ՍԱՂՄՈՍ ՃԺԷ (ՃԺԸ)

Ալէլուիա։

1Խոստովան եղերուք Տեառն, զի բարի է. զի յաւիտեան է ողորմութիւն նորա։ 2Ասասցէ տունն Իսրայելի՝ զի բարի է,՝՝ զի յաւիտեան է ողորմութիւն նորա։ 3Ասասցէ տունն Ահարոնի՝ զի բարի է,՝՝ զի յաւիտեան է ողորմութիւն նորա։ 4Ասասցեն երկիւղածք Տեառն՝ զի բարի է,՝՝ զի յաւիտեան է ողորմութիւն նորա։

5Ի նեղութեան իմում ես առ Տէր կարդացի, եւ լուաւ ինձ յանդորր։ 6Տէր է իմ օգնական եւ ես ոչ երկեայց. զի՞ արասցէ ինձ մարդ։ 7Տէր է իմ օգնական, եւ ես տեսից ի թշնամիս իմ։ 8Բարի է յուսալ ի Տէր քան յուսալ ի մարդիկ։ 9Բարի է յուսալ ի Տէր քան յուսալ յիշխանս։ 10Ամենայն ազինք շրջեցան զինեւ, եւ անուամբ Տեառն յաղթեցի նոցա։ 11Շրջելով շրջեցան զինեւ, եւ պաշարեցին զիս ի միասին, եւ անուամբ Տեառն վանեցի զնոսա։ 12Շուրջ եղեն զինեւ որպէս մեղուք, վառեցան բորբոքեցան որպէս փուշք ի հուր, եւ անուամբ Տեառն մերժեցի զնոսա։ 13Ի մերժելն դրդուեցայ եւ եղէ մերձ ի գլորել, եւ Տէր ընկալաւ զիս։ 14Զօրութիւն իմ եւ օգնութիւն իմ Տէր, եւ եղեւ ինձ ի փրկութիւն։ 15Ձայն ցնծութեան եւ փրկութեան ի յարկս արդարոց. աջ Տեառն արար զօրութիւն. 16աջ Տեառն բարձր արար զիս, եւ՝՝ աջ Տեառն արար զօրութիւն։ 17Ոչ մեռայց, այլ կեցից եւ պատմեցից զգործս Տեառն։ 18Խրատելով խրատեաց զիս Տէր, եւ ի մահ ոչ մատնեաց։

19Բացէք ինձ զդրունս արդարութեան՝ զի մտից ընդ այն, եւ խոստովան եղէց Տեառն։ 20Այս դուռն Տեառն է, եւ արդարք մտանեն ընդ սա։ 21Խոստովան եղէց քեզ, Տէր, զի լուար ինձ, եւ եղեր ինձ ի փրկութիւն։ 22Վէմն զոր անարգեցին շինօղքն, նա եղեւ գլուխ անկեան։ 23Ի Տեառնէ եղեւ այս, եւ է սքանչելի առաջի աչաց մերոց։ 24Այսօր է զոր արար Տէր, եկայք ցնծասցուք եւ ուրախ եղիցուք ի սմա։ 25Ո՛ Տէր, փրկեա, ո՛ Տէր, առաջնորդեա։

26Օրհնեալ որ գալոցդ ես յանուն Տեառն, եւ օրհնեցաք զքեզ ի տանէ Տեառն։ 27Տէր Աստուած մեր երեւեցաւ մեզ, արարէք տօնս ուրախութեան կանխաւ՝ մինչեւ յանկիւնս՝՝ սեղանոյ։ 28Աստուած իմ ես դու, եւ խոստովան եղէց քեզ. Աստուած իմ ես, դու եւ բարձր արարից զքեզ։ Խոստովան եղէց քեզ, Տէր, զի լուար ինձ, եւ եղեր ինձ ի փրկութիւն։՝՝ 29Խոստովան եղերուք Տեառն, զի բարի է, զի յաւիտեան է ողորմութիւն նորա։