ՍԱՂՄՈՍ ԺԳ (ԺԴ)

Ի կատարած. Սաղմոս Դաւթի։

1Ասաց անզգամն ի սրտի իւրում, թէ՝ Ոչ գոյ Աստուած. ապականեցան եւ պղծեցան յանօրէնութեան իւրեանց, եւ ոչ ոք է որ առնէ զբարի։ 2Տէր յերկնից նայեցաւ յամենայն որդիս մարդկան, տեսանել թէ իցէ՞ ոք իմաստուն որ խնդրիցէ զԱստուած։ 3Ամենեքեան խոտորեցան, ի միասին անպիտանացան. ոչ ոք է որ առնէ զբարի, եւ չէ ոք մինչեւ ի մի։ 4Որպէս ոչ ծանիցեն ամենեքեան ոյք գործեն զանօրէնութիւն, ոյք ուտէին զժողովուրդ իմ որպէս կերակուր հացի, եւ առ Տէր ոչ կարդացին։ 5Անդ երկիցեն զերկեւղ ուր ոչ իցէ երկեւղ, զի Տէր՝՝ է յազգս արդարոց։ 6Զխորհուրդ աղքատի յամօթ արարին, զի Տէր է յոյս նորա։ 7Ո՛ տացէ ի Սիոնէ զփրկութիւն Իսրայելի. ի դարձուցանել Տեառն զգերութիւն ժողովրդեան իւրոյ, ցնծասցէ Յակոբ եւ ուրախ եղիցի Իսրայէլ։