2Բայց միայն Աստուծոյ հնազանդ լեր, անձն իմ, զի ի նմանէ է ինձ փրկութիւն։ 3Նա է Աստուած իմ եւ փրկիչ իմ, ապաւէն իմ՝ զի մի՛ սասանեցայց առաւել։ 4Մինչեւ յե՞րբ յառնէք ի վերայ մարդոյ՝ սպանանել ամենեքեան, որպէս յորմոյ թիւրելոյ եւ ի ցանգոյ մերժելոյ։ 5Բայց միայն զպատիւ իմ խորհեցան մերժել յինէն, եւ ընթացան ի ծարաւս իւրեանց՝՝. բերանովք իւրեանց օրհնէին, եւ սրտիւք իւրեանց անիծանէին։

6Բայց սակայն Աստուծոյ հնազանդ լեր անձն իմ, զի ի նմանէ է ինձ համբերութիւն։ 7Նա է Աստուած իմ եւ փրկիչ իմ, ապաւէն իմ՝ զի մի՛ սասանեցայց։ 8ՅԱստուծոյ է զօրութիւն իմ եւ փառք իմ. Աստուած օգնութեան իմոյ, յոյս իմ է առ Աստուած։ 9Յուսացարուք ի նա ամենայն ժողովք ժողովրդոց, սփռեցէք առաջի նորա զսիրտս ձեր, զի Աստուած օգնական է մեր յաւիտեանս ժամանակաց՝՝։ Հանգիստ։

10Սակայն ընդունայն են որդիք մարդկան, սուտ են որդիք մարդկան, ի կշիռս իւրեանց մեղանչեն, եւ ինքեանք յունայնութեան են ի միասին՝՝։ 11Մի՛ յուսայք յանիրաւութիւն, յափշտակութեան մի՛ ցանկայք. եւ մեծութիւն եթէ առուով գայցէ, մի՛ յօժարեսցին սիրտք ձեր։

12Միանգամ խօսեցաւ Աստուած, եւ երկուս՝՝ զայս լուայ. Աստուծոյ է զօրութիւն. 13եւ քո, Տէր, ողորմութիւն, եւ դու հատուցանես իւրաքանչիւր ըստ գործս նոցա։