուիցէ ունկն իմ։ 13Արդարքն որպէս զարմաւենիս ծաղկեսցին, որպէս զմայրսն Լիբանանու բազումք եղիցին։ 14Տնկեալք եղիցին ի տան Տեառն, եւ ի գաւիթս Աստուծոյ մերոյ ծաղկեսցին։ 15Եւս եւ բազումք եղիցին ի ծերութիւն պարարտութեան, գիրգք եւ փափուկք եղիցին, 16ի պատմել ուղիղ է Տէր Աստուած մեր՝՝ եւ ոչ գոյ ի նմա անիրաւութիւն։