1Եւ խօսեցաւ Տէր ընդ Ահարոնի եւ ասէ. Դու եւ որդիք քո եւ տուն նահապետութեան քո ընդ քեզ՝ առնուցուք զմեղս սրբութեանցն. եւ դու եւ որդիք քո առնուցուք զմեղս քահանայութեան ձերոյ։ 2Եւ զեղբարս քո զցեղն Ղեւեայ, զգունդ հօր քո, մատուսցես առ քեզ, եւ յաւելցին ի քեզ, եւ պաշտեսցեն զքեզ. եւ դու եւ որդիք քո ընդ քեզ, յանդիման խորանին վկայութեան։ 3Եւ պահեսցեն զպահպանութիւնս քո, եւ զպահպանութիւնս խորանին վկայութեան. բայց ի սպասն իմ ի սուրբ եւ ի սեղանն մի՛ մերձեսցին, զի մի՛ մեռանիցին, ե՛ւ նոքա ե՛ւ դուք։ 4Եւ յաւելցին ի քեզ, եւ պահեսցեն զպահպանութիւնս խորանին վկայութեան ըստ ամենայն պաշտաման խորանին. եւ օտարազգի մի՛ մերձեսցի առ ձեզ։ 5Եւ պահեսջիք զպահպանութիւնս սրբութեանցն եւ զպահպանութիւնս սեղանոյն, եւ ոչ եւս լինիցի բարկութիւն յորդիսն Իսրայելի։ 6Եւ ես առի զեղբարս ձեր զՂեւտացիս ի միջոյ որդւոցն Իսրայելի՝ փոխանակս տուեալ Տեառն, պաշտել զպաշտօն խորանին վկայութեան։ 7Եւ դու եւ որդիք քո ընդ քեզ պահեսջիք զքահանայութիւն ձեր ըստ ամենայն պայմանի սեղանոյն, եւ զներքին կողմն վարագուրին, եւ պաշտեսջիք զպաշտօն քահանայութեան ձերոյ. եւ այլազգին որ մերձենայցէ՝ մեռցի։

8Խօսեցաւ Տէր ընդ Ահարոնի եւ ասէ. Ես ահաւասիկ ետու քեզ զպահեստ պտղոց իմոց. յամենայն նուիրելոցն ինձ յորդւոցն Իսրայելի՝ քեզ ետու զայն ի պատիւ, եւ որդւոց քոց յետ քո՝՝ օրէն յաւիտենական։ 9Եւ այս եղիցի ձեզ ի նուիրելոց սրբութեանցն ընծայից, յամենայն պատարագաց նոցա եւ յամենայն զոհիցն՝՝ նոցա, եւ յամենայնէ առ ի յանցանացն նոցա, եւ յամենայնէ առ ի մեղացն նոցա, զոր տայցեն ինձ յամենայն սրբութեանցն՝ քեզ լիցի եւ որդւոց քոց։ 10Ի սրբութիւն սրբութեանցն կերիջիք զայն. ամենայն արու ուտիցէ զայն, դու եւ որդիք քո. զի սրբութիւնք եղիցին քեզ։ 11Եւ այն եղիցի քեզ՝ ի պտղոց տրոցն նոցա, յամենայն նուիրաց՝՝ որդւոցն Իսրայելի, քեզ ետու զայն եւ ուստերաց եւ դստերաց քոց ընդ քեզ, օրէն յաւիտենական. ամենայն սուրբ ի տան քում կերիցէ զայն։ 12Եւ զամենայն պտուղ իւղոյ, եւ զամենայն պտուղ գինւոյ եւ ցորենոյ, զոր տացեն Տեառն զպտուղ իւրեանց՝՝ քեզ ետու զայն։ 13Ամենայն առաջինք արմտեաց յերկրին իւրեանց զոր մատուսցեն Տեառն՝ քեզ լիցին, եւ ամենայն սուրբ ի տան քում կերիցէ զայն։ 14Եւ ամենայն նուիրեալն յորդւոցն Իսրայելի քեզ լիցի։ 15Եւ ամենայն որ բանայ զարգանդ՝ յամենայն մարմնոյ, զոր մատուցանիցեն Տեառն ի մարդոյ մինչեւ յանասուն՝ քեզ լիցի. այլ փրկելով փրկեսցես զանդրանիկս մարդկան, եւ զանդրանիկս անասնոց անսրբոց փրկեսցես։ 16Եւ փրկանք նորա յամսօրէից եւ ի վեր՝՝, եւ գին նորա հինգ սիկղ ըստ սրբութեան սկեղն, որ է քսան դանգ։ 17Բայց զանդրանիկս արջառոց եւ զանդրանիկս օդեաց եւ զանդրանիկս այծեաց ոչ փրկեսցես, զի սուրբ են. եւ զարիւն նոցա հեղցես առ սեղանովն, եւ զճարպն հանցես ընծայ ի հոտ անուշից Տեառն. 18եւ միսն եղիցի քո, որպէս երբուծ նուիրին եւ երին աջոյ քեզ լիցի։ 19Զամենայն ինչ հաս՝՝ ի սրբութեանցն զոր հանիցեն Տեառն որդիքն Իսրայելի՝ քեզ ետու եւ որդւոց քոց եւ՝՝ ուստերաց եւ դստերաց քոց ընդ քեզ, օրէն յաւիտենական. քանզի ուխտ աղի է առաջի Տեառն, քեզ եւ զաւակի քում յետ քո՝՝։ 20Եւ խօսեցաւ Տէր ընդ Ահարոնի եւ ասէ. Յերկրի նոցա մի՛ ժառանգեսցես, եւ բաժին քո ընդ նոսա մի՛ լիցի, զի ես եմ բաժին քո եւ ժառանգութիւն ի մէջ որդւոցն Իսրայելի։

