1Եւ բանակեցաւ Իսրայէլ ի Սատտիմ. եւ պղծեցաւ ժողովուրդն պոռնկել ընդ դստերսն Մովաբու։ 2Եւ կոչեցին զնոսա ի զոհս կռոց իւրեանց. եւ եկեր ժողովուրդն ի զոհից նոցա, եւ երկիր պագին կռոց նոցա։ 3Եւ նուիրեցաւ Իսրայէլ Բեղփեգովրայ, եւ բարկացաւ սրտմտութեամբ Տէր ի վերայ Իսրայելի։ 4Եւ ասէ Տէր ցՄովսէս. Ա՛ռ զամենայն իշխանս ժողովրդեանդ, եւ առակեա զդոսա առաջի Տեառն յանդիման արեգական, եւ դարձցի սրտմտութիւն բարկութեան Տեառն յԻսրայելէ։ 5Եւ ասէ Մովսէս ցցեղսն Իսրայելի. Կոտորեցէք իւրաքանչիւր զընտանի իւր զնուիրեալ Բեղփեգովրայ։ 6Եւ ահա այր Իսրայելացի գայր ածէր զեղբայր իւր առ կին Մադիանացի՝՝ յանդիման Մովսիսի եւ յանդիման ամենայն ժողովրդեան որդւոցն Իսրայելի, եւ նոքա լային առ դրան խորանին վկայութեան։ 7Եւ տեսեալ Փենեէսի որդւոյ Եղիազարու որդւոյ Ահարոնի քահանայի, յարեաւ ի միջոյ ժողովրդեանն, եւ առեալ գեղարդն ի ձեռն իւր՝ 8եւ եմուտ զհետ առնն Իսրայելացւոյ ի հնոցն, եւ խոցեաց զերկոսին՝ զայրն Իսրայելացի եւ զկինն ընդ արգանդ իւր. եւ դադարեաց հարուածն յորդւոցն Իսրայելի։ 9Եւ եղեն մեռեալքն ի հարուածոցն յայնցանէ քսան եւ չորք հազարք։

10Եւ խօսեցաւ Տէր ընդ Մովսիսի եւ ասէ. 11Փենեէս, որդի Եղիազարու, որդւոյ Ահարոնի քահանայի, ցածոյց զսրտմտութիւն իմ յորդւոցն Իսրայելի, ի նախանձեցուցանել ինձ զնախանձ իմ ի նոսա. եւ ոչ սատակեցի զորդիսդ Իսրայելի նախանձու իմով։ 12Եւ արդ այսպէս ասասցես. Ահա ես տաց նմա ուխտ խաղաղութեան. 13եւ եղիցի նմա եւ զաւակի նորա յետ նորա ուխտ քահանայութեան յաւիտենական, փոխանակ զի քինախնդիր եղեւ Աստուծոյ իւրում, եւ քաւեաց վասն որդւոցն Իսրայելի։ 14Եւ անուն առն Իսրայելացւոյ հարելոյ որ հարաւ ընդ կնոջն Մադիանացւոյ՝ Զամբրի որդի Սաղովմայ, իշխան տան ազգի որդւոցն Շմաւոնի։ 15Եւ անուն կնոջն Մադիանացւոյ հարելոյ՝ Քազբի, դուստր Սուրայ իշխանի ազգին Ամովթայ՝՝ տան նահապետութեան Մադիամու։

16Եւ խօսեցաւ Տէր ընդ Մովսիսի եւ ասէ. 17Խօսեաց ընդ որդիսն Իսրայելի եւ ասասցես.՝՝ Թշնամեցայք ընդ Մադիանացիսն եւ հարկանիցէք զնոսա. 18զի թշնամի են նոքա ընդ ձեզ նենգութեամբ, որ նենգեցին զձեզ Փոգորաւ, եւ Քազբեաւ դստերբ իշխանին Մադիամու քերբն իւրեանց հարելով յաւուրն հարուածոց վասն Փոգովրայ։