ՍԱՂՄՈՍ ԼԲ (ԼԳ)

Սաղմոս Դաւթի։՝՝

1Ցնծացէք, արդարք, ի Տէր. ուղղոց վայելէ օրհնութիւն։ 2Խոստովան եղերուք Տեառն օրհնութեամբ, տասնաղեաւ սաղմոսարանաւ սաղմոս ասացէք նմա։ 3Օրհնեցէք զՏէր յօրհնութիւն նոր, զի բարի է,՝՝ սաղմոս ասացէք նմա օրհնութեամբ. 4ուղիղ են պատգամք Տեառն, եւ ամենայն գործք նորա հաւատովք են. 5եւ սիրէ զողորմութիւն եւ զիրաւունս Տէր. ողորմութեամբ Տեառն լի եղեւ երկիր. 6եւ բանիւ Տեառն երկինք հաստատեցան, եւ հոգւով բերանոյ նորա ամենայն զօրութիւնք նոցա։ 7Ժողովեաց որպէս ի տիկ զջուրս ծովու, եւ դնէ ի խորս զգանձս իւր՝՝։ 8Երկիցէ ի Տեառնէ ամենայն երկիր, եւ ի նմանէ դողասցեն ամենայն բնակիչք աշխարհի։ 9Զի նա ասաց՝ եւ եղեն, ինքն հրամայեաց՝ եւ հաստատեցան։

10Տէր ցրուէ զխորհուրդս հեթանոսաց, անարգէ Տէր զխորհուրդս ժողովրդոց, եւ արհամարհէ Տէր զխորհուրդս իշխանաց։՝՝ 11Խորհուրդ Տեառն յաւիտեան մնայ, խորհուրդ սրտի նորա ազգէ մինչեւ յազգ։ 12Երանի՛ ազգի որոյ Տէր Աստուած օգնական է նմա՝՝, ժողովուրդ զոր ընտրեաց ի ժառանգութիւն իւր։ 13Յերկնից նայեցաւ Տէր յամենայն որդիս մարդկան. 14ի պատրաստ բնակութենէ իւրմէ հայեցաւ յամենայն բնակիչս աշխարհի։ 15Ո ստեղծ առանձին զսիրտս նոցա, ի միտ առնու զամենայն գործս նոցա։ 16Ոչ թէ ի բազում զօրս իւր ապրեսցի թագաւոր, եւ ոչ սկայ ի բազում զօրութեան իւրում։ 17Սուտ է ձի փրկութեան իւրում՝՝, ի բազում զօրութեան իւրում ոչ ապրեցուցանէ զհեծեալն։

18Աչք Տեառն ի վերայ երկիւղածաց իւրոց, եւ ոյք յուսան յողորմութիւն նորա, 19փրկել ի մահուանէ զանձինս նոցա, կերակրել զնոսա ի սովու։ 20Անձինք մեր համբերեսցեն Տեառն, զի օգնական եւ պաշտպան մեր է։ 21Ի նա ուրախ եղիցին սիրտք մեր, եւ յանուն սուրբ նորա յուսասցուք։ 22Եղիցի ողորմութիւն քո, Տէր, ի վերայ մեր, որպէս յուսացաք ի քեզ։