1Խօսեցաւ Տէր ընդ Մովսիսի եւ ասէ. 2Խօսեաց ընդ որդիսդ Իսրայելի եւ ասասցես ցդոսա. Յորժամ մտանիցէք յերկիրն բնակութեան ձերոյ զոր ես տաց ձեզ, 3եւ առնիցէք ողջակէզ Տեառն՝ եւ ողջընծայ ի զոհ, մեծացուցանել՝՝ զուխտն կամ զկամաւն, կամ ի տօնս ձեր առնել հոտ անուշից Տեառն, եթէ յարջառոյ եւ եթէ ի հօտից, 4եւ բերցէ որ մատուցանիցէ զպատարագն իւր Տեառն, զոհ նաշհոյ զտասանորդ գրուին՝ զանգեալ իւղով, չորրորդաւ դորակին։ 5Եւ գինի ի նուէր զչորրորդ դորակին առնիցէք ըստ զոհին կամ ըստ ողջակիզին առ գառն մի. այնչափ առնիցես ընծայ ի հոտ անուշից Տեառն. 6եւ խոյին յորժամ առնիցես զնա յողջակէզ կամ ի զոհ,՝՝ արասցես զզոհ նաշհոյն երկուս տասանորդս զանգեալ իւղով երրորդիւ դորակին. 7եւ գինի ի նուէր զերկրորդ դորակին մատուցանիցէք ի հոտ անուշից Տեառն։ 8Ապա թէ յարջառոց առնիցէք յողջակէզ կամ ի զոհ, մեծացուցանել զուխտսն ի փրկութիւն Տեառն, 9մատուսցէ ըստ զուարակին զոհ նաշհոյ՝ երիս տասանորդս զանգեալ իւղով կիսով դորակին. 10եւ գինի ի նուէր՝ կէս դորակին, ընծայ ի հոտ անուշից Տեառն։ 11Այնպէս առնիցես միում զուարակին, կամ միում խոյին, կամ միում գառինն, յօդեաց կամ յայծեաց։ 12Ըստ թուոյ նոցա, որպէս զինչ առնիցէք նոյնպէս արասջիք միումն ըստ իւրաքանչիւր թուոյ նոցա։ 13Ամենայն բնակն նոյնպէս արասցէ, նոյնպիսի ընծայս մատուցանել ի հոտ անուշից Տեառն։ 14Եւ եթէ եկ ոք յարեսցի ի ձեզ յերկրին ձերում, որ լինիցի առ ձեզ յազգս ձեր, արասցէ ընծայ ի հոտ անուշից Տեառն. որպէս դուքն առնիցէք՝ նոյնպէս առնիցէ եւ եկն եւ ժողովուրդն Տեառն։ 15Օրէն՝՝ մի եւ նոյն կացցէ ձեր եւ եկացն որ յարիցին ի ձեզ. օրէն յաւիտեանական յազգս ձեր. որպէս եւ դուքն իցէք, եւ եկն լինիցի առաջի Տեառն։ 16Օրէն մի եւ նոյն կացցէ, եւ իրաւունք մի եւ նոյն լինիցին՝ ձեր եւ եկին որ յեցեալ իցէ ի ձեզ։

17Խօսեցաւ Տէր ընդ Մովսիսի եւ ասէ. 18Խօսեաց ընդ որդիսդ Իսրայելի եւ ասասցես ցդոսա. Ի մտանել ձեր յերկիրն յոր ես տարայց զձեզ, 19եւ եղիցի յորժամ ուտիցէք դուք ի հացէ երկրին, 20առջիք հաս ի նուէր Տեառն զառաջին զանգուածոյ ձերոյ, եւ տարջիք զհաց հասին Տեառն, զատուսջիք զայն Տեառն որպէս զհասն ի կալոյ. նոյնպէս եւ զայն զատուցանիցէք՝ 21զառաջին զանգուածոյն ձերոյ, եւ տաջիք Տեառն հաս յազգս ձեր՝՝։