21Եւ որդւոցն Ղեւեայ ահա ետու զամենայն տասանորդս Իսրայելի ի ժառանգութիւն, փոխանակ պաշտաման նոցա զոր նոքայն պաշտիցեն ի խորանին վկայութեան։ 22Եւ մի՛ եւս մերձեսցին որդիքն Իսրայելի ի խորանն վկայութեան ընդունել զմեղս մահաբերս։ 23Եւ պաշտեսցէ Ղեւտացին ինքն զպաշտօն խորանին վկայութեան, եւ նոքա առցեն զմեղս նոցա. օրէն յաւիտենական յազգս իւրեանց. եւ մի՛ ժառանգեսցեն ժառանգութիւն ի մէջ որդւոցն Իսրայելի։ 24Զի զտասանորդս որդւոցն Իսրայելի՝ զոր զատուսցեն Տեառն հաս՝՝ ետու Ղեւտացւոցն ի ժառանգութիւն. վասն այսորիկ ասացի նոցա թէ ի մէջ որդւոցն Իսրայելի մի՛ ժառանգեսցեն վիճակ։

25Խօսեցաւ Տէր ընդ Մովսիսի եւ ասէ. 26Եւ ընդ Ղեւտացիսն խօսեսցիս եւ ասասցես ցնոսա. Եթէ առնուցուք յորդւոցն Իսրայելի տասանորդս զոր ետու ձեզ, հանիցէք եւ դուք անտի հաս՝՝ Տեառն՝ զտասանորդն ի տասանորդէ։ 27Եւ համարեսցի ձեզ հասն ձեր իբրեւ զցորեան ի կալոյ եւ իբրեւ զպտուղ ի հնձանէ։ 28Այնպէս եւ դուք հանիցէք ի հասից անտի՝՝ Տեառն, յամենայն տասանորդաց ձերոց զոր առնուցուք յորդւոցն Իսրայելի, եւ տայցէք ի նոցանէ հաս Տեառն, Ահարոնի քահանայի. 29յամենայն տրոցն ձերոց հանիցէք հաս եւ յամենայն պտղոց՝՝ զնուիրեալն ի նմանէ։ 30Եւ ասասցես ցնոսա. Յորժամ հանիցէք զպտուղն ի նմանէ՝՝ համարեսցի Ղեւտացւոցն իբրեւ զարդիւնս ի կալոյ, եւ իբրեւ զպտուղ ի հնձանէ։ 31Եւ կերիջիք զայն յամենայն տեղւոջ, դուք եւ տունք ձեր. զի վարձ ձեր է այն, փոխանակ պաշտամանցն ձերոց ի խորանին վկայութեան։ 32Եւ մի՛ առնուցուք վասն այնորիկ մեղս, յորժամ հանիցէք զպտուղն ի նմանէ զսրբութիւն՝՝ որդւոցն Իսրայելի ոչ պղծիցէք՝ զի մի՛ մեռանիցիք։