1Եւ խօսեցաւ Տէր ընդ Մովսիսի եւ ասէ. 2Խօսեաց ընդ Ահարոնի եւ ասասցես ցնա. Յորժամ դնիցես զճրագունսն, ի միոջէ կողմանէ երեսաց աշտանակին լուցանիցին եւթանեքին ճրագարանքն։ 3Եւ արար այնպէս Ահարոն. ի միոջէ կողմանէ՝՝ հանդէպ աշտանակին ելոյց զճրագարանս նորա, որպէս հրամայեաց Տէր Մովսիսի։ 4Եւ այս է կազմած աշտանակին. ձոյլ ոսկի, բուն նորա, եւ շուշանք նորա ձոյլ համակ՝՝, ըստ օրինակին որպէս եցոյց Տէր Մովսիսի՝ այնպէս արար զաշտանակն։

5Խօսեցաւ Տէր ընդ Մովսիսի՝ եւ ասէ. 6Առ դու զՂեւտացիսն ի միջոյ որդւոցն Իսրայելի եւ սրբեսցես զնոսա. 7եւ այսպէս արասցես նոցա զսրբութիւնն իւրեանց. ցանեսցես զնոքօք ջուր սրբութեան, եւ ածցի ածելի ի վերայ ամենայն մարմնոց նոցա, եւ լուասցեն զձորձս իւրեանց, եւ սուրբք եղիցին։ 8Եւ առցեն զուարակ մի յանդւոյ, եւ ըստ նմին զոհ, նաշիհ զանգեալ իւղով, եւ առցես որթ տարեւոր՝՝ յանդւոյ վասն մեղաց։ 9Եւ տարցիս զՂեւտացիսն առաջի խորանին վկայութեան. եւ ժողովեսցես զամենայն ժողովուրդ որդւոցն Իսրայելի։ 10Եւ մատուսցեն զՂեւտացիսն առաջի Տեառն, եւ դիցեն որդիքն Իսրայելի զձեռս իւրեանց ի վերայ Ղեւտացւոցն։ 11Եւ զատուսցէ Ահարոն զՂեւտացիսն ի հատուցումն առաջի Տեառն յորդւոցն Իսրայելի, եւ եղիցին գործել զգործ խորանին առաջի Տեառն։ 12Եւ Ղեւտացիքն դիցեն զձեռս իւրեանց ի վերայ գլխոյ զուարակացն. եւ արասցես զմին վասն մեղաց, եւ զմին յողջակէզ Տեառն քաւել վասն նոցա։ 13Եւ կացուսցես զՂեւտացիսն առաջի Տեառն եւ՝՝ առաջի Ահարոնի եւ առաջի որդւոց նորա, եւ տացես զնոսա հատուցումն առաջի Տեառն։ 14Եւ զատուսցես զՂեւտացիսն ի միջոյ որդւոցն Իսրայելի, եւ եղիցին ինձ։ 15Եւ ապա մտցեն Ղեւտացիքն գործել զգործ խորանին վկայութեան. եւ սրբեսցես զնոսա, եւ տացես զնոսա հատուցումն առաջի Տեառն՝՝. 16զի հատուցումն հատուցեալ են նոքա ինձ ի միջոյ որդւոցն Իսրայելի. փոխանակ ամենայն անդրանկաց որ բանան զամենայն արգանդ յորդւոցն Իսրայելի՝ առի զնոսա ինձ։ 17Զի իմ է ամենայն անդրանիկ որդւոցն Իսրայելի, ի մարդոյ մինչեւ յանասուն. յաւուր յորում հարի զամենայն անդրանիկ յերկրին Եգիպտացւոց, սրբեցի զնոսա ինձ։ 18Եւ առի զՂեւտացիսն փոխանակ ամենայն անդրանկաց որդւոցն Իսրայելի։ 19Եւ ետու զՂեւտացիսն հատուցումն տուեալս Ահարոնի եւ որդւոց նորա ի միջոյ որդւոցն Իսրայելի, գործել զգործ որդւոցն Իսրայելի ի խորանին վկայութեան, եւ քաւել վասն որդւոցն Իսրայելի մերձենալով ի սրբութիւնսն։

20Եւ արարին Մովսէս եւ Ահարոն եւ ամենայն ժողովուրդ որդւոցն Իսրայելի Ղեւտացւոցն. որպէս պատուիրեաց Տէր Մովսիսի վասն Ղեւտացւոցն՝ նոյնպէս արարին նոցա որդիքն Իսրայելի. 21եւ սրբեցան Ղեւտացիքն, եւ լուացին զհանդերձս, եւ ետուն զանձինս Ահարոնի ի հատուցումն՝՝ առաջի Տեառն. եւ քաւեաց վասն նոցա Ահարոն սրբել զնոսա։ 22Եւ ապա մտին Ղեւտացիքն պաշտել զպաշտօն իւրեանց ի խորանին վկայութեան՝ առաջի Ահարոնի եւ առաջի որդւոց նորա. որպէս պատուիրեաց Տէր Մովսիսի վասն Ղեւտացւոցն, նոյնպէս եւ արարին նոցա։

23Եւ խօսեցաւ Տէր ընդ Մովսիսի եւ ասէ. 24Այս ինչ է որ վասն Ղեւտացւոցն իցէ. ի քսան եւ հինգամենից եւ ի վեր մտցեն գործել ի խորանին վկայութեան. 25եւ ի յիսնամենից՝ ի բաց կացցեն ի պաշտամանէ անտի, եւ ոչ եւս գործեսցեն։ 26Եւ պաշտեսցէ եղբայր նորա՝՝ ի խորանին վկայութեան, պահել պահեսցէ զպահպանութիւնս, բայց գործ ինչ մի՛ գործեսցէ՝՝. այնպէս արասցես Ղեւտացւոցն ի պահպանութիւնս իւրեանց։