22Իսկ յորժամ յանցանիցէք, եւ ոչ առնիցէք զամենայն զպատուիրանս զայսոսիկ զոր խօսեցաւ Տէր ընդ Մովսիսի, 23որպէս հրաման ետ ձեզ Տէր ի ձեռն Մովսիսի, յօրէ յորմէ հրաման ետ ձեզ Տէր եւ յառ յապա ժամանակս յազգս ձեր. 24եւ եղիցի եթէ յաչաց ժողովրդեանն վրիպիցի ակամայ ինչ, արասցէ ժողովուրդն զուարակ մի յանդւոյ անարատ յողջակէզ ի հոտ անուշից Տեառն. եւ զոհ ըստ նմին եւ նուէր ըստ նմին պայմանի, եւ նոխազ մի յայծեաց վասն մեղաց։ 25Եւ քաւեսցէ քահանայն վասն ամենայն ժողովրդեան որդւոցն Իսրայելի, եւ թողցի նոցա, զի ակամայ է, եւ նոքա մատուսցեն զպատարագն իւրեանց ընծայ Տեառն՝ վասն մեղաց իւրեանց առաջի Տեառն յաղագս ակամայիցն իւրեանց. 26եւ թողցի ամենայն ժողովրդեան որդւոցն Իսրայելի, եւ եկին յեցելոյ ի ձեզ. զի ամենայն ժողովրդեանն է ակամայն։

27Եւ եթէ մի անձն մեղիցէ ակամայ, մատուսցէ ալոջ մի տարեւոր վասն մեղաց. 28եւ քաւեսցէ քահանայն ի վերայ անձին ակամայացելոյ եւ մեղուցելոյ առաջի Տեառն ակամայ, քաւել վասն նորա։ 29Բնակին որդւոցն Իսրայելի եւ եկին յեցելոյ ի նոսա՝ օրէն մի եւ նոյն կացցէ որ ինչ առնիցէ ոք ակամայ։

30Եւ անձն որ առնիցէ ձեռամբ հպարտութեան ի բնակաց կամ յեկաց, բարկացոյց նա զՏէր, սատակեսցի անձն այն ի ժողովրդենէ իւրմէ։ 31Զի զբանն Տեառն խոտեաց, եւ զպատուիրանս նորա ցրեաց, ջնջելով ջնջեսցի անձնն այն ի ժողովրդենէ իւրմէ. զի մեղք նորա ի նմա են։

32Եւ էին որդիքն Իսրայելի յանապատի անդ եւ գտին այր մի որ քաղէր փայտ յաւուր շաբաթու։ 33Եւ մատուցին զնա որք գտինն զի քաղէր փայտ յաւուր շաբաթու՝ առ Մովսէս եւ առ Ահարոն՝ եւ առ ամենայն ժողովուրդ որդւոցն Իսրայելի՝՝։ 34Եւ ետուն զնա ի պահ, զի ոչ ընտրեցին՝՝ թէ զի՛նչ առնիցեն նմա։ 35Եւ խօսեցաւ Տէր ընդ Մովսիսի եւ ասէ. Մահու մեռցի այրն. քարամբք քարկոծեսցեն զնա ամենայն ժողովուրդն արտաքոյ բանակին։ 36Եւ հանին զնա ամենայն ժողովուրդն արտաքոյ բանակին, եւ քարկոծեցին զնա ամենայն ժողովուրդն արտաքոյ բանակին՝՝ որպէս հրամայեաց Տէր Մովսիսի։

37Խօսեցաւ Տէր ընդ Մովսիսի եւ ասէ. 38Խօսեաց ընդ որդիսն Իսրայելի եւ ասասցես ցնոսա, զի արասցեն իւրեանց ծոպս ի տտունս հանդերձից իւրեանց յազգս իւրեանց. եւ դնիցէք ի վերայ ծոպից տտնոցն ասղանի կապուտակ. 39եւ լինիցի այն ձեզ ի ծոպսն, եւ տեսանիցէք զայն եւ յիշիցէք զամենայն զպատուիրանս Տեառն առնել զնոսա. եւ ոչ խոտորիցիք զկնի մտաց եւ աչաց ձերոց, որով դուքն պոռնկիք զկնի նոցա. 40զի յիշիցէք եւ առնիցէք զամենայն զպատուիրանս իմ, եւ եղիջիք սուրբք Աստուծոյ ձերում։ 41Զի ես եմ Տէր Աստուած ձեր որ հանի զձեզ յերկրէն Եգիպտացւոց լինել ձեզ Աստուած. ես եմ Տէր՝ Աստուած ձեր։