ՍԱՂՄՈՍ ՃԺԳ (ՃԺԴ)

Ալէլուիա։

1Յելանելն Իսրայելի յԵգիպտոսէ, տանն Յակոբայ ի ժողովրդենէ այլազգեաց, 2եղեւ Հրէաստան սրբութիւն նորա, եւ Իսրայէլ իշխանութիւն նորա։ 3Ծով ետես եւ փախեաւ, եւ Յորդանան անդրէն դարձաւ։ 4Լերինք ցնծացին որպէս խոյք, եւ բլուրք որպէս գառինք մաքեաց։

5Զի՞ է քեզ, ծով, զո՞ տեսեր եւ՝՝ փախեար, կամ դու Յորդանան՝ զի դարձար անդրէն. 6լերինք, ցնծացէք որպէս խոյք, եւ բլուրք՝ որպէս գառինք մաքեաց։ 7Յերեսաց Տեառն սասանեցաւ երկիր, յերեսաց Աստուծոյ Յակոբայ։ 8Ո դարձոյց զվէմն ի վտակս ջուրց, եւ զապառաժն յաղբերակունս։

(ՃԺԵ)

9Մի՛ մեզ, Տէր, մի՛ մեզ, այլ անուան քում տուր զփառս վասն ողորմութեան եւ ճշմարտութեան քո։ 10Մի՛ երբեք ասասցեն ի հեթանոսս, թէ՝ Ո՞ւր է Աստուած նոցա։ 11Աստուած մեր յերկինս եւ յերկրի՝՝. զամենայն զոր ինչ կամեցաւ եւ արար։

12Կուռք հեթանոսաց ոսկի եւ արծաթ են, ձեռագործ են որդւոց մարդկան։ 13Բերան ունին՝ եւ ոչ խօսին, աչս ունին՝ եւ ոչ տեսանեն, 14ականջս ունին՝ եւ ոչ լսեն, ունչս ունին՝ եւ ոչ հոտոտեն, 15ձեռս ունին՝ եւ ոչ շօշափեն, ոտս ունին՝ եւ ոչ գնան. եւ ոչ գոյ բարբառ ի կոկորդս նոցա։ 16Նման նոցա եղիցին ոյք արարին զնոսա, ամենեքեան ոյք յուսացեալ են ի նոսա։

17Տուն Իսրայելի յուսացաւ ի Տէր, օգնական ընդունելի է նոցա։ 18Տուն Ահարոնի յուսացաւ ի Տէր, օգնական ընկերելի է՝՝ նոցա։ 19Երկիւղածք Տեառն յուսացան ի Տէր. օգնական եւ փրկիչ է նոցա։

20Յիշեաց զմեզ Տէր եւ օրհնեաց զմեզ. օրհնեաց Տէր զտունն Իսրայելի. օրհնեաց Տէր զտունն Ահարոնի։ 21Օրհնեաց Տէր զերկիւղածս իւր, զփոքրկունս եւ զմեծամեծս։ 22Յաւելցէ ի ձեզ Տէր, ի ձեզ եւ յորդիս ձեր։ 23Օրհնեալ էք դուք ի Տեառնէ, որ արար զերկինս եւ զերկիր։

24Երկինք երկնից Տեառն են, եւ զերկիրս ետ որդւոց մարդկան։ 25Ոչ թէ մեռեալք օրհնեսցեն զքեզ, Տէր, եւ ոչ ամենեքեան որ իջանեն ի դժոխս։ 26Այլ կենդանիքս օրհնեսցուք զՏէր, յայսմ հետէ մինչեւ յաւիտեան։