1Եւ խօսեցաւ Տէր ընդ Մովսիսի եւ ասէ. 2Պատուիրեա որդւոցն Իսրայելի եւ ասասցես ցնոսա. Դուք մտանէք յերկիրն Քանանացւոց, եւ այն լիցի ձեզ ի ժառանգութիւն, երկիրն Քանանու հանդերձ սահմանօք իւրովք. 3եւ եղիցի ձեզ կողմն ընդ հարաւ ի Սինն անապատէ մինչեւ մօտ յԵդովմ. եւ եղիցին ձեզ սահմանքն որ ընդ հարաւ իցեն, ի մասնէ Աղի ծովուն յարեւելից կողմանէ. 4եւ պատիցին սահմանքն ձեր ի հարաւոյ՝ ընդ սարն Ակրաբինայ եւ անցցեն յԵնակ, եւ եղիցին ելք նորա ընդ հարաւոյ կողմն Կադեսբառնեայ. եւ ելցեն յաւանն Արադայ՝՝ եւ անցցեն յԱսեմոն։ 5Եւ պատիցին սահմանքն յԱսեմոնայ ձորոյն Եգիպտացւոց, եւ եղիցին ելք նորա ընդ ծովն։

6Եւ սահմանք ծովուն ձեզ լիցին. ծովն մեծ սահման իցէ, եւ այն լիցին ձեզ սահմանք ծովուն։

7Եւ այս լիցին ձեզ սահմանք ընդ կողմն հիւսիսոյ. ի մեծէ ծովէն չափեսջիք ձեզ զլեառնլեռնայն. 8եւ՝՝ ի լեռնէ անտի չափեսջիք զնոյն մինչեւ ի մուտս Եմաթայ, եւ եղիցին ելք նորա սահմանքն Սեդադայ. 9եւ ելանիցէ առ սահմանօքն Զեփրոնայ. եւ եղիցին ելք նորա Ասիռնային. այն լիցին ձեզ սահմանք ի հիւսիսոյ։

10Եւ չափեսջիք ձեզ սահմանս յարեւելից՝ յԱսիռնայինայ ցՍեպփամար. 11եւ իջանիցեն սահմանքն ի Սեպփամարայ ցԲեղա, յարեւելից կողմանէ աղբերացն. եւ իջցեն սահմանքն ի Բեղայ մինչեւ ցծովն Քենարայ յարեւելից կողմանէ. 12եւ իջանիցեն սահմանքն մինչեւ ցՅորդանան, եւ ելք նորա լինիցին ծովն Աղի։ Այն ամենայն երկիր լինիցի ձեզ, եւ սահմանք նորա շուրջանակի։

13Եւ պատուիրեաց Մովսէս որդւոցն Իսրայելի եւ ասէ. Այս է երկիրն զոր ժառանգիցէք զսա վիճակաւ, որպէս հրաման ետ Տէր տալ զնա ինն ցեղիցն եւ կիսոյ ցեղին Մանասէի. 14վասն զի ա՛ռ ցեղ որդւոցն Ռուբենի՝՝ եւ ցեղ որդւոցն Գադայ՝ ըստ տանց նահապետաց իւրեանց, եւ կէս ցեղին Մանասէի, զվիճակս իւրեանց 15յայնկոյս Յորդանանու յանդիման Երիքովի ի հարաւոյ ընդ կողմն արեւելից։

16Եւ խօսեցաւ Տէր ընդ Մովսիսի եւ ասէ. 17Այս անուանք են արանցն՝ որ ժառանգեցուցանիցեն ձեզ զերկիրն. Եղիազար քահանայ եւ Յեսու Նաւեան. 18եւ մի մի իշխան ի ցեղէ առնուցուք ժառանգեցուցանել ձեզ զերկիրն։ 19Եւ այս անուանք են արանցն. ցեղին Յուդայ՝ Քաղէբ որդի Յեփոնեայ. 20ցեղին Շմաւոնի՝ Սաղամիէլ որդի Ամիուդայ. 21ցեղին Բենիամինի՝ Եղդադ որդի Քասղովդայ. 22ցեղին Դանայ՝ իշխան Բակքիր որդի Եգղայ. 23որդւոցն Յովսեփայ, ցեղի որդւոցն Մանասէի՝ իշխան Անիէլ որդի Սուփիայ. 24ցեղի որդւոցն Եփրեմի՝ իշխան Կամուէլ որդի Սաբաթայ. 25ցեղին Զաբուղոնի՝ իշխան Եղիսափան որդի Փառնաքայ. 26ցեղին որդւոցն Իսաքարայ՝ իշխան Փաղտիէլ որդի Ոզիայ. 27ցեղի որդւոցն Ասերայ՝ իշխան Աքիովր որդի Սեղեմայ. 28ցեղին Նեփթաղիմայ՝ իշխան Փադայէլ որդի Ամիուդայ։ 29Սոքա են որոց հրաման ետ Տէր բաժանել որդւոցն Իսրայելի զերկիրն Քանանացւոց